Luka 2 - La Bible en Otetela (Bible K'Ekila) 1991

Eutwelu ka Jesu

¹ Lu nshi sho, Kayisa Angusta akadjanga dia nfunda kumbu yʼantu tshe.

² Efundelu keso kaki efundelu ka ntundu lamʼaki Kuriniyo umbuledi a Suriya.

³ Antu tshe wakatshu dia ntufundama, untu lakawo, untu lakawo.

⁴ Ndu Josefu akatshu uma la Ngalili, uma lʼusumba wa Nazareta, utsha la Judiya, utsha lʼusumba wa Davidi, wetawo vati: Betelehema,

⁵ ndi la Mariya lakandambela, laki la diemi.

⁶ Lamʼakiwo leko, nshi yakakuki ya ndi mbuta.

⁷ Okone ndi akuti ona pami lʼenundu, akudingi ahondo. Ndi akawetamia lʼelelu ka dungalunga, ne dia dihuli tadiakiko lu luudu la angendangenda.

Aiami wʼEkoko la Andjelo

⁸ Lu leke loso kaki aiami wʼekoko, waki lʼusui walama ekoko awo lʼutshu.

⁹ Ondjelo wa Khumadiondjo akemala lasuki la wo. Lutumbu la Khumadiondjo lakahetela, ku vo wakuki woma efula.

¹⁰ Ondjelo akawatela ati: Tanyukaki woma. Nyulungi, lambunyela lukumu lʼololo lʼongenongeno a wuki wayuyila le antu tshe,

¹¹ ne dia wambunyutela Ushimbedi lu ngelu ka Davidi elo. Ndi eli Kristu Khumadiondjo.

¹² One eli djimbitelu ya nyu mbeva. Nyayena ona udingami ahondo, etami lʼelelu ka dungalunga.

¹³ Shashimuya, ului a wuki wʼalimbi wa lʼulungu wakasangana la ondjelo ako wandula Unyashungu vati:

¹⁴ Lutumbu layali le Unyashungu lʼulungu. Ki kayali la kete lʼatei wʼantu watongenyangenyaka.

¹⁵ Lamʼakatshiki andjelo utsha lʼulungu, aiami wʼekoko wakatanela vati: Tutshu kakiane utsha la Betelehema, tutenyi dikambu ne diambuya, diambutewuya Khumadiondjo.

¹⁶ Vo wakatshu esadi, wakatani Mariya la Josefu, la ona etami lu elelu ka dungalunga.

¹⁷ Lamʼakawenyi dikambu diako, vo wakasanya diui diakawawatela lu dikambu diʼona.

¹⁸ Wane tshe wakuki, wakambi dia akambu wakawatela aiami wʼekoko.

¹⁹ Keli Mariya akalamaka aui aso tshe, akakanaka dikambu diawo lʼutema andi.

²⁰ Ku aiami wʼekoko wakakalula watatumbula, watandula Unyashungu, ne dia akambu tshe wakawuki la wakawenyi, uku akawawatela.

Wambole Jesu Lukumbu; Wambutsho la Ndi lu Etemwelo

²¹ Lamʼakakuki nshi enanei ya mbahemia uhekeli, vo wakawole lukumbu vati: Jesu, lukumbu iakawole ondjelo la ntundu ndi atoto lʼutema.

Simona la Ana Wambolemia Jesu

²² Lamʼakakuki nshi yawo ya ndjaedia, uku elembe wa Mose, vo wakela Jesu la Jerusalema dia ndjukimo le Khumadiondjo

²³ (uku ufundami lu elembe a Khumadiondjo ati: Wayeta ona pami tshe, yatakundu lʼutema a nyangu, vati: Lʼekila le Khumadiondjo),

²⁴ la dia nambula ulambu uku akawati lu elembe wa Khumadiondjo, ati: Binga pendi kana ana ahendi wa tukudumba.

²⁵ La Jerusalema kaki pami kemotshi, lukumbu landi Simeyona. Untu oso aki ololo, aki umbetawudi, akalungamelaka esambelu ka Isariyele. Nyuma kʼOlolo aki la ndi.

