Luka 19 - La Bible en Otetela (Bible K'Ekila) 1991

Zakeyo, Ulungudi wʼElambu

¹ Jesu akakumi la Jeriko, akatetaka.

² Untu omotshi aki leko, lukumbu landi Zakeyo. Ndi aki kapita ka elungudi wʼelambu ndu kanga ongonyi.

³ Ndi akayangi mena Jesu uku akindi, keli ndi kumbeya mbena lʼatei wʼului wʼantu, ne dia ndi aki mundumundu.

⁴ Okone ndi akalawo la ntundu, akatumbela lʼutamba wa lukhumu dia ntuwena, ne dia Jesu akayangi mbeta laawo.

⁵ Lamʼakakumi Jesu lu dihuli diako, ndi akawalela; akawutela ati: Zakeyo, usamanya, uhulo; dieli la mi dia mpanga lakaye elo.

⁶ Ku ndi akahulo esadi, akulungula la ongenongeno.

⁷ Lamʼakawenyi dikambu diako, vo tshe wakangunanguna vati: Ndi ambutsho dia niuhanga laka untu a kolo.

⁸ Zakeyo akemala, akatela Khumadiondjo ati: Ulungi, dimi layusha akanga a weula etenyi ka hendi ka diango diami. Naka lakose engo uma le untu lʼumamanyia, dimi layuwukaluya diango nei nei.

⁹ Jesu akawutela ati: Panda kambuya lu luudu lone elo! ne dia ndu ndi keli kanula ya Abarahama.

¹⁰ Ne dia Onʼa untu akayi, dia ndjuyanga la ndjushimbela wane wakashisho.

Wela wa Mina Dikumi

¹¹ Lamʼakawukaka akambu aso, Jesu akahe diui, akawaukela wela, ne dia ndi aki lasuki la Jerusalema, ndu ne dia vo wakakani vati: Diulelu dia Unyashungu diayene esadi.

¹² Untu omotshi, kanga lukumu, akatshu lu kete kina yʼetali dia ntuyalungwela diulelu, ati: Kakaluli.

¹³ Ku ndi aketi ekambi andi dikumi, akawasha mina dikumi; akawattla ati Nyutshi la yo ukanda, edja ndu lamʼayumukalula.

¹⁴ Keli wudja andi wakuhetsha; wakatumi akendji lʼokongo andi vati: Shu hatulangi untu one ntulela.

¹⁵ Lʼokongo diku wa nungula diulelu, ku lamʼakandakalula, ndi akati ati: Nyeti ekambi eku wakamasha falanga, dia dimi mbeya diango diakamakundja waho lʼukanda.

¹⁶ One la ntundu akayi le ndi, akati ati: Khumadiondjo, mna kaye kambuta mina kina dikumi ladiku.

¹⁷ Ndi akawutela ati: Kawo, ve ukambi wʼololo! ne dia we akatanema la kolamelu lu diango diuleki tshitshe, uleli esumba dikumi.

¹⁸ One la hendi akayi, akawutela ati: Khumadiondjo, mina kaye kambuta mina kina tshanu.

¹⁹ Ndi akawutela ati: Ndu we, uleli esumba etanu.

²⁰ Ukina akayi, akati ati: Khumadiondjo, enda, mina kaye kene, kakamumbi lu tshambala.

²¹ Dimi lakakuki woma, ne dia we eko kanga ngala. We atototongonaka kene kakiye kunkitsha; ndu atunaka kene kakiye kumune.

²² Ndi akawutela ati: Uma lu aui aye, mbayumukamia, we ukambi a kolo! We akeyi wati: Dimi leko kanga ngala, latotongonaka lamʼakimi kunkitsha, ndu latunaka lamʼakimi kumune?

²³ Ya ukundi akiye kunkitsha lufalanga lami lu dihuli diʼesombanyelu, tshiki lutuyulosa kame la waho?

