Luka 23 - La Bible en Otetela (Bible K'Ekila) 1991

Jesu la Ntundu ka Pilata

¹ Ului awo tshe wakunela, wakayi la Jesu la ntundu ka Pilata.

² Vo wakatatela mbosongwela, vati: Takatani untu one angayula wudja asu, asike antu nambula Kayisa; ata ati: Dime keli Kristu, khumʼekanga.

³ Pilata akawumbula ati: Khumʼekanga kʼasi Juda keye? Ndi akûkaluya diui ati: Wemʼoso ata.

⁴ Ku Pilata akatela elombedi a waki la elui wʼantu ati: Dimi halenyi nduku munga le untu one.

⁵ Keli vo wakatetemala mvuta vati: Ndi atotomboshaka antu, atetshaka lu Judiya tshe, uma la Ngalili edja ndu lu dihuli ne.

Jesu la Ntundu ka Herode

⁶ Keli lamʼakuki Pilata diui diako, ndi akambula kana pami kako aki usi Ngalili.

⁷ Lamʼakandeyi ati: Uma lu diulelu dia Herode kendi, ndi akutumi le Herode, laki ndame la Jerusalema nshi sho.

⁸ Lamʼakenyi Herode Jesu, ndi akangenangena. Ndi akalangi mbena edja, ne dia ndi akukaka lukumu landi. Ndi akalungamela mbena atsha dikambu dimotshi dia mamba.

⁹ Ndi akawumbula aui efula, keli Jesu kumbukaluya nduku diui.

¹⁰ Elombedi a waki la afundji wakemala, wakosongwela wulu.

¹¹ Ku Herode la alimbi andi wakawonyola wakosoke. Vo wakolotsha dihondo dia nemo, ku ndi akûkaluya le Pilata.

¹² Herode la Pilata wakayala engenyi lushi loso, keli ntundu vo wakahetshanyaka.

Jesu la Ntundu ka Pilata Ntu. Pilata Ambusambula Dia Vo Mbudiaka

¹³ Pilata aketi elombedi a waki la embuledi la antu kʼantu.

¹⁴ Ndi akawatela ati: Nyu nyambuya la untu one le mi, nyati: Ndi kangayula antu. Enda, dimi lambuwumbula la ntundu kanyu, halenyi nduku munga le untu one lu akambu wosongwelanyu.

¹⁵ Ee, ndu Herode kumbena la dikambu, ne dia ndi akûkaluya le su. Nyulungi, ndi kuntsha dikambu dia ndi mvo.

¹⁶ Okone dimi layokomola, ku layutshungula.

¹⁷ Diaki la ndi dia mbatshungwela usi lukanu omotshi lushi la dambu.

¹⁸ Keli vo tshe wakahangohango kame vati: Utunyiya untu uku, ututshungweli Barabasi! —

¹⁹ Wakadji Barabasi lu lukanu, ne dia ndi akatombosha asi usumba, akadiakana.

²⁰ Ku Pilata akateketa la wo ntu, akalangi ntshungula Jesu.

²¹ Keli vo wakadji dielu vati: Udiaki lu utamba a mpeketanya! Udiaki lu utamba a mpeketanya!

²² Ndi akawambula umbula a satu ati: Okoko wana, kolo kakona kutshindi? Dimi halawenyi la dikambu dia ndi mvo. Okone dimi layokomola, ku layutshungula.

²³ Keli vo wakatetemala mvuta la aui a wulu, wakalombe vati: Udiaki lu utamba a mpeketanya! Aui awo wakolembia.

²⁴ Ku Pilata akasambula; akati ati: Diatshami uku alombanyu.

²⁵ Ndi akatshungula one lakawadji lu lukanu ne dia ndi akatombosha antu ndu akadiakana, uku akawolombe. Keli ndi akakimo Jesu uku lulangu lawo.

Wambuhane Jesu lu Utamba a Mpeketanya

²⁶ Lamʼakawatatshokaka la Jesu, vo wakandi untu omotshi, lukumbu landi Simona, usi Kurene, lakayayakaka uma lʼusui, wakawahe utamba a mpeketanya dia ndi mbemba lʼokongo a Jesu.

²⁷ Ului a wuki wʼantu wakuyeli. Amantu wakayayakomolaka, wayaleli.

²⁸ Keli Jesu akasikiso le wo, akati ati: Ana amantu wa Jerusalema, tanyundelaki, keli nyuyaleli, nyuleli ndu anʼanyu.

