Luka 24 - La Bible en Otetela (Bible K'Ekila) 1991

¹ Keli la kesekese ya lushi la ntundu la lubingu, vo wakayi la diumbu, wakela diango diʼupumu diakawalongosola.

² Vo wakatani dive diakangitwami uma lu diumbu.

³ Ku vo wakoto loko, kuntana udu wa Khumadiondjo Jesu.

⁴ Lamʼakawakananaka dia dikambu diako, apami ahendi wakayemala lasuki la wo, wolotshi ahondo wa ngaingai.

⁵ Lamʼakawuki woma, ndu lamʼakawakole dundji utsha la kete, apami wakawambula vati: Okoko wana wayanganyu lasena lʼatei wʼedu?

⁶ Ndi kema lane, keli ndi ambulo. Nyuho okone akandanyutela lamʼakindi la Ngalili,

⁷ ati: Dieli la Onʼa untu dia nkimoma lu anya wʼantu wa kolo, la dia ndjakema lu utamba a mpeketanya, ku ndi ayulo lushi la satu.

⁸ Vo wakuho aui andi;

⁹ ku wakakalula uma la diumbu; wakatutela ambeki dikumi la otoi ndu akina tshe akambu ako tshe.

¹⁰ Amantu ako waki Mariya wʼusi Mangadala, la Joana, la Mariya wa nyangu Jakoba ndu amantu akina, waki la wo, wakatutela atumami akambu ako.

¹¹ Aui ako, waki uku aui wa utata lu ashu awo; vo kumbetawo.

¹² Keli Petero akemala, akalawo utsha la diumbu. Ndi akanyama, akalingela, akenyi ahondo wa linene atu. Ku ndi akakalula utsha lakandi, atambi dia dikambu diakayala so.

Jesu la Ambeki Ahendi Utsha lʼEmayo

¹³ Nyulungi, lushi lako ahendi uma lʼului awo wakatatshokaka utsha lu ngelu, ketawo vati: Emayo, kaki stade akumi asamalu uma la Jerusalema.

¹⁴ Vo wakatasawulaka dia akambu aso tshe wakatshama.

¹⁵ Lamʼakawatasawulaka, ndu lamʼakawatambwanaka, Jesu ndame akayi lasuki la wo, akatshu kame la wo.

¹⁶ Keli ashu awo wakashimbama dia vo mbeya.

¹⁷ Ndi akawambula ati: Aui akona watanyasawula lamʼatanyakendakenda? Vo wakemala ki, waki la dundji dia lunyangu.

¹⁸ Omotshi, lukumbu landi Keleopa, akûkaluya diui ati: We untu luhangi la Jerusalema, ku heyi akambu wambuyala leko nshi nye?

¹⁹ Ndi akawambula ati: Akambu akona aso? Vo wakawutela vati: Lu dikambu dia Jesu yʼusi Nazareta, laki umvutshi a wulu lu etsha andi ndu lʼaui andi, la ntundu ka Unyashungu ndu kʼantu tshe.

²⁰ Okone elombedi a waki la embuledi asu wakukimo dia mbamia dia ndi mvo, ku wakudiaki lʼutamba a mpeketanya.

²¹ Keli shu takalungamela shati: Ndi kayutshungula Isariyele. Ee, ladiku diʼaui aso tshe, elo keli lushi la satu lʼokongo wʼakambu aso.

²² Ntu amantu amotshi lʼului asu wakakumi kʼolomo la diumbu, wakatukashimudi.

²³ Lamʼakiwo kuntana udu andi, vo wakakaludi, wakatshi vati: Takenyi enelo kʼandjelo watutela vati: Ndi eko la lumu.

²⁴ Ku amotshi waki la su, wakatshwi la diumbu, wakatanyi dikambu uku akatshi amantu. Keli vo kumbena.

²⁵ Ndi akawatela ati: Nyu akanga a dinginya, nyu nyatutshi mbatshimbaka lʼetema dia mbetawo aui tshe wakati amvutshi!

