Luka 12 - La Bible en Otetela (Bible K'Ekila) 1991

Jesu Ambulaka Ambeki

¹ Lu unya oso, lamʼakamote antu nunu nunu, edja ndu wakakamanela lʼekulu, Jesu akatatela mvutela ambeki andi ati: Nyewo edya ka Afarise, kako keli lukesu

² Nduku kene kambukumbama, kahakumbwama. Nduku kene kambushama, kaheyama.

³ Okone akambu tshe wakanyati lu udjima, wayukema lu usasi. Akambu wakanyataka hyotehote lu mvudu ya lʼetei, wayuwelelama lʼete a mvudu.

⁴ Dimi lambunyutela, nyu wane weli engenyi ami, nti: Tanyukaki wane wadiaka alimba woma, ku lʼokongo haweyi ntsha dikambu dikina.

⁵ Keli dimi layunyewula ona lahumbanyu mbuka woma: nyuki one leli la wulu wa mbikadja antu lu luwinga la dja lʼokongo a mbadiaka woma; ee, dimi lambunyutela nti: Nyuwuki woma!

⁶ Hawutusundjaka tufudu tutanu akuta ahendi? Keli nduku otoi ato atuhamameka lu ashu wa Unyashungu.

⁷ Ndu weondji wa divu dia lʼete anyu wambalema tshe. Tanyukaki woma: nyu nyambuleka tufudu efula ushinga a wulu.

⁸ Dimi lambunyutela nti: Untu tshe layumbetawo la ntundu kʼantu, ndu Onʼa untu ayuwetawo la ntundu ka andjelo wa Unyashungu.

⁹ Keli untu layumanguna la ntundu kʼantu wayuwanguna lu ashu wa andjelo wa Unyashungu.

¹⁰ Untu tshe lateketa diui dia kolo lu dikambu dia Onʼa untu, wayudimanyia. Keli untu latenga Nyuma kʼOlolo, hawudimanyia.

¹¹ Lamʼayuwuya la nyu la ntundu ka temwelo, la embuledi, ndu dihangamendi, tanyuyakananyaki nyati: Ukundi ayutukaluya diui, kana aui akona wayututa?

¹² ne dia Nyuma kʼOlolo ayunyetsha aui wayunyuhumba mvuta lu unya oso.

Jesu Ambuwaewula Dia Okomiya wa Diango

¹³ Untu omotshi lʼului wʼantu akawutela ati: Umbetsha, uteli onalingu akahani la mi sangu.

¹⁴ Keli ndi akawumbula ati: Pami, akankitsha umbadi kana ukahi ladiku dianyu?

¹⁵ Ku ndi akawatela ati: Nyendi, nyewo okomiya wa diango tshe; ne dia lumu la untu haluyala ne dia efula ka diango dieli la ndi.

¹⁶ Ku ndi akawauki wela ati: Kete ya kanga ongonyi omotshi yakangonya diango efula.

¹⁷ Ku ndi akakani yimba lʼutema andi ati: Kayumutsha na, ne dia dimi kema la lama mumba diango diami dia dinela?

¹⁸ Ku ndi akati ati: Dimi layutsha okone: layuhandjula apenge ami, layuhika akina wuleki waki. Ku dimi layumba diango diami dia ninela la diango diami tshe loko.

¹⁹ Ku layutela utema ami nti: Utema, we la diango efula diumbami dia deku efula. Ukaki olo, olekaki, onokaki, ongenangenaki.

²⁰ Keli Unyashungu akawutela ati: Enginya li! Wayolomba utema aye lʼutshu wʼelo one. Ku diangodiakayalongosola diayuyala diaki na?

²¹ Osoku mbeli untu layaumbela diango, laha la ukundji le Unyashungu.

Dia Ndjakananya; Eumbelu ka Mete

²² Ku Jesu akatela ambeki andi ati: Okone mbanyutelami nti: Tanyuyakananyaki dia nyumu yanyu nyati: Ayutole na? kana dia alimba anyu nyati: Ayutolota na?

