Luka 5 - La Bible en Otetela (Bible K'Ekila) 1991

Wambunda Nsi Efula

¹ Lamʼakemala Jesu lʼokenge wʼuduwa a Ngenezareta, ului wʼantu wakudingi, wakuki diui dia Unyashungu.

² Ndi akenyi watu ehendi lʼokenge wʼuduwa. Keli amundji wa nsi wakatumbi loko, waki lu nsula tei yawo.

³ Ndi akoto lu watu omotshi waki Simona. Ndi akolombe dia ndi nsemiya watu uma lʼokenge. Ku ndi akadjase, aketsha antu uma lu watu.

⁴ Lamʼakandakumiya nteketa, ndi akatela Simona ati: Mosemiya watu utsha lu dingunda, nyukitshakitsha tei yanyu, keli nyokoke nsi.

⁵ Simona akûkaluya diui ati: Uwandji, shu takatshi ulimu utshu tshe, hatundji nduku engo. Keli layukitshakitsha tei ne dia diui diaye.

⁶ Lamʼakawatshi osoku, vo wakandi nsi efula, ku tei yakate.

⁷ Ku vo waketi anyawo amundji, waki lu watu ukina, la papi diʼanya vati: Nyuyi, nyuyutukimanyia. Vo wakayi, wakaludia watu ako ehendi, ku watu wakayangi ndjita.

⁸ Keli lamʼakenyi Simona Petero dikambu so, ndi akayakosha lʼekulu wa Jesu. Ndi akati ati: Khumadiondjo, umo uma le mi, ne dia untu a kolo kemi.

⁹ Ndi akambi, ndi la antu tshe waki kame la ndi, ne dia efula ka nsi yakawandi.

¹⁰ Ndu Jakoba la Joani, ana wa Zebede, waku waki amundji wa nsi kame la Simona, wakambi. Ku Jesu akatela Simona ati: Tukaki woma. Uma ka kakiane, we ayundaka antu.

¹¹ Lamʼakawayi la watu awo lʼumamu, vo wakatshiki tshe, wakuyeli.

Jesu Ambokonoya Kanga Sudi

¹² Lamʼaki Jesu lʼusumba omotshi, enda, untu aki leko laki la sudi dimba tshe. Lamʼakandenyi Jesu, ndi akayakosha ekhukhumadi; akosengasenga ati: Khumadiondjo, naka we alanga, we mbeyaka nkonoyami.

¹³ Ku ndi akasimtula lunya, akawunanda; akati ati: Dimi nangaka, okono. Kemʼedja sudi kakashili.

¹⁴ Jesu akokokomiya ati: Tutelaki untu dikambu ne. Keli utshu, utuyaenya le olombedi. Utukimo diango diakati Mose ne dia ekonwelo kaye uku djimbitelu le wo.

¹⁵ Keli lukumu landi lakaleki nyangana. Elui a waki wʼantu wakamote dia ndjuka aui andi, la dia ndjokono lu hemo yawo.

¹⁶ Keli ndi akatshokaka ndame lʼesui wa tosenga, akatolombaka Unyashungu.

Ambokonoya Kanga Ekhusi

¹⁷ Lushi lomotshi, lamʼaketshaka Jesu antu, Afarise, la embetsha wʼelembe wa-kadjashi lasuki. Vo wakayi uma lu ngelu tshe ya Ngalili ndu ya Judiya ndu uma la Jerusalema. Wulu wa Khumadiondjo waki la ndi wa nkonoya antu.

¹⁸ Enda, apami wakayi la kanga ekhusi etami lu tangi. Vo wakayangi mbotshiya lu luudu, la mbetamia la ntundu ka Jesu.

¹⁹ Lamʼakiwo kumena hyuli ya mboto, ne dia ului wʼantu, vo wakambela lu sambi ka luudu, wakafufula luudu, wakubuluya la tangi kandi lʼatei awo la ntundu ka Jesu.

²⁰ Lamʼakandenyi mbetawo kawo, ndi akati ati: Pami, kolo yaye yambudimanyema.

²¹ Afundji la Afarise wakatatela mumbwana vati: Akona one atenga Unyashungu na? Akona eli la wulu wa nyimanyia kolo, naka aha Unyashungu ndame?

²² Keli Jesu akeyi tukanyi tawo, akawambula ati: Ukundi akananyu lʼetema anyu na?

²³ Dikambu diakona diuleki kolo, mvuta ati: Kolo yaye yambudimanyema, kana eto, okendekende?

²⁴ Keli dia nyu mbeya nyati: Onʼa untu eko la wulu la kete wa nyimanyia kolo — ndi akati ati: — Dimi lambukutela nti: Eto, osa tangi kaye, utshu lakaye.

²⁵ Kemʼedja, ndi aketo la ntundu kawo, akose tangi akandetami, akatshu lakandi atatumbula Unyashungu.

²⁶ Vo tshe wakambi, wakatumbula Unyashungu; wakuki woma efula. Vo wakati vati: Elo, shu tambena akambu wahatatenaka.

Ambeta Lewi

²⁷ Lamʼaketi akambu aso. Jesu akamo leko. Ndi akenyi ulungudi wʼelambu, lukumbu landi Lewi, udjashi lu dihuli diʼelungwelu. Jesu akawutela ati: Undjeli.

²⁸ Ku ndi akatshiki tshe, akunela, akuyeli.

Wambosongwela Jesu, ne Dia Ndi Ambole la Antu wa Kolo

²⁹ Lewi akakatela Jesu dambu dia wuki lakandi. Ului a wuki wʼelungudi wʼelambu wakadjashi la wo wale ma.

³⁰ Afarise la afundji wakangunangunela ambeki andi; wakawumbula vati: Ukundi alenyu la anonyu la elungudi wʼelambu la antu wa kolo na?

³¹ Jesu akâkaluya diui ati: Akanga a wulu hawuhumbi wetshi, paka akanga a hemo.

³² Dimi kundja dia ndjeta antu wʼololo, lakayi dia ndjeta antu wa kolo, dia vo nkadimula etema.

Dia Ekilelu ka Mbu ya Nde

³³ Vo wakatela Jesu vati: Ambeki wa Joani watukilaka mbu ya nde ekila efula, watolombaka Unyashungu; ndu ambeki wʼAfarise watutshaka osoku, keli ambeki aye watolekaka, watonokaka.

³⁴ Jesu akawambula ati: Nyu mbeyaka nkidia engenyi wʼutshuki a wadi mbu ya nde lamʼeki utshuki a wadi kame la wo?

³⁵ Keli nshi yayuyala, lamʼayuwakosola utshuki a wadi, la nshi sho mbayuwukilaka mbu ya nde.

³⁶ Ku ndi akawauki wela ntu ati: Nduku untu atataka etshi ka dihondo diʼuyuyu la nkimamanya lu dihondo diʼedjedja. Naka ndi ayutsha osoku, keti ndi mbata dihondo diʼuyuyu; ndu etshi ka dihondo diʼuyuyu hasungana lu dihondo diʼedjedja.

³⁷ Nduku untu ayangula ashi wʼelua wʼeyuyu lu atapa wa dikuhu diʼedjedja. Lamʼayundutsha osoku, ashi wʼelua wʼeyuyu wayata dikuhu, wayutshulo, ndu dikuhu diayulana.

³⁸ Keli ololo mangula ashi wʼelua wʼeyuyu lu atapa wa dikuhu diʼeyuyu.

³⁹ Nduku untu lakanwe ashi wʼelua wʼedjedja, layulanga wʼeyuyu; ne dia ndi ayuta ati: Wʼedjedja weko ololo.