²⁶ Nyuma kʼOlolo akawenya ati: We huvo ntundu atenyi Kristu ka Khumadiondjo.

²⁷ Ndi akoto lʼetemwelo lu wulu wa Nyuma. Lamʼakayi ambutshi wa Jesu la ona uku etshelu kʼelembe,

²⁸ ndi akulungula lu anya, akandula Unyashungu. Ndi akati ati:

²⁹ Khumadiondjo, etawo ukambi aye atshu kakiane la ki, Uku diui diaye,

³⁰ Ne dia ashu ami wambena panda kaye

³¹ Kakayalongosola lu ashu wa wedja tshe,

³² Usasi wa mpetela asi wedja, Lu lutumbu la wudja aye Isariyele.

³³ Shi la nyangu wakambi dia akambu wakandati lu dikambu dia ona.

³⁴ Simeyona akatshokola, akatela Mariya, nyangu, ati: Ulungi, ona ambutumama ne dia ekwelo La etwelu kʼantu efula lu Isariyele; Ndu dikambu dia djimbitelu ya tamu.

³⁵ (Ee, ndu yombo ya ntundula utema aye), Ne dia tukanyi tʼuma lʼetema efula tashwami.

³⁶ Ndu umvutshi a umuntu Ana, onʼa Fanuele, a lu diuhu dia Ashere. Ndi aki usumbi a lukusumbi, akadjase la umendi deku esambeli lu nshi yandi yʼusekaseka;

³⁷ ndi aki wadi aki udu deku akumi enanei la nei. Ndi kumumoka lu etemwelo, akatemolaka Unyashungu la dikilelu dia mbu ya nde ndu la dombelo lʼutshu ndu la yanyi.

³⁸ Ana akayi lu unya ako, akuki Unyashungu lusaka, akati dikambu diandi le antu wakalungamelaka etshungwelu ka Jerusalema.

³⁹ Lamʼakawashidiya akambu tshe uku elembe wa Khumadiondjo, vo wakakalula la Ngalili, lu ngelu kawo Nazareta.

⁴⁰ Ona akuli, akakikitala, akaluli la yimba. Ngandji ka mamba ka Unyashungu kaki la ndi.

Jesu Dikenda lu Etemwelo

⁴¹ Ambutshi wa Jesu wakatshokat i eleku la eleku la Jerusalema lu dikambu dia lushi la wuki lʼElekanelu.

⁴² Lamʼakindi la deku dikumi la pendi, vo wakatshu leko uku aki etshelu kawo ka lushi la wuki lako.

⁴³ Lamʼakawashidiya nshi, lamʼakawayakalulaka, Jesu dikenda akatshikala la Jerusalema. Ambutshi andi kumbeya vati: Ndi ambutshikala.

⁴⁴ Vo wakakani vati: Ndi eko lʼului wʼantu, wakatshu lokendo la lushi otoi. Ku vo wakuyangi lʼatei wʼantu wuto la wo, ndu wʼantu weyana la wo.

⁴⁵ Lamʼakiwo kumbena, vo wakakalula utsha la Jerusalema, watuyangi.

⁴⁶ Lʼokongo wa nshi shatu, vo wakutani lu etemwelo, udjashi lʼatei wʼembetsha, uka aui awo la awambula embula.

⁴⁷ Wane wakuki aui andi, wakambi dia yimba yandi la ekadimwelu kandi ka embula.

⁴⁸ Lamʼakawenyi ambutshi andi, vo wakakashimo. Nyangu akawumbula ati: Onʼami, ukundi ambuyututshela okone na? Enda, dimi la sho tambukuyanga la lunyangu!

⁴⁹ Ndi akawambula ati: Katanyanyangi pa? Nyu hanyeyi nyati: Dieli la mi dia ndjala lu luudu la Papa?

⁵⁰ Ku vo kumana diui diakandawatela fundu.

⁵¹ Ku ndi akatshu la wo, akakumi la Nazareta; akakitanyiaka aui awo. Nyangu akalamaka aui aso tshe lʼutema.

⁵² Jesu akahami lu yimba, lu diema ndu lu kenemo le Unyashungu ndu le antu.