Luka 7 - La Bible en Otetela (Bible K'Ekila) 1991

Jesu Ambandula Olombodi wʼAlimbi

¹ Lamʼakashili Jesu mvuta aui andi tshe, ndi akakumi la Kaperenauma.

² Ukambi omotshi olombodi wʼalimbi, lakalemiama le ndi, aki la hemo lasuki la mvo.

³ Lamʼakanduki lukumu la Jesu, ndi akutumela dikumanyi diʼasi Juda dia ntolomba, dia ndi ndjushimbela ukambi andi.

⁴ Lamʼakawayi le Jesu, vo wakosengasenga wulu; wakati vati: Ololo andi nkukaka dia we mbutshela dikambu so,

⁵ ne dia ndi nangaka wudja asu. Ndame kakatuhikela etemwelo kasu.

⁶ Ku Jesu akatshu la wo. Lamʼakandayala suki la luudu, olombodi wʼalimbi akatumi engenyi andi le ndi; akawutela ati: Khumadiondjo, tuyasuyaki, ne dia dimi kema ololo wukukiye mboto lu luudu lami.

⁷ Ntu, dimi lakakani nti: Dimi kema ololo wukukimi ntsho le ye, keli uti diui, ku ukambi ami ayokono.

⁸ Ne dia dimi leko lʼokongo wʼakina, leko la alimbi lʼokongo ami; naka layutela omotshi nti: Utshu, ndi ayutsho; la ukina nti: Uyi, ndi ayuya; ndu ukambi ami nti: Utshi okone, ndi ayutsha.

⁹ Lamʼakuki Jesu aui aso, ndi akambi dikambu diandi, akasikiso, akatela ului wʼantu wakayuyelaka ati: Dimi lambunyutela nti: Dimi latenyi mbetawo ka wuki wuhu one kuyanga lu Isariyele.

¹⁰ Ku waku wakatumama, wakakalula lu luudu, wakatani ukambi ako ambokono.

Onʼa Wadi Aki Udu la Nayina

¹¹ Kemʼedja ndi akatshu lʼusumba wetawo vati: Nayina. Ambeki andi la ului a wuki wʼantu wakatshu la ndi.

¹² Lamʼakandakumi lasuki la suku diʼusumba, enda, wakayatumbaka la untu ambuvo, aki ona etoi lʼutema a nyangu. Nyangu aki wadi aki udu. Antu efula wa lʼusumba wakayi le ndi.

¹³ Lamʼakawenyi Khumadiondjo, ndi akawuki ketshi; akawutela ati: Tulelaki.

¹⁴ Ku Jesu akayi lasuki, akananda kaka yaki udu. Ku wane wakatawembaka wakemala. Jesu akati ati: Olongo, dimi lambukutela nti: Eto.

¹⁵ Lakavu akasunguka, akatatela nteketa. Ku Jesu akukimwela nyangu.

¹⁶ Woma akawandi vo tshe. Vo wakatumbula Unyashungu, wata vati: Umvutshi a wuki ambuya lʼatei asu. Ntu vati: Unyashungu ambokendela wudja andi.

¹⁷ Lukumu landi loso lakadiangana la Judiya tshe, ndu lu beke dia lʼemamu.

Akendji wa Joani Ubatizanyi le Jesu

¹⁸ Ambeki wa Joani wakatela Joani akambu aso tshe.

¹⁹ Ku Joani aketi ambeki andi ahendi. Ndi akatumi le Jesu dia ntuwumbula vati: We keli ndʼako layayi, kana tukungeli ukina?

²⁰ Lamʼakayi apami aso le ndi, vo wakawutela vati: Joani Ubatizanyi kututumi dia ndjukumbula ati: We keli ndʼako layayi, kana tukungeli ukina?

²¹ Lu unya oso, Jesu akakonoya antu efula uma lu hemo yawo la elandu a wulu la edienge. Ndi akasenya efula waki tutshungu.

²² Ndi akâkaluya diui ati: Nyututeli Joani akambu wenanyu la wukanyu: akanga a tutshungu wambosena, akanga a tshumbi wambokendakenda, akanga a sudi wambokono, akanga a puki wambuka, wavo wambulwama, asi wula wambusambishama lukumu lʼololo.

²³ Untu tshe lahatani utakanya lu dikambu diami, eko la otshoko.

Jesu Ambandula Joani Ubatizanyi

²⁴ Lamʼakakalula akendji wa Joani, Jesu akatatela mvutela elui wʼantu ati: Akanyatshu dia ntenda lʼusui na? Sopo diasutshasutshama la lohele li?

