Mako 1 - La Bible en Otetela (Bible K'Ekila) 1991

Joani Ubatizanyi Ambusambisha

¹ Etatelu ka Lukumu lʼOlolo la Jesu Kristu, Onʼa Unyashungu, kene.

² Uku akafundama lu efundelu kumvutshi Isaya ati: Enda, dimi lambutuma dikendji diami la ntundu kʼelundji kaye. Ndi ayolongosola mbuka kaye.

³ Ndi eko diui dia untu lahangohango lʼusui ati: Nyolongosole mbuka ka Khumadiondjo. Nyusimbuli esese andi —

⁴ Joani akayi, akabatiza antu lʼusui wa shenga. Ndi akasambishaka antu diʼekadimwelu kʼetema, ne dia edimanyelu ka kolo.

⁵ Wudja tshe wa Judiya la asi Jerusalema tshe, wakunela, wakatshu utsha le ndi. Ndi akubatizaka lu ndjali ka Jorodana, washula kolo yawo.

⁶ Joani akalotaka dihondo dia diosa dia kamelo, la uya wʼekuhu lu lukindi. Ndi akalekaka endjo la usanga.

⁷ Ndi akasambishaka ati: One layayi lʼokongo ami, ambundeka wulu. Dimi kema ololo wukukimi nkhusama la nkelekula ekodi wa sabata yandi.

⁸ Dimi lakanyubatiza la ashi, keli ndi ayunyubatiza la Nyuma kʼOlolo.

Jesu Ambubatizama

⁹ Lu nshi sho, Jesu akayi uma la Nazareta ka la Ngalili. Ndi akayubatizama le Joani lu ndjali ka Jorodana.

¹⁰ Lamʼakandatumbi uma lu ashi, ndi akenyi ulungu ambudiho, ndu Nyuma kʼOlolo ambuhulwela uku fudu kʼinga.

¹¹ Ku diui diakayi uma lʼulungu ati: Onʼami la ngandji keye. Dimi lambongenangena lu dikambu diaye.

Jesu Ambuhimbama; Ambusambisha la Ngalili

¹² Kemʼedja Nyuma kʼOlolo akasukuya Jesu utsha lʼusui wa shenga.

¹³ Ndi akatshikala lʼusui nshi akumi anei ahimbama le Satana. Ndi aki kame la nyama ya lʼadiyu. Andjelo wakukimanyiaka.

¹⁴ Lamʼakawandi Joani, Jesu akayi la Ngalili, ayasambisha lukumu lʼololo la Unyashungu.

¹⁵ Ndi akataka ati: Etena kambukuka, diulelu dia Unyashungu diaya suki. Nyukadimuli etema, nyetawo lukumu lʼololo.

Jesu Ambeta Antu Anei

¹⁶ Lamʼakandatetaka lʼumamu wʼUduwa a Ngalili, ndi akenyi Simona la Andere onangu Simona wadja tei lʼuduwa, ne dia vo waki amundji wa nsi.

¹⁷ Jesu akawatela ati: Nyundjeli, ku layunyuhiluya amundji wʼantu.

¹⁸ Kemʼedja vo wakatshiki tei, wakuveli.

¹⁹ Lamʼakandatshu yema ntu, ndi akenyi ndu Jakoba onʼa Zebede, la Joani onangu, lu watu walongosola tei yawo.

²⁰ Kemʼedja ndi akawaeti, vo wakatshiki shewo Zebede lʼasi ulimu lu watu, ku vo wakûyeli.

Jesu Ambetsha Antu la Kaperenauma

²¹ Vo wakatshu la Kaperenauma. Jesu akoto lʼetemwelo lushi lʼekila; aketsha antu.

²² Vo wakambi dia wetshelu andi, ne dia ndi akawaetsha uku kanga aui, aha uku afundji.

²³ Untu omotshi laki lʼodienge aki lʼetemwelo kawo. Ndi akahangohango ati:

²⁴ We Jesu yʼusi Nazareta dikambu diakona diasasu la ye? Undi we ambuya la ndjutudiaka? Dimi keyaka, lʼEkila la Unyashungu keye.

²⁵ Jesu akuhangwela ati: Lembohala, tumba umale ndi!

²⁶ Ku odienge akuhuhanya, akahangohango wulu, akatumbi uma le ndi.

²⁷ Ku vo tshe wakambi, wakambwana vati: Na ne na? Wetshelu wʼuyuyu one! Ndi eko la wulu wa nsengola ndu edienge, ku vo nkitanyia diui diandi!

²⁸ Kemʼedja lukumu landi lakadiangana lu leke tshe la Ngalili.

Jesu Ambokonoya Ukilu a Petero a Umuntu

²⁹ Lamʼakawatumbi uma lʼetemwelo, vo wakatshu kame la Jakoba la Joani utsha lu luudu la Simona la Andere.

³⁰ Nyangu wadi a Simona aketama la dimba dja. Vo wakatela Jesu dikambu diandi:

³¹ Jesu akayi, akayukimela lu lunya, akawetula. Dimba dja diakashili; ku ndi akakambela ulimu.

³² La dikolo dia lushi lako, lamʼakadji unya, vo wakayi la antu tshe waki la hemo le ndi, ndu waku waki la edienge.

³³ Asi usumba tshe wakamote la suku.

³⁴ Ndi akakonoya efula waki la hemo ya wehu wehu, akatundja edienge efula. Ndi kumbetawo edienge nteketa, ne dia vo wakaweyi.

Jesu Ambutsho lu Dihuli dia Shenga; Ambusambisha la Ngalili

³⁵ Jesu aketo la hyutshihutshi, unya atahuto. Ndi akatumbi, akatshu lu dihuli dia shenga ndame, akatolomba Unyashungu leko.

³⁶ Ku Simona la waku waki la ndi wakuyeli.

³⁷ Lamʼakawawenyi, vo wakawutela vati: Antu weko lu nkuyanga.

³⁸ Ndi akawatela ati: Tutshu lʼahuli akina, lu esumba weli lasuki, dia dimi ntusambisha ndu leko, ne dia dikambu diako mbakamayi.

³⁹ Ku ndi akatasambishaka antu lu temwelo diawo, lu Ngalili tshe, atatundja edienge.

Jesu Ambokonoya Kanga Sudi

⁴⁰ Kanga sudi akayi le Jesu. Ndi akôsengasenga, akukhusamela, akawutela ati: Naka we alanga, we la wulu wa nkonoyami.

⁴¹ Jesu akangasana la ketshi, akasimbula lunya, akawunanda, akawutela ati: Dimi nangaka, okono.

⁴² Kemʼedja sudi kandi kakashili; ndi akakono.

⁴³ Kemʼedja Jesu akûkimo, akôkokomiya wulu ati:

⁴⁴ Uki, tutelaki nduku untu dikambu ne. Keli utshu, utuyaenya le olombedi, utulambuli ulambu wakati Mose dikambu diʼedielo. Vo kawuyali omenyi la antu dikambu diaye.

⁴⁵ Keli untu ako akatumbi, akadianganya lukumu la dikambu diako. Uma lu dikambu diako, Jesu kumbeya ntumba seke lʼusumba la usumba. Keli ndi akatshikala lʼandja wʼusumba, lu ahuli wa tosenga, lamʼakayaka antu le ndi uma lu beke tshe.