Luka 4 - La Bible en Otetela (Bible K'Ekila) 1991

Jesu Ambuhimbama

¹ Jesu akakalula uma la Jorodana, uludiami la Nyuma kʼOlolo. Ndi akalombwama le Nyuma lʼusui

² nshi akumi anei. Ndi akahimbama le uhimbanyi. Ndi konde nduku engo lu nshi sho. Lamʼakashili nshi sho, ndi akuki ndjala.

³ Ku uhimbanyi akawutela ati: Naka Onʼa Unyashungu keye, uteli dive ne, diahilo ekenga ka ma.

⁴ Jesu akûkaluya diui ati: Ambufundama ati: Until huyala la lumu ne dia ma tu.

⁵ Ku ndi akambela la ndi, akawenya waulelu tshe wa la kete lu wenya otoi.

⁶ Uhimbanyi akawutela ati: Dimi layukusha wulu one tshe, ndu lutumbu la waulelu aku; ne dia wakambisha wulu, okone untu tshe lalangami mbusha, layuwushawo.

⁷ Okone naka we ayontemola, vo tshe wayuyala waye.

⁸ Jesu akûkaluya diui ati: Ambufundama ati: Otemole Khumadiondjo, Unyashungu aye, ukambeli ndame ulimu.

⁹ Ku ndi akatshu la ndi la Jerusalema; akatuweme lu ote wʼetemwelo, akawutela ati Naka Onʼa Unyashungu keye, ulimbo uma lindu.

¹⁰ Ne dia ambufundama ati: Ndi ayokosengwela andjelo andi, dia nkulama.

¹¹ Ku Vo wayukemba lʼanya awo, Ne dia we utukuhumanya dikaka lu dive.

¹² Jesu akûkaluya diui ati: Wakati vati: Tuhimbaki Khumadiondjo, Unyashungu aye.

¹³ Lamʼakashidiya uhimbanyi ehimba eso tshe, ndi akatukutshika, edja ndu lamʼayundutana etena ka mbuhimba ntu.

Jesu Ambukalula la Ngalili

¹⁴ Jesu akakalula la Ngalili la wulu a Nyuma. Lukumu landi lakadiangana lu leke loso tshe.

¹⁵ Ndi aketshaka lu temwelo diawo, akatumbwama le antu tshe.

Jesu Ambusambisha la Nazareta; Wambusukula Uma lʼUsumba

¹⁶ Jesu akayi la Nazareta, lene akanduli. Ndi akoto lʼetemwelo lushi lʼekila, uku aki etshelu kandi. Ndi akemala dia mbala mukanda a Unyashungu.

¹⁷ Wakawusha buku dia umvutshi Isaya, ku ndi akombola wombo wʼafundelu wʼekila, akenyi dihuli diakawafundi ati:

¹⁸ Nyuma ka Khumadiondjo kambumbahema, Ne dia ndi akankidia dia dimi nsambisha akanga a weula lukumu lʼololo. Ndi akantumi dia ntutela wane wambundama dikambu dia etshungwelu, Ndu akanga a tutshungu dia esenelo, La dia ntshungula wane wambusuyama,

¹⁹ La dia mvutela antu dia eleku kaketawo Khumadiondjo.

²⁰ Ndi akombe buku, akadikaluya le ulami, ku ndi akadjase. Antu tshe waki lʼetemwelo, wakawendi tee.

²¹ Ku ndi akatatela mbatela ati: Afundelu kene kambushidiyama lʼatei anyu elo.

²² Antu tshe waki emenyi wa dikambu diako, wakambi dia aui wa ngandji ka mamba, wakatumbi uma lu unyo andi. Vo wakambwana vati: Ndi kema onʼa Josefu uka?

²³ Ndi akawatela ati: Mete, nyayukanula nyati: We wetshi, uyakonoya! Utshi akambu wakatuki we atsha la Kaperenauma ndu lindu lakanyu.

²⁴ Ndi akawatela ati: Mete kanyutelami nti: Nduku umvutshi wambetawoma lu wudja awo.

²⁵ Mete kanyutelami nti: Lamʼakadihama ulungu deku satu la ngondo shamalu, lamʼakayala ndjala ka kasha lu kete tshe lu nshi ya Elidja, wadi waki edu waki efula lu Isariyele.

²⁶ Keli Elidja kuntumama le akina, paka la Zarefata, lu kete ya Sidona, le umuntu laki wadi aki udu.

²⁷ Ndu lu nshi ya umvutshi Elisha, akanga a sudi efula waki lu Isariyele, keli akina konkono, paka Namana, usi Suriya, utu.

²⁸ Lamʼakawuki aui aso, antu tshe waki lu etemwelo wakandunganela la kele.

²⁹ Vo wakunela, wakusukula uma lʼusumba, wakayi la ndi lʼote a dikuna diakawaki usumba, dia mbuka lu luwinga etshulitshuli.

³⁰ Keli Jesu aketi lʼatei awo, akatshu.

Jesu Ambutundja Odienge Uma le Untu la Kaperenauma

³¹ Jesu akayi la Kaperenauma, usumba omotshi wa la Ngalili, akawaetsha lushi lʼekila.

³² Antu wakakashimo dia wetshelu andi, dia diui diandi diaki la wulu.

³³ Lu etemwelo kaki untu omotshi, laki la odienge. Ndi akahangohango la diui dia wulu ati:

³⁴ Yee! we Jesu yʼusi Nazareta, dikambu diakona diasasu la ye? We ambuya dia ndjutudiaka? Dimi keyaka, lʼEkila la Unyashungu keye.

³⁵ Jesu akuhanewela ati: Uyali ki! Utumbi uma le ndi! Lamʼakawumbi odienge lʼatei awo, vo wakatumbi uma le ndi, kumbutshela kolo.

³⁶ Vo tshe wakambi, wakambwana vati: Na diui ne na? ne dia ndi atosengolaka edienge lu luwandji ndu lu wulu, ku vo watutumbaka.

³⁷ Ku lukumu landi lakadianga lu ahuli tshe wa lu leke loso.

Jesu Ambokonoya Ukilu a Umuntu a Petero; Amboseka Lukumu le Antu

³⁸ Jesu akunela uma lʼetemwelo, akoto lu luudu la Simona. Ukilu a Simona a umuntu aki la dimba dja dia wulu; wakasengasenga Jesu dia dikambu diandi.

³⁹ Jesu akemala, awenda, akahangwela dimba dja, ku dio diakukimo. Kemʼedja ndi akunela, akakambela ulimu.

⁴⁰ Lamʼakayangi unya mbidja, wane tshe waki la akanga a hemo wehu efula, wakayi la wo le Jesu. Ndi akawahe anya, akakonoya.

⁴¹ Edienge wakatumbi uma le antu, wakahangohango vati: Onʼa Unyashungu keye! Ndi akahangwela, kumbetawo dia vo nteketa, ne dia vo wakeyi vati: Kristu kendi.

Jesu Ambusambislia la Ngalili

⁴² Lamʼakahuto unya, ndi akatumbi, akatshu lu dihuli dia shenga. Elui wʼantu wakuyeli, wakayi le ndi, wakayangi mbeme vati: Tututshikaki.

⁴³ Keli ndi akawatela ati: Dieli la mi dia nsambisha lukumu lʼololo la diulelu dia Unyashungu ndu lu esumba ekina, ne dia dimi lakatumama dia dikambu diako.

⁴⁴ Ku Jesu akasambisha lu temwelo dia Ngalili.