²⁹ Nyulungi, nshi yayuya, yayuta antu vati: Amantu wa dikumba la etema wahuti ana, ndu awele wahalomia ana, weko la otshoko!

³⁰ Ku wayutatela mvutela akuna vati: Nyutokwele; ndu ekungu vati: Nyutukhukhume.

³¹ Ne dia naka vo wambutsha akambu ane lamʼeki utamba uyuyu, ukundi ayuwutsha lamʼumawo?

³² Wakatshu ndu la antu akina ahendi, atshi wa kolo, dia ntadiaka kame la ndi,

³³ Lamʼakawakumi lu dihuli dietawo vati: Lombo, vo wakahane Jesu lʼutamba a mpeketanya. Wakahane ndu atshi wa kolo: omotshi lu lunya landi la pami, la ukina lu lunya landi la lomoso.

³⁴ Ku Jesu akati ati: Papa, adimanyia, ne dia vo haweyi kene katshawo. Vo wakakahana ahondo andi lu eukelu kʼuwali.

³⁵ Antu wakemala wenda. Ndu embuledi wakosoke; wakati vati: Ndi lakashimbelaka akina, ndi ayashimbeli naka Kristu ka Unyashungu, osonami andi, mbendi!

³⁶ Ndu alimbi wakosoke, wakayi le ndi, wakawusha wanu wʼukavi.

³⁷ Vo wakati vati: Naka Khumʼekanga kʼasi Juda keye, uyashimbeli.

³⁸ Wakafundi ndu efundelu ladiku diandi vati: Khumʼekanga kʼAsi Juda One.

³⁹ Omotshi lʼatei wa atshi wa kolo wakahanemi la Jesu lu utamba a mpeketanya, akukanula ati: We aha Kristu? Uyashimbeli, utushimbeli ndu shu!

⁴⁰ Keli ukina akuhangwela, akati ati: We huki Unyashungu woma, ne dia we akanyema pupu?

⁴¹ Mete, wakasambula dikambu diasu ololo, ne dia shu tambulungula difutu dia etsha asu. Keli unto one, kuntsha nduku dikambu dia kolo.

⁴² Ndi akati ati: Jesu, kumbuho lamʼayuyukuma lu diulelu diaye.

⁴³ Ndi akawutela ati: Mete kakutelami nti: Elo, kayuyuyala la mi lu Paradisu.

Nyoi ka Jesu

⁴⁴ Lamʼakayala unya lʼatei wʼote, udjima akayala lu kete tshe edja ndu lʼeshidi esatu.

⁴⁵ Yanyi kumbale; dihondo dia lʼetemwelo diakate kʼatei.

⁴⁶ Jesu akawelela diui wulu ati: Papa, lambukitsha lumu lami lu anya aye Lamʼakandati osoku, ndi akakitshiya.

⁴⁷ Lamʼakenyi olombodi wʼalimbi akambu wakatshama, ndi akatumbula Unyashungu; akati ati: Mete, pami kene aki untu ololo!

⁴⁸ Elui tshe wʼantu wakayi dia ndjenda dikambu diako. Lamʼakawenyi akambu wakatshama, vo wakakalula, watayakomola lu tulu.

⁴⁹ Wane wakeyanaka la ndi tshe, ndu amantu wakuyeli uma la Ngalili, wakemala tshalula, wakenyi akambu ako.

Wambukhunde Jesu

⁵⁰ Nyulungi, untu omotshi, lukumbu landi Josefu, uma lʼArimatiya, usumba wʼasi Juda, aki leko. Ndi aki undaki omotshi, untu ololo ndu uluwanyi.

⁵¹ Ndi kumbetawo diui diawo ndu akambu wakawatshi. Ndi akalungamelaka diulelu dia Unyashungu.

⁵² Untu ako akatshu le Pilata, akatolomba udu a Jesu.

⁵³ Ku ndi akuhanula, akawombe la dihondo dia linene; akatuwetamia lu diumbu diakawatunguna lu dive, diahatakhundama untu.

⁵⁴ Lushi loso, laki lushi la Elongoswelo. Ku lushi lʼekila, mbaki etatelu.

⁵⁵ Amantu wakayi la ndi uma la Ngalili, wakayayakaka lʼokongo. Vo wakenyi diumbu, ndu okone akawetamia udu andi.

⁵⁶ Ku vo wakakalula, wakalongosola diango diʼupumu la biso dia malashi. Vo wakumuya lushi lʼekila, uku aki olembe.