²⁵ Akanyatshu dia ntenda na? Untu lolotshi ahondo wa yovuyovu? Enda, wane walota ahondo wa lukumu, la emenyi wʼolo, vo weko lu kumbu ya khumi ya dikanga.

²⁶ Akanyatshu dia ntenda na? Umvutshi? Ee, lambunyutela nti: One kuleki umvutshi.

²⁷ Ndʼako kakawafundi vati: Enda, lambutuma dikendji la ntundu ka elundji kaye, Ndi ayolongosola mbuka kaye la ntundu kaye.

²⁸ Lambunyutela nti: Lʼatei a wane wakutama le amantu, nduku omotshi luleki Joani. Keli luleli tshitshe lu diulelu dia Unyashungu, kuleki.

²⁹ Lamʼakuki antu tshe akambu aso, ndu elungudi wʼelambu, wakayindja Unyashungu, lamʼakawabatizama la batiza ka Joani.

³⁰ Keli Afarise la embeyi wʼelembe wakaseke daku dia Unyashungu, lamʼakiwo kumbatizama le ndi.

³¹ La na ayumufanya antu wa lu lolonga lone? vo weli uku na?

³² Vo weli uku akenda wudjashi lu kituka, wetana, wata vati: Shu takanyudedi pungi, ku nyu hanyonwe wenye. Shu takadi tukuku, ku nyu hanyuledi.

³³ Ne dia Joani Ubatizanyi akayi, kondekaka, konokaka ashi wʼelua, ku nyu nyakati nyati: Kanga odienge kendi.

³⁴ Onʼa untu akayi, ndi ndekaka la nokaka, ku nyu nyambuta nyati: Kanga dishi la onoshi a wanu, ongenyi wʼelungudi wʼelambu la antu wa kolo.

³⁵ Yimba yambuyindjama le anʼayo tshe.

Umuntu a Kolo Ambukita Jesu Malashi

³⁶ Ufarise omotshi akalangi di Jesu ntole la ndi ma. Ndi akoto lu luudu la Ufarise, akadjase la mesa.

³⁷ Enda, lʼusumba kaki umuntu omotshi. Lamʼakandeyi ati: Jesu ambudjase la mesa lu luudu la Ufarise, ndi akayi la malashi lu olondo wa wema.

³⁸ Ndi akemala lʼokongo alela lʼekulu andi, akatatela ndoya ekulu wa Jesu la asoi andi. Ndi akekitula la divu diandi. Ndi akaki wumbu lʼekulu andi, akakiti malashi lʼekulu.

³⁹ Lamʼakenyi Ufarise wakaweti dikambu diako, ndi akayatela ati: Utunduyala untu one eko umvutshi, tshiki ndi uteya umuntu one luwunandji wuhu wendi, ati: Untu a kolo kendi.

⁴⁰ Jesu akati ati: Simona, dimi la diui dia nkutela. Ku ndi akati ati Umbetsha, uta.

⁴¹ Osondjanyi omotshi aki la akanga wʼabasa andi ahendi: omotshi aki la dibasa dia denariyo kama tshanu la ukina akumi atanu.

⁴² Lamʼakiwo kundjala la engo ka mbufuta, ndi akadimanyia abasa vo ahendi. Okone lʼatei awo, akona ayuleka mbuka ngandji?

⁴³ Simona akûkaluya diui ati: Dimi lambukana nti: One lakandadimanyia dibasa diuleki. Ndi akawutela ati: We ambusambula ololo.

⁴⁴ Ku ndi akasikiso le umuntu; akatela Simona ati: We menaka umuntu one? Dimi lakotwe lu luudu laye, we hambisha ashi wa mbotsha ekulu ami. Keli ndi amboloya ekulu ami la asoi andi, ambekitula la divu dianni.

⁴⁵ We hakanyi la mi wumbu. Keli umaka lamʼakamotwe edja ndu kakiane, ndi hakimo mbikami wumbu lʼekulu ami.

⁴⁶ We hankitshi iso lʼote ami. Keli ndi ambunkita malashi lʼekulu ami.

⁴⁷ Okone dimi lambukutela nti: Kolo yandi yeli efula, yambudimanyema, ne dia ndi akukaka ngandji efula. Keli one layuwudimanyia tshitshe, ndi ayuka ngandji tshitshe.

⁴⁸ Ku ndi akatela umuntu ati: Kolo yaye yambudimanyema.

⁴⁹ Waku wakadjashi la ndi wale ma, wakatatela ndjambula untu lʼuntu lʼutema ati: Akona one adimanyia kolo na?

⁵⁰ Ku ndi akatela umuntu ati: Mbetawo kaye kambukushimbela; utshu la ki.