Luka 22 - La Bible en Otetela (Bible K'Ekila) 1991

Sheki ya Ndjaka Jesu

¹ Dambu dia Ma Diaha la Edya Lu diaki lasuki, dietawo vati: Elekanelu.

² Elombedi a waki la afundji wakayangi wuhu wa ndjaka Jesu, ne dia vo wakukaka antu woma.

Judasi Ambusanga la Wo Lulimi Dia Nkimo Jesu

³ Satana akoto lʼutema a Judasi, letawo vati: Isakariyote, omotshi a lu dikumi la ahendi.

⁴ Ndi akatshu, akatusanga la elombedi a waki la elombodi wʼalimbi lulimi wuhu wa ndi mbukimo le wo.

⁵ Ku vo wakangenangena, wakulaki dia mbusha falanga.

⁶ Ku ndi aketawo, akayangi etena kʼololo ka ndi mbakimwelandi, lamʼaha elui wʼantu laawo.

Ma Diaha la Edya

⁷ Lushi la Ma Diaha la Edya lakakuki, lakawahumbaka ndjaka osongo wʼokoko wa dambu diʼElekanelu.

⁸ Jesu akatumi Petero la Joani, akawatela ati: Nyutshu, nyututolongoswele dambu diʼElekanelu, dia shu ndjole.

⁹ Vo wakawumbula vati: Lendi alangaye shu ntudilongosola?

¹⁰ Ndi akawatela ati: Nyulungi, lamʼayunyukuma lʼusumba, nyu nyayuhumana lʼuntu ayembe mbaka kʼashi, kanyuyeli utsha lu luudu layundoto.

¹¹ Kanyuteli kanga luudu nyati: Umbetsha ambukumbula ati: Lendʼeli luudu lʼangendangenda, dia dimi ndjole dambu diʼElekanelu la ambeki ami?

¹² Ku ndi ayunyenya luudu la wuki la ladiku, lolongoswami. Nyututolongoswele loko.

¹³ Ku vo wakatshu, wakatani uku akandawatela. Vo wakalongosola dambu diʼElekanelu.

¹⁴ Lamʼakakuki unya, ndi akadjase, ndu atumami wakadjase kame la ndi.

¹⁵ Ndi akawatela ati: Dimi lambuleka nanga nde la nyu dambu ne diʼElekanelu, ntundu latasuwi.

¹⁶ Dimi lambunyutela nti: Dimi handjole ma ne ntu, edja ndu dio diayushidiyama lu diulelu dia Unyashungu.

¹⁷ Ku ndi akose dikoho; lamʼakanduki lusaka, ndi akati ati: Nyudiose, nyudikahani.

¹⁸ Dimi lambunyutela nti: Umaka kakiane, dimi handjono uma lʼelua wʼekodi, edja ndu diulelu dia Unyashungu diambuya.

¹⁹ Ndi akose ukama wa ma; lamʼakanduki lusaka, ndi akawatula, akawasha. Ndi akati ati: Dimba diami ne! diambukimwama dikambu dianyu. Kanyutshaki okone, dia mbuhomi.

²⁰ Ndu lʼokongo wa ma dia dikolo, ndi akose dikoho; akati ati: Dikoho ne, dieli sheki yʼuyuyu ya lu dikila diami, diambutshulwama dikambu dianyu.

²¹ Nyulungi, lunya la one lafunga, leko la mi lu mesa.

²² Mete, On a untu ayutsho uku akawusanguya, Keli fono kayayi le one lufunga!

²³ Ku vo wakatatela mumbwana vati: Akona ukuki ntsha dikambu so?

Tamu Dia Luleki Wuki

²⁴ Tamu takatumbi lʼatei awo vati: Akona uleki wuki lʼatei asu?

²⁵ Ndi akawatela ati: Khumi ya dikanga yʼasi wedja watuwaulelaka la ngala. Ku asi wedja watuwaetaka vati: Atshi wʼololo.

²⁶ Keli nyu, tanyuyalaki osoku. One lunyuleki wuki, ayali uku kushenyu; la olombodi, ayali uku ukambi anyu.

²⁷ Uleki wuki na, one ludjashi lale ma, kana one lukambela ulimu? Aha one ludjashi lale ma? Keli dimi leko lʼatei anyu uku ukambi.

²⁸ Keli nyu nyambutshikala la mi lʼehimba ami.

²⁹ Dimi lambunyusha diulelu uku akambisha Papa,

³⁰ dia nyu nde la no lu mesa ami lu diulelu diami. Nyu nyayudjase lu kiti ya diulelu, nyayulumbuya wedja dikumi la ehendi wa Isariyele.

Jesu Ambutela Petero Dia Langunu Landi

³¹ Simona, Simona, ulungi, Satana akalombe dia nkosa, dia nkuyungula uku epunga,

³² keli dimi lakakolombela, dia mbetawo kaye tashilaki. Lamʼayuyukadimo, kushikike anyaye.

³³ Ku ndi akawutela ati: Khumadiondjo, dimi lambuyalongosola dia itsho la ye lu lukanu ndu lu nyoi.

³⁴ Ku Jesu akatela Petero ati: Elo, lekeka lateki, we ayumanguna tena satu wati: Halaweyi.

Akambu wa Atumami Wambukadimo

³⁵ Jesu akawambula ati: Lamʼakamanyutumi aha la tapa, aha la diutu, aha la sabata, nyu nyakahumbi engo? Vo wakati vati: Kema.

³⁶ Ndi akawatela ati: Keli kakiane, one leli la tapa, adiose, ose ndu diutu; one laha la yombo asundja koti diandi, ayisumbi.