²⁴ Ku ndi akatela wane wakemadi lasuki ati: Nyokosole mina kandi, nyusha kanga mina dikumi.

²⁵ (Ku vo wakawutela vati: Khumadiondjo, ndi la mina dikumi!)

²⁶ Dimi lambunyutela nti: One leli a, wayuwusha; keli one laha la, wayokosola ndu kene keli la ndi.

²⁷ Keli atunyi ami waki kunanga dimi mbaulela, nyuwaela lindu, nyuyadiaki la ntundu kami.

Jesu Ambukuma la Jerusalema la Lutumbu

²⁸ Lamʼakashili Jesu mvuta aui aso, ndi aketi la ntundu utsha la Jerusalema.

²⁹ Lamʼakakumi Jesu lasuki la Betefange la Betaniya, lʼukungu wetawo vati: Ukungu wʼEweli, ndi akatumi ambeki ahendi,

³⁰ ati: Nyutshu la ngelu keledinyu. Lamʼayunyukuma leko, nyu nyayutana osongo a punda wahatahema untu, ukelekami. Kanyukelekuli, kanyuyi la wo.

³¹ Naka untu ayunyumbula ati: Dikambu kuna diukelekulanyu? Kanyuwuteli nyati: Khumadiondjo kuhumba.

³² Ku wane wakandatumi wakatshu, wakutani uku akandawatela.

³³ Lamʼakawakelekulaka osongo a punda, akanga awo wakawamnula vati: Dikambu kuna diakelekulanyu osongo a punda?

³⁴ Vo wakati vati: Khumadiondjo kuhumba.

³⁵ Ku vo wakayi la wo le Jesu. Vo wakahe ahondo awo ladiku dia osongo a punda, ku wakahemia Jesu.

³⁶ Lamʼakandatatshokaka, antu wakali ahondo awo lu mbuka.

³⁷ Lamʼakandasukana lasaki la Jerusalema, lʼuhulula wʼUkungu wʼEweli, ului wʼambeki tshe wakatatela ngenangena, la mandula Unyashungu, wahangohango ne dia akambu wa mamba tshe wakawenyi.

³⁸ Vo wakati vati: Khumʼekanga luyi lu lukumbu la Khumadiondjo, atumbwami! Ki kayali lʼulungu, la lutumbu layali ladiku dia ulungu!

³⁹ Afarise amotshi uma lʼului wʼantu wakawutela vati: Umbetsha, uhangweli ambeki aye.

⁴⁰ Ndi akâkaluya diui ati: Dimi lambunyutela nti: Naka vo wayolembohala, ave wayuhangohango.

Jesu Ambulelela Jerusalema

⁴¹ Lamʼakasukana Jesu, ndi akenyi usumba, akulelela.

⁴² Ndi akati ati: Utuyeya weme lu lushi lʼelo, akambu watutungaka ki li! Keli kakiane, akambu ako wambushama uma lu ashu aye,

⁴³ ne dia nshi yayuyala le ye, yayukutshimela atunyi aye lungeli. Vo wayukutshimba, wayukukhuka.

⁴⁴ Vo wayukuhumanya la kete, ndu we ndu anʼaye weli lʼatei aye. Vo hawutshika dive ladiku dia dikina lʼatei aye, ne dia we heyi etena kayukokendela akambu aso.

Jesu Ambolongosola Etemwelo

⁴⁵ Jesu akoto lʼetemwelo, akatatela mbitshanya waku wakasundjaka diango.

⁴⁶ Ndi akawatela ati: Ambufundama ati: Luudu lami layuyala luudu la dombelo, keli nyu nyambuluhiluya wuku wʼapotodi.

⁴⁷ Jesu aketshaka antu la lushi la lushi lu etemwelo. Keli elombedi a waki la afundji la dihangamendi wakayangi mbudiaka.

⁴⁸ Keli vo kumbeya ntsna nduku dikambu, ne dia antu wakumamema, wakahukamaka aui andi.