Luka 17 - La Bible en Otetela (Bible K'Ekila) 1991

Dia Akambu wa Ntakanya Antu

¹ Ku Jesu akatela ambeki andi ati: Mete, akambu wa ntakanya wayuya; keli fono kayayi le untu latunga akambu ako!

² Uleki ololo dia ndi nkelekama dive diʼohelo lu kingu, la ntambiyama lʼuduwa, uleki ndi ntakanya kiendakenda motshi.

³ Nyuyalamaki. Naka unyaye ayutsha kolo, ulaki. Naka ndi ayukadimula utema, udimanyia.

⁴ Naka ndi ayukutshela kolo etshela esambeli lushi otoi, ndu lamʼayundukalula le ye ekalula esambeli, ati: Lambukadimula utema; kudimanyia.

Dia Mbetawo

⁵ Atumami wakatela Khumadiondjo vati: Ufudia mbetawo kasu.

⁶ Khumadiondjo akati ati: Utunduyala nyu la mbetawo uku lotongo la lohodia, tshiki nyu mbeyaka mvutela utamba one wa lukhumu nyati: Ukhundwami, unemi lʼuduwa, ku vo mbeyaka nyukitanyia.

⁷ Keli untu akona lʼatei anyu, leli la ukambi lakamba kana lalama ekoko, lamʼayuya ukambi uma lʼekambo, ku ndi ayuwutela ati: Utadjashi, utali ma?

⁸ Ndi hawutela ati: Onongoswele diango dia dimi nde, olote uya, unkambeli ulimu, edja ndu lamʼayumushila nde la no, ku lʼokongo diku we ayole, ayono?

⁹ Undi, ndi ayuka ukambi uku lusaka ne dia ndi akatshi akambu wakandosengola?

¹⁰ Okone ndu nyu, lamʼayunyushidiya ntsha paka akambu tshe wakawanyosengola, kanyuti nyati: Ekambi wʼanyanya mbesu. Shu tambutsha akambu waki la su dia ntsha.

Usi Samariya Kanga Sudi

¹¹ Lamʼakawatatshokaka lu mbuka utsha la Jerusalema, Jesu aketi lʼasa Samariya la Ngalili.

¹² Lamʼakandakumi lu ngelu kemotshi, apami dikumi akanga a sudi wakahumana la ndi. Vo wakemala tshalula.

¹³ Ku vo wakuwelela vati: Jesu, Uwandji, utuki ketshi!

¹⁴ Lamʼakandawaenyi, ndi akawatela ati: Nyutshu, nyutuyaenya le elombedi. Lamʼakawatatshokaka, vo wakakono.

¹⁵ Lamʼakenyi otoi awo omotshi ati: Dimi lambokono, ndi akakalula, ayatumbula Unyashungu la diui dia wulu.

¹⁶ Ndi akayakosha lʼekulu wa Jesu, akawuki lusaka. Usi Samariya kakindi.

¹⁷ Jesu akûkaluya diui ati: Aha antu dikumi mbokonwe, keli, lendʼeli divwa?

¹⁸ Nduku untu ukina lukaludi dia ndjutumbula Unyashungu, tshikima ongendangenda one?

¹⁹ Ndi akawutela ati: Eto, utshu. Mbetawo kaye kambukokonoya.

Eyelu ka Diulelu Dia Unyashungu

²⁰ Lamʼakambula Afarise Jesu vati. Etena kakona kayuya diulelu dia Unyashungu? Ndi akakaiuya diui ati: Diulelu dia Unyashungu hadiuyayi la tulimbitelu tʼantu mbeya.

²¹ Ntu, vo hawuta vati: Enda, dio ne lane! kana ati: Dio diku leku! Keli diulelu dia Unyashungu dieko lʼetema anyu.

²² Ku Jesu akatela ambeki andi ati: Nshi yayuya, lamʼayunyulanga mena lushi otoi uma lu nshi ya Onʼa untu, ku hanyulenyi.

²³ Antu wayunyutela vati: Enda, lene! kana ati: Enda lane! Tanyutshokaki, tanyayelaki.

²⁴ Uku atungadimoka dingadimu dia ndjadi lu leki lomotshi lʼulungu ku dio menama lu leke lukina lʼulungu, wuhu ako mbayuyala Onʼa untu lu lushi landi.

²⁵ Keli la ntundu, dieli la ndi dia nsuwa esuwa efula la ntunama le wa lu loiunga lone.

²⁶ Uku akayala lu nshi la Noa, mbayuyala lu nshi ya Onʼa untu.

²⁷ Vo wakalekaka, wakanokaka, wakatshukaka, wakatshukamaka edja ndu lushi lakoto Noa lu watu a luudu, ku elula kakayi, kakadiaki tshe.

²⁸ Wuhu ako mbakayala ndu lu nshi ya Lota — vo wakalekaka, wakanokaka; wakasumbaka, wakasundjaka; wakuneka, wakahikaka mvudu.

²⁹ Keli lushi lakatshu Lota uma la Sodoma, dja ya tsho yakahulo uma lʼulungu, yakadiaki vo tshe —

³⁰ wuhu oso mbayuyala lushi layushwama Onʼa untu.

³¹ Lu lushi lako, naka untu eko ladiku dia luudu, la diango diandi dieko lʼetei, ndi takitaki dia ntuditundja; pupu ndu le untu leli lʼekambo, ndi takalulaki.

³² Nyuho wadi a Lota.

³³ Untu tshe layanga nkundja lumu landi, ayulushisha. Keli untu tshe lashisha lumu landi, ayulushimbela.

³⁴ Dimi lambunyutela nti: Utshu oso, apami ahendi wayuyala lu tangi: wayosa omotshi, wayutshika ukina.

³⁵ Amantu ahendi wayohela diango kame: wayosa omotshi, wayutshika ukina.

³⁶ Apami ahendi wayuyala lʼekambo: wayosa omotshi, wayutshika ukina.

³⁷ Vo waktikaluya diui vati: Khumadiondjo, lendi na? Ndi akawatela ati: Lenʼeli udu, katusanganaka wapungu.