Luka 21 - La Bible en Otetela (Bible K'Ekila) 1991

Akuta wa Wadi Aki Udu

¹ Jesu akedia ashu, akenyi akanga wʼengonyi wadja eshasha awo lʼekitshelu.

² Ndi akenyi ndu wadi aki udu, kanga wula, adja ekinga ehendi loko.

³ Ndi akati ati: Wadi aki udu, kanga wula, akadjisha ushasha wuleki eshasha wudjishawo, vo tshe.

⁴ Ne dia vo wakadjisha eshasha awo uma lʼefula ka diango dieli la wo; keli ndi, uma lu wula andi, mbudjishandi kene tshe kaki la ndi, kakandahumbi ndjakimanyia.

Ehandjwelu ka Jerusalema

⁵ Lamʼakati antu amotshi vati: Etemwelo ambusangema la ave wʼololo la eshasha uma le antu, Jesu akati ati:

⁶ Dia diango dienanyu diku, nshi yukuyala, lamʼahutshikala nduku dive ladiku dia dikina, wayahandjula tshe.

⁷ Ku vo wakawumbula vati: Umbetsha, lushi lakona layuyala akambu aso? Djimbitelu yakona yayutena lamʼayuyala akambu aso lasuki la ndja?

⁸ Ndi akati ati: Nyewo, nyatukunganyiama; ne dia efula wayuya lu lukumbu lami, wayuta untu lʼuntu ati: Dimi keli ndi; ndu ati: Etena kaya suki. Tanyayelaki.

⁹ Lamʼayunyuka kumu yʼata la ya mindju, tanyukaki woma, ne dia dieli la akambu aso dia ndja la ntundu, keli ekumelu huyala esadi.

¹⁰ Jesu akawatela ati: Wudja wayolosha wudja ukina. Diulelu diayolosha diulelu dikina.

¹¹ Adidimu wa mamba wa kete wayuyala efula. Ndjala ya kasha yayuya, ndu elandu lu dihuli la dihuli. Weoma a mamba wayuyala la tulimbitelu ta waki uma lʼulungu.

¹² Keli la ntundu ka akambu aso tshe watayi, vo wayunyunda, wayunyusuya, wayunyukimo lu temwelo la lu mvudu ya kanu. Vo wayunyela la ntundu ka khumi ya dikanga la embuledi ne dia lukumbu lami.

¹³ Etena keso, kayuyala etena ka nyu ndjala emenyi ami le antu.

¹⁴ Okone nyusanguya lʼetema anyu, tanyukanaki yimba la ntundu uku ayunyukaluya aui,

¹⁵ ne dia dimi layunyusha unyo ndu yimba yaheya atunyi anyu mpumana la yo, kana nkaluya diui.

¹⁶ Keli nyu nyayukimwama uma le ambutshi anyu, uma le anengenyu, ndu uma le wane wuto lanyu. Vo wayudiaka amotshi lʼatei anyu.

¹⁷ Antu tshe wayunyuhetsha ne dia lukumbu lami.

¹⁸ Keli nduku wondji a divu dia lʼete anyu wayushisho.

¹⁹ Uma lu memakana kanyu, mbayunyushimbela nyumu yanyu.

²⁰ Lamʼayunyena elui wʼalimbi wambudinga Jerusalema, kanyeyi nyati: Elanyelu kayo kaya suki.

²¹ Lushi lako, wane weli la Judiya, kawulawo lʼekungu; wane weli lʼatei a ngelu, kawumo; wane weli lʼesui, tawuyakaki loko.

²² Ne dia nshi sho, yeko nshi ya nsomboya, dia akambu tshe wufundami nshidiyama.

²³ Fono kayayi le wane weli la waemi! la le wali walomia ana lu nshi sho! Ne dia asui a wulu wayuyala la kete, kele kayuyala le antu aso.

²⁴ Ku vo wayudiakema la tombo, wayotolama fumbi lu wedja tshe. Asi wedja wayohotshahotsha Jerusalema, edja ndu etena kʼasi wedja ambukuka.

Eyelu ka Mesiya

²⁵ Tulimbitelu tayuyala lu unya, lu ngondo ndu lu toto. Fono kʼasi wedja kayuyala la kete. Vo wayukanana, ne dia luhelu lʼashi a wuki la asukhu.

²⁶ Antu wayuka yimba tshimba, ne dia woma la elungamelu kʼakambu wayayi la kete, ne dia diango dia wulu dia lʼulungu diayusutshasutshama.

²⁷ Ku vo wayena Onʼa untu ayayi lu dingi la wulu la lutumbu la wuki.

²⁸ Keli lamʼayutatela akambu aso ndja, kanyuwaleli, kanyedia ete anyu; ne dia etshungwelu kanyu kaya suki.

Djimbitelu yʼUtamba a Fingu

²⁹ Jesu akawaukela wela ati: Nyendi utamba a fingu, ndu etamba ekina tshe.

³⁰ Lamʼatuwutumbiaka songusongu, nyu nyame nyatenaka ndu nyateyaka nyati: Eleku ka owo kaya suki.

³¹ Osoku ndu nyu, lamʼayunyena akambu ane wambuyala, nyayeya nyati: Diulelu dia Unyashungu diaya suki.

³² Mete kanyutelami nti: Wa lu lolonga lone hawushila, tshikima akambu ane tshe wambushidiyama.

³³ Ulungu la kete wayushila, keli aui ami hawushila.

³⁴ Keli nyuyalamaki, ne dia etema anyu watukuyala wutshu la dishi, la edjwelu ka wanu la edinganu wa lumu lone. Lushi loso, latukuya le nyu shashimuya, uku shuni ya djunga,

³⁵ ne dia osoku mbayuya lushi lako le antu tshe wudjashi ladiku dia kete.

³⁶ Keli nyendaki, nyolombaki lʼosengosengo dia nyu mpanda lu akambu aso tshe wayuya, la dia memala la ntundu ka Onʼa untu.

³⁷ Jesu aketsha antu lu temwelo nshi tshe. Ndi akatshokaka etshu tshe, aketamaka lʼukungu, wetawo vati: Ukungu wʼEweli.

³⁸ Antu tshe wakayakaka le ndi kʼolomo la pindju lu etemwelo, dia ndjuka aui andi.