²⁶ Undi, taki ololo Kristu nsuwa lu akambu aso, la mboto lu lutumbu landi?

²⁷ Ku ndi akatatela uma le Mose, la uma le amvutshi tshe, akamanya akambu andi fundu lu afundelu tshe.

²⁸ Ku vo wakasukana utsha la ngelu kakawatatshokaka. Ndi akayangi mbalekana.

²⁹ Ku vo wakosengasenga wulu vati: Uhangi la su, ne dia aya dikolo, unya ambeta. Ku ndi akoto, akahangi la wo.

³⁰ Lamʼakandadjase la wo ale ma, ndi akose ukama a ma, akotshokola. Ndi akawatula, akawasha.

³¹ Ku ashu awo wakadihwama, wakaweyi. Ku ndi akasango uma lu ashu awo.

³² Vo wakambwana vati: Undi, etema asu kompeta lamʼakandateketaki la su lu mbuka, ndu lamʼakandatumanyaki afundelu fundu?

³³ Vo wakunela lu unya ako, wakakalula uya la Jerusalema. Ku vo wakatani dikumi la otoi wusanganyimi kame, ndu akina waki la wo.

³⁴ Vo wakati vati: Mete, Khumadiondjo ambulo, ndi akene le Simona.

³⁵ Ku vo wakasanya akambu wakayala lu mbuka, ndu uku akandeyama le wo lamʼakandatula ma.

Jesu Ambene le Ambeki la Jerusalema

³⁶ Lamʼakawateketaka akambu aso, ndame akemala lʼatei awo; akawatela ati: Ki kayaii la nyu!

³⁷ Keli vo wakuki w oma a mamba, wakakani vati: Tambena edimu.

³⁸ Ku ndi akawambula ati: Okoko wana wadidimanyu? Dikambu kuna diambuyala ekandukandi lʼetema anyu?

³⁹ Nyendi anya ami la ekulu ami, nyeyi nyati: Dime. Nyumunandi, nyeyi, ne dia edimu aha la emunyi la weka uku amenanyu la wo.

⁴⁰ Lamʼakandati osoku, ndi akawaenya anya andi la ekulu andi.

⁴¹ Lamʼakiwo kumbetawo ne dia ongenongeno, lamʼakawambaka, ndi akawambula ati: Nyu la engo ka nde lane?

⁴² Ku vo wakawushu etshi ka lusi la lufumba.

⁴³ Ndi akalose, akali la ntundu kawo.

Aui wʼElakanelu

⁴⁴ Jesu akawatela ati: Lamʼakimi la nyu, dimi lakanyutela aui ane nti: Dieli la akambu tshe wakafundama lu dikambu diami lu elembe a Mose, ndu lu aui wʼamvutshi ndu lu esambu wa Davidi nshidiyama.

⁴⁵ Jesu akadihula etema awo, dia vo mana afundelu fundu.

⁴⁶ Ku ndi akawatela ati: Ambufundama ati: Dieli la Kristu dia nsuwa, la dia ndi mbulo uma lu nyoi lushi la satu;

⁴⁷ la dia nsambisha wedja tshe dikambu dia ekadimwelu kʼetema la edimanyelu ka kolo lu lukumbu landi, atateli uma la Jerusalema.

⁴⁸ Nyu nyeli emenyi wʼakambu ane.

⁴⁹ Nyulungi, dimi lambunyutumela daka dia Papa. Keli nyutshikali lʼusumba, edja ndu lamʼayunyuludiama la wulu uma lʼulungu.

Jesu Ambumbela lʼUlungu

⁵⁰ Jesu akalombola edja ndu lamʼakawakumi lu welelo wa Betaniya. Ku ndi akeme anya andi, akatshokola.

⁵¹ Lamʼakandatshokolaka, ndi akamamitona la wo, akembama lʼulungu.

⁵² Vo wakotemola, wakakalula la Jerusalema la ongenongeno a wuki.

⁵³ Vo waka alaka lʼetemwelo nshi tshe, wandula Unyashuneu.