Luka 20 - La Bible en Otetela (Bible K'Ekila) 1991

Wambumbula Jesu Dia Wulu Andi

¹ Lushi lomotshi, lamʼaketshaka Jesu ante lu etemwelo ndu lamʼakandasambishaka lukumu lʼololo, elombedi a waki la afundji la dikumanyi wakutumbela.

² Vo wakawumbula vati: Ututeli, uma lu wulu akona watuyutshaka akambu ane? Akakusha wulu one na?

³ Ndi akâkaluya diui ati: Ndu dimi layunyumbula umbula omotshi, keli kanyukadimweli.

⁴ Batiza ka Joani akayi uma lʼulungu kana uma le antu?

⁵ Vo wakakaui yimba vati: Naka shu tayuta shati: Uma lʼulungu, ndi ayuta ati: Okoko wana akinyu kumbetawo?

⁶ Keli naka shu tayuta shati: Uma le antu, antu tshe wayutuka ave, ne dia vo mbetawoka vati: Umvutshi mbakindi.

⁷ Ku vo wakûkaluya diui vati: Hateyi uma lene akito.

⁸ Jesu akawatela ati: Ndu dimi, halanyutela uma lu wulu akona watshami akambu ane.

Wela wʼEkambi wʼEkambo

⁹ Jesu akatatela mbuka antu wela one ati: Untu akakambi ekambo kʼelua, akakitshikela ekambi, akatshu lu kete kina la ntudjase edja.

¹⁰ Lamʼakakuki eleku kʼelua, ndi akatumi ukambi andi omotshi le ekambi wʼekambo, dia vo mbusha elua uma lʼekambo. Keli ekambi wʼekambo wakokomola, wakiikaluya anyanya.

¹¹ Ku ndi akatumi ukambi andi ukina. Vo wakokomola ndu ndi, wakotenge, wakûkaluya anyanya.

¹² Ndi akatumi ndu la satu. Vo wakokote puta ndu ndi, wakawutshanya.

¹³ Ku kanga ekambo akati ati: Kayumutsha na? Dimi layutuma onʼami la ngandji, kana vo wayolemia, undu.

¹⁴ Keli lamʼakawenyi ekambi wʼekambo, vo wakatanela vati: Ukito uku. Nyeso tudiaki, sangu diayali diasu.

¹⁵ Ku vo wakusukula uma lʼekambo, wakudiaki. Wuhu akona wayatshela kanga ekambo?

¹⁶ Ndi ayuyulanya ekambi ako, ayusha akina ekambo kandi. Lamʼakawuki diui so, vo wakati vati: Unyashungu ashimbi dikambu dia wuhu oso!

¹⁷ Keli ndi akawaendi tee, akawambula ati: Na kitshimudi ka diui ne, diakafundama ati: Dive diakatuni ambiki wa luudu, Diakayala ote wa tshuku?

¹⁸ One tshe layoko lu dive so, ayuhimbohimbo tenyi, keli untu layudiokwela, diayuhandjula uku ditshu.

Wambumbula Jesu Dia Munda lu Lulimi: Kana Ololo Nambula Kayisa

¹⁹ Afundji la elombedi a waki wakeyi vati: Jesu, shu mbukedindi wela oso. Vo wakayangi mbunda lu unya ako, keli vo wakuki antu woma.

²⁰ Vo wakokeshanya, wakatumi atopi dia vo ndjafanya uku antu wʼololo, dia mbosa aui andi la mbukimo le umbuledi, kanga diulelu.

²¹ Vo wakawumbula vati: Umbetsha, shu mbeyaka shati: We atutaka ndu atetshaka antu ololo; we kema la shonodi, keli we atetshaka antu mbuka ka Unyashungu lu mete.

²² Eko ekila shu nambula Kayisa, kana kema?

²³ Keli ndi akeyi lukesu lawo, akawatela ati:

²⁴ Uhunyumenya denariyo. Kanga efanelu la efundelu keli loko? Vo wakati vati: Ka Kayisa.

²⁵ Ndi akawatela ati: Okone nyusha Kayisa diango dia Kayisa. Nyusha Unyashungu diango dia Unyashungu.

²⁶ Ku vo kumbeya munda Jesu lu aui andi la ntundu kʼantu. Vo wakambi dia diui diakandakaluya, ku wakalembohala ki.

Kana Eulwelu kʼUma lu Nyoi Keko

²⁷ Asaduke, wane watutaka vati: Eulwelu kʼuma lu nyoi kemako, wakayi le Jesu.

²⁸ Vo wakawumbula vati: Umbetsha, Mose akatufundela ati: Naka untu ambuvo, ambutshika wadendi, aha la ona, onangu kakitani la ndi, kawulweli luhanga.

²⁹ Anangu esambeli wakiko. Lʼenundu akatshuki wadi, akavu, kuntshika ona.

³⁰ La hendi akakitana la wadendi, akavu kuntshika ona.

³¹ Ndu la satu akakitana la ndi. Okone vo tshe esambeli wakavu, kuntshika ana.

³² Lʼokongo awo, vo tshe, ndu umuntu akayuvo.

³³ Okone lu eulwelu kʼuma lu nyoi, ndi ayuyala wadi a na! ne dia ndi aki wadewo vo esambeli.

³⁴ Jesu akawatela ati: Ana wa lʼetena kene watutshukaka, ndu watutshukamaka.

³⁵ Wane weli ololo, wayukuma lʼetena kako la lu eulwelu kʼuma lu nyoi, vo hawutshuki kuyanga ntshukama.

³⁶ Vo haweyi mvo ntu, ne dia vo wambedima la andjelo. Vo weli ana wa Unyashungu, ne dia vo weko ana wʼeulwelu kʼuma lu nyoi.

³⁷ Keli wavo watulwamaka, ndu Mose akatenya dikambu diako lu ahuli wata dikambu dia dikumbu, lene akandeti Khumadiondjo ati: Unyashungu a Abarahama, Unyashungu a Isaka, Unyashungu a Jakoba.

³⁸ Ndi kema Unyashungu a wavo, keli ndi eko Unyashungu a wasena, ne dia tshe weko la lumu le ndi.

³⁹ Afundji amotshi wakâkaluya diui vati: Umbetsha, ololo mbutshiye.

⁴⁰ Lʼokongo wa akambu aso, vo kundjala la dihunga dia mbumbula akambu akina ntu.

Jesu Ambumbula Afundji Dia Kristu

⁴¹ Jesu akawambula ati: Ukundi watawo vati Kristu eko kanula ya Davidi?

⁴² Ne dia Davidi ndame akati lu Buku diʼEsambu ati: Khumadiondjo akatela Khumemi ati: Udjase lu lunya lami la pami,

⁴³ Edja ndu lamʼayumete atunyi aye kihuna kʼekulu aye.

⁴⁴ Davidi ndame mbetaka ati: Khumadiondjo; ya ukundi wendi kanula yandi na?

Jesu Ambewula Antu Dia Afundji

⁴⁵ Antu tshe wakuki lamʼakatela Jesu ambeki andi ati:

⁴⁶ Nyewo afundji! Vo watulangaka nkendakenda lʼekutu wʼetali; watulangaka antu mbaemula lu tuka, la mbasha die diuleki ame ta lu temwelo, ndu ahuli wa nemo lu alambu;

⁴⁷ vo watohotolaka wadi waki edu mvudu, ku dia vo nkesa antu, mbatuwolombaka alombelo wʼetali. Vo mbayuleka manyema!