Luka 14 - La Bible en Otetela (Bible K'Ekila) 1991

Jesu Ambokonoya Untu Lushi lʼEkila

¹ Lushi lʼekila lomotshi, lamʼakoto Jesu lu luudu la umbuledi omutshi wʼAfarise dia ntole ma, Afarise wakokeshanya.

² Untu omotshi aki la ntundu kandi la hemo ka khuta.

³ Jesu akambula ambeyi wʼelembe la Afarise ati: Nkonoya untu lushi lʼekila eko ekila, kana kema?

⁴ Keli vo wakatshikala ki. Ku ndi akawose, akokonoya, akukimo.

⁵ Ku Jesu akawambula ati: Untu akona lʼatei anyu, ayuyala la punda kana ngombe, lamʼayutoko lu difuku diʼashi, ku ndi hakitundja esadi lushi lʼekila?

⁶ Vo kumbeya mbukaluya diui ntu lu akambu ako.

Daku le Angendangenda lu Alambu

⁷ Jesu akukela wane wakawaeti lu ma wela lamʼakandenyi wuyasonwela die dia nemo. Ndi akawatela ati:

⁸ Lamʼaketa untu lu dambu dia diwala, tudjaseki lu edie ka nemo, ne dia, undu, ndi aketshi untu omotshi lukuleki nemo.

⁹ Ku one lakaketshi we la ndi, ayukutela ati: Utshikeli untu one dihuli, ku we ayuleka mbosa dihuli diuleki nkitakita la sonyi.

¹⁰ Keli lamʼaketawo, utshu, utudjase lu dihuli diuleki nkitakita. Ku lamʼayuya one lakaketshi, ndi mbeyaka nkutela ati: Ongenyi, umbeli. Ku we ayuyala la lutumbu lu ashu wʼantu tshe wudjashi la ye wale ma.

¹¹ Ne dia tshe layambiya, ayukitshakitshama; one layakitshakitsha, ayumbiyama.

Daku le Akanga a Mvudu

¹² Jesu akatela ndu one lakaweti ma ati: Lamʼayuyukate ma dia midi kana dia dikolo, tetaki engenyi aye, ananyo, kana asi khumbu kaye, kana asukanyi weli akanga wʼengonyi, vo watukuyuketa ndu vo, ndu watukuyulemanya la ye.

¹³ Keli lamʼayuyukatela antu dambu, keti akanga a weula, dikomo, tshumbi, la tutshungu.

¹⁴ Ku we ayotshokwama, ne dia vo kema la diango dia nemanya la ye. Vo wayukukaluyadio lu eulwelu kʼantu wʼololo uma lu nyoi.

Wamboseka Ndja lu Ma Dia Dikolo

¹⁵ Lamʼakuki untu omotshi lakadjashi la ndi lamʼakawalekaka ma aui aso, ndi akatela Jesu ati: One layole ma lu diulelu dia Unyashungu, eko la otshoko!

¹⁶ Keli Jesu akawutela ati: Untu omotshi akakate ma dia wuki dia dikolo, ndi aketi antu efula,

¹⁷ Lʼetena ka ma dia dikolo, ndi akatumi ekambi andi, dia ntutela wane wakandeti ati: Nyuyi, kakiane diango tshe diambolongoswama.

¹⁸ Keli vo tshe wakatatela nsakosako: untu lʼuntu akalombe edimanyelu. La ntundu akawutela ati: Dimi lambusumba ekambo. Dimi mpumbaka ntsho dia ntukiena, mbakolombami nti: Unyimanyia.

¹⁹ Ukina akati ati: Dimi lambusumba ngombe dikumi, hyendi hyendi lu lokoho. Dimi nangaka ntuyenda, mbakolombami nti: Unyimanyia.

²⁰ Ukina akati ati: Dimi lambutshuka wadi, okone haleyi ntsho.

²¹ Ukambi oso akayi, akayutela uwandji andi akambu ako. Ku kanga luudu akumala kele, akatela ukambi andi ati: Utshu lu esese la lu tuwuka ta lʼusumba, kuyi la akanga a weula, la dikomo, la tutshungu, la tshumbi.

²² Ukambi akati ati: Khumadiondjo, ambutshama uku utshiye, keli luudu lekiko hwe.

²³ Uwandji akatela ukambi ako ati: Utshu lu esese la lu kumbu yʼetamba, kututshutshiya antu la wulu dia vo mboto, luudu lami laluli.

²⁴ Ne dia dimi lambunyutela nti: Nduku otoi wʼapami aku wakametshi, ayunganela ma dia dikolo.

Ndjala Umbeki Aha Dikambu Dia Tshitshe

²⁵ Elui a waki wʼantu wakatatshokaka la Jesu. Ndi akasikiso, akawatela ati:

²⁶ Naka untu ambuya le mi, ku ndi hahetsha shi, la nyangu, la wadi, la ana, la anangu, la akadiyendi, ee, ndu lumu landi, keti ndi heyi ndjala umbeki ami.

²⁷ Untu tshe lahembe utamba andi a mpeketanya dia ndjelami, ndi heyi ndjala umbeki ami.

²⁸ Untu akona lʼatei anyu, lamʼalangandi mpika luudu lʼetangelu, ku hatadjashi dia ntediki ushinga, kana ndi la diango dia nkuka lushidiya?

²⁹ Lamʼambunduhika etshina, ku ndi kema la wulu wa lushidiya, wane tshe wayenda, wayutatela mbosoka.

³⁰ Vo wayuta vati: Pami kene akatatela mpika luudu, keli ndi kumbeya lushidiya.

³¹ Kana, khumʼekanga kakona, lamʼayundutsho dia ntolosha khumʼekanga kekina, hatadjashi dia ntakanyi yimba, kana ndi la antu andi nunu dikumi, weko la wulu wa mpumana la ukina layayi le ndi la antu nunu akumi ahendi?

³² Kuku kana lamʼeki ukina etali, ndi ayutumela akendji la ntuwumbula akambu wa vo ndjala ki.

³³ Okone untu tshe lʼatei anyu lahaseke kene tshe keli la ndi, ndi heyi ndjala umbeki ami.

³⁴ Leho leko ololo, keli naka leho lambusuwo, la na ayunyulete mpe ntu?

³⁵ Lo kema ololo dia mbidja lu kete kana lu diala: wayulukadja lʼandja. One leli la atui wa mbuka, uki.