³⁷ Ne dia dimi lambunyutela nti: Dieli la diui diufundami nshidiyama le mi, ati: Ndi akalen kame la antu wa kolo, ne dia aui wa dikambu diami wayushidiyama.

³⁸ Vo wakawutela vati: Khumadiondjo, enda, tombo tuhendi tone. Ku ndi akawatela ati: Ambukuka.

Ngetesemane

³⁹ Jesu akatumbi, akatshu lʼUkungu wʼEweli, uku aki etshelu kandi. Ku ambeki andi wakuyeli.

⁴⁰ Lamʼakandakumi lu dihuli diako, ndi akawatela ati: Nyolombaki, nyutukoto lu ehimba.

⁴¹ Ku ndi akangana uma le wo tshalula, yukuki untu mbuka lowoko la dive. Ndi akakhuse adui, akalombe.

⁴² Ndi akati ati: Papa, naka we nangaka, uminyiya dikoho ne. Kuku aha uku alangami, keli uku alangaye.

⁴³ Ku ondjelo omotshi akene le ndi uma lʼulungu, akukikitsha.

⁴⁴ Lamʼakindi lʼasʼeku la nyoi, ndi akaleki nomba wulu. Dungu diandi diakayala uku apopo a waki wa dikila mbalo la kete.

⁴⁵ Lamʼakandunela uma lu nomba, ndi akayi le ambeki, akatani lu djo, ne dia lunyangu.

⁴⁶ Ndi akawatela ati: Ngandi etamanyu na? Nyeto, nyolombe, nyutokoto lu ehimba.

Wambunda Jesu

⁴⁷ Kamʼakateketaka Jesu, ului a wuki wʼantu wakayi, kame lʼuntu lak wetaka vati: Judasi, omotshi la lu dikumi la ahendi, ndi kaki lolombo lawo. Ndi akayi uya le Jesu la ndjononana la ndi.

⁴⁸ Keli Jesu akawumbula ati: Judasi, we kambufunga Onʼa untu lu enonanelu?

⁴⁹ Lamʼakenyi wane waki lasuki la ndi akambu wakayangi ntumba, vo waka-wumbula vati: Khumadiondjo, takote yombo?

⁵⁰ Omotshi akakote ukambi wʼolombedi a wuki, akuhimbula tui dia lunya la pami.

⁵¹ Keli Jesu akâkaluya diui ati: Tanyutshaki wuhu uku ntu. Ku ndi akananda tui diandi, akokonoya.

⁵² Ku Jesu akambula elombedi a waki, elombodi wa lʼetemwelo la dikumanyi, waku wakayi le ndi, ati: Nyu nyambuya la tombo la tukalimba uku uya le opotodi?

⁵³ Lamʼakimi la nyu la lushi la lushi lʼetemwelo, nyu kunsimbula anya anyu le mi. Keli unya anyu one, ndu wa wulu wa udjima.

Petero Ambanguna Jesu

⁵⁴ Vo wakandi Jesu, wakatshu la ndi. Vo wakoto la ndi lu luudu lʼolombedi a wuki. Keli Petero akayuyelaka tshalula.

⁵⁵ Lamʼakawongonya dja lʼatei a seke dia lukumbu, lamʼakawadjase kame, Petero akayudjase lʼatei awo.

⁵⁶ Umuntu ukambi wʼulimu akawenyi udjashi lʼusasi a dia, akawendi tee; akati ati: Ndu untu one kaki la ndi.

⁵⁷ Keli ndi akanguna, akati ati: Umuntu, dimi halaweyi.

⁵⁸ Ahuyala yema, ukina akawenyi; akati ati: Ndu we keli otoi awo omotshi. Keli Petero akati ati. Pami, aha dimi.

⁵⁹ Lamʼakaketi uku ushidi otoi, ukina akati ati: Mete, ndu untu one kaki la ndi, ne dia usi Ngalili kendi!

⁶⁰ Keli Petero akati ati: Pami, dimi haleyi lataye oso. Ku kamʼakandataka, lekeka lakeki.

⁶¹ Khumadiondjo akasikiso, akendi Petero tee. Ku Petero akuho diui dia Khumadiondjo, diakandawutela ati: La ntundu ka lekeka lateki elo, we ayumanguna tena satu.

⁶² Ku ndi akatumbi, akaleli wulu.

Wambosoka Jesu

⁶³ Apami wakakimedi Jesu wakosoke, wakokomola.

⁶⁴ Ku vo wakukumbi ashu, wakawumbula vati: Uta diui. Ukokomodi na?

⁶⁵ Wakosongwela akambu akina efula, wakotenge.

Diwandji Dia Jesu la Ntundu kʼEmbadi

⁶⁶ Lamʼakahuto unya, ului wa dikumanyi dia wudja wakasangana kame la elombedi a waki la afundji. Vo wakatshu la ndi lʼelumbwelu; wakati vati:

⁶⁷ Naka Kristu keye, ututeli. Keli ndi akawatela ati: Dimi kunyutelaka, nyu hanyetawo;

⁶⁸ kunyumbulaka, nyu hanyunkaluya diui.

⁶⁹ Keli umaka kakiane, Onʼa untu ayudjase lu lunya la pami la Unyashungu.

⁷⁰ Ku vo tshe wakawumbula vati: Onʼa Unyashungu keye? Ndi akâkaluya diui ati: Tuku nyame aso wata, nyati: Dimi keli ndi.

⁷¹ Ku vo wakati vati: Kakatahumbi emenyi ntu? Shu shame tambuka uma lʼunyo andi.