Luka 13 - La Bible en Otetela (Bible K'Ekila) 1991

Antu Wakadimuli Etema

¹ Antu amotshi waki leko etena kako, wakatela Jesu vati: Pilata akasanganya dikila diʼasi Ngalili amotshi la dia nyama yawo yakawadiakela Unyashungu.

² Ku ndi akâkaluya diui ati: Nyu nkanaka nyati: Asi Ngalili aso waki antu wa kolo ndeka asi Ngalili tshe, ne dia vo wakasuwi wuhu oso uka?

³ Dimi lambunyutela nti: Kema. Keli naka nyu hanyukadimula etema, nyu tshe nyayuvo wuhu ako.

⁴ Ndu antu aku dikumi la enanei, ane wakavu lamʼakanyukwela luudu lʼetangelu la Siloama, nyu nkanaka nyati: Vo waki atshi wa kolo ndeka antu tshe watuyalaka la Jerusalema?

⁵ Dimi lambunyutela nti: Kema. Keli naka nyu hanyukadimula etema, nyu tshe nyayuvo wuhu ako.

Utamba a Fingu Wahato Elua

⁶ Jesu akuki wela one ati: Untu omotshi aki la utamba a fingu lʼekambo kandi kʼelua. Ndi akayi dia ndjuyanga elua loko, keli ndi kuntana.

⁷ Ku ndi akatela ohehi wʼekodi ati: Enda, deku satu ne mbatumuyakaka dia ndjuyanga elua lʼutamba one a fingu, keli halatani. Okote; ukundi osawo dihuli la kete wososa?

⁸ Ndi akûkaluya diui ati: Khumadiondjo, utshiki ndu eleku kene, edja ndu dimi lambufunda kete la tshina, la nkitsha tumi.

⁹ Naka vo ayoto elua eleku kayayi, ku kawo; keli naka hatwe, we mbeyaka ndjokota.

Jesu Ambuyindja Ekonwelo ka Lushi lʼEkila

¹⁰ Ndi aketshaka antu lʼetemwelo kemotshi lushi lʼekila.

¹¹ Nyulungi, umuntu omotshi, laki la odienge wakawete ekomo deku dikumi la enanei, aki loko. Ndi akakutama kuta, kumbeya nkuto nduku yema.

¹² Lamʼakawenyi Jesu, ndi akaweti; akawutela ati: Umuntu, we ambutshungo uma lu ekomo kaye!

¹³ Ku ndi akawahe anya. Kemʼedja, umuntu akakuto; akatumbula Unyashungu.

¹⁴ Keli umbuledi wʼetemwelo akuki kele ne dia Jesu akakonoya untu lushi lʼekila. Ndi akatela ului wʼantu ati: Nshi shamalu yeko, yahumba antu ntsha elimu awo. Okone lu nshi sho, kanyuyakaki, kanyuyokonwamaki, keli aha lushi lʼekila.

¹⁵ Ku Khumadiondjo akûkaluya diui ati: Nyu akanga a lukesu! untu akona lʼatei anyu ahatshungula ngombe kana punda kandi uma lʼelelu, la nkilombola utsha lʼashi lushi lʼekila?

¹⁶ Umuntu one, kanula yʼAbarahama, lakakeleka Satana deku ne dikumi la enanei, taki ololo ndi nkelekwama uma lu dimama ne lushi lʼekila?

¹⁷ Lamʼakandati akambu aso, atunyi andi tshe wakalombo la sonyi. Ului tshe wʼantu wakangenangena, ne dia akambu tshe wa lutumbu wakandatshi.

Lotongo la Lohodia

¹⁸ Ku Jesu akati ati: Diulelu dia Unyashungu dieli uku na? Dimi layudifanya la na?

¹⁹ Dio dieko uku lotongo la lohodia lakose untu, lakanduki lʼekambo kandi. Lo lakuli, lakayala utamba. Fudu ya lʼulungu yakahema lu tahi yalo.

Edya

²⁰ Jesu akati ntu ati: La na ayumufanya diulelu dia Unyashungu?

²¹ Dio dieko uku edya, kakose umuntu, kakandashe lu tediko tusatu ta shima, edja ndu to kakakukanela la shima tshe.

Suku Dia Tshitshe

²² Jesu akakindula lu esumba ndu lu wangelu, akatetshaka antu, lamʼakandatetaka utsha la Jerusalema.

²³ Untu omotshi akawumbula ati: Khumadiondjo, antu tshitshe mbayushimbamela? Ndi akawutela ati:

²⁴ Nyukalangani dia mboto lu suku dia tshitshe; ne dia dimi lambunyutela nti: Antu efula wayulanga mboto loko, keli vo hawuyala la wulu wa mboto.

²⁵ Lamʼayeto kanga luudu, lamʼayundudiha lukuki, nyu nyayutatela memala lʼandja. Nyu nyayokokola lu lukuki, nyayuta nyati: Khumadiondjo, utudihula. Ku ndi ayunyukaluya diui ati: Dimi haleyi uma lendi uyenyu.

²⁶ Ku nyu nyayutatela mvuta nyati: Shu takalekaka, takanokaka lu ashu aye; we aketshaka antu lu esese asu.

²⁷ Ndi ayuta ati: Dimi lambunyutela nti: Haleyi uma lene uyenyu. Nyumo uma la le mi, nyu atshi wa kolo tshe!

²⁸ Nyu nyayulela, nyayokeketanya wanyu leko, lamʼayunyena Abarahama, Isaka la Jakoba, ndu amvutshi tshe lu diulelu dia Unyashungu, ku nyu nyame nyayukadjema lʼandja.

²⁹ Antu wayuya uma lu leke lʼehutwelu ndu uma lʼedjelu ka unya, uma lu leke la ngelʼa kushi ndu uma la diku dia kushi, wayudjase lu diulelu dia Unyashungu.

³⁰ Nyulungi, antu amotshi weli lʼokongo, wayuyala la ntundu; la amotshi weli la ntundu, wayuyala lʼokongo.

Jesu Ambulelela Jerusalema

³¹ Lu unya ako, Afarise amotshi wakayi, wakatela Jesu vati: Utshu, umo uma lindu, ne dia Herode nangaka kudiaka.

³² Ku ndi akawatela ati: Nyutshu, nyututeli mbulu keso nyati: Elo la lui, dimi layutundja edienge, layokonoya antu, ku lushi la satu dimi layushidiya ulimu ami.

³³ Keli dieli la mi dia ntsho la mbuka kami elo la lui la ledia lui, ne dia umvutshi heyi mvo amakina, tshikima la Jerusalema.

³⁴ Yee! Jerusalema, Jerusalema, latudiakaka amvutshi, latukaka wane watuwukutumelaka ave li! Ndi tena efula diakamalangi nsanganya anʼaye, uku atusanganyaka wali a koko anʼato la tshina diʼahafu ato, ku nyu kunanga li!

³⁵ Enda, khumbu kanyu kambukalema. Dimi lambunyutela nti: Nyu hanyuyomena ntu, edja ndu lamʼayunyuta nyati: One layayi lu lukumbu la Khumadiondjo, eko la otshoko.