²³ ne dia lumu lambuleka mbu ya nde, dimba diambuleka ahondo.

²⁴ Nyendi angwangwa: vo hawutuneka, hawutunaka. Vo kema la eunibelu kana dipenge. Unyashungu atuwashaka mbu ya nde. Ndi nemo dia mamba dienyu, ndeka fudu efula li!

²⁵ Untu akona lʼatei anyu, lamʼayunduyakananyu, ku ndi ntalula utali a nshi ya lumu landi kubita otoi?

²⁶ Okone naka nyu hanyeyi ntsha dikambu dia tshitshe, okoko wana wayakananyanyu dia akambu akina?

²⁷ Nyendi alembo, uku wulawo; vo hawukambi ulimu, hawutshi ahondo. Keli dimi lambunyutela nti: Kuyanga Solomona lu lutumbu landi tshe, kondota uku dembo dimotshi lʼatei awo.

²⁸ Keli naka Unyashungu atolotshaka adiyu wa lʼusui, weko elo, ku lui wayukadjema lu atshuka, ndi huleka nyolotsha, nyu akanga a mbetawo ka tshitshe?

²⁹ Tanyuyangaki kene kayunyole kana kayonyono; tanyuyakananyaki.

³⁰ Ne dia wedja wa la kete watuyangaka diango so tshe, keli Shenyu mbeyaka ati: Nyu nyatudihumbaka.

³¹ Keli nyutayangi diulelu diandi, ku ndu diango so tshe diayuyala dianyu.

³² Tanyukaki woma, nyu limba la tshitshe lʼekoko, ne dia Shenyu nangaka nyusha diulelu.

³³ Nyusundja dieli la nyu; nyusha antu diango la ketshi. Nyuyatsheli atapa wahuyala emusu, la eumbelu lʼulungu kahashili, lene ahatusukanaka uvi, lene ahatulanyaka yumumbu.

³⁴ Ne dia tenʼeli eumbelu kanyu, kayuyala ndu etema anyu.

Antu Wasenaki

³⁵ Nyolote eya lu kindi yanyu; nyohetsha atala anyu.

³⁶ Nyame nyuyali uku antu walungamela khumewo lamʼayundukalula uma lu dambu dia diwala. Okone lamʼayunduya, lamʼayundokokola, wayudihula esadi.

³⁷ Ekambi ako wayuyala la otshoko lamʼayuya khumewo, lamʼayundatana wasena. Mete kanyutelami nti: Ndi ayolota uya, ayuwadjasha lu mesa. Ndi ayuya, ayakambela ulimu.

³⁸ Naka ndi ayuya lʼesenelo ka hendi, kana ka satu, lamʼayundatana osoku, vo wayuyala la otshoko.

³⁹ Keli nyu mbeyaka nyati: Kanga luudu, utundeya unya wayuya uvi, tshiki ndi akasene, tutundutshika luudu landi, dia vo lutundula.

⁴⁰ Ndu nyu nyuyalongosole, ne dia Onʼa untu ayuya lu unya wahanyalungamela.

Ekambi wa Kolamelu la Ekambi wa Uhedia

⁴¹ Petero akambula Jesu ati: Khumadiondjo, shame mbukediye wela one, kana antu tshe?

⁴² Khumadiondjo akati ati: Ulami akona weli la kolamelu la yimba, wayukitsha uwandji andi ladiku dia wa lu luudu landi, dia mbakahelaka mbu ya nde lu tena diayo?

⁴³ Ukambi oso ayuyala la otshoko lamʼayuya uwandji andi, lamʼayundutana atsha osoku.

⁴⁴ Mete kanyutelami nti: Ndi ayukitsha ladiku dia kene tshe keli la ndi.

⁴⁵ Keli lamʼayuta ukambi ako lʼutema ati: Uwandji ami huya esadi; lamʼayundutatela nkomola ekambi wʼapami la ekambi wʼamantu, la ndekaka, la nokaka, la mbidjoka wanu,

⁴⁶ uwandji wʼukambi oso ayuya lu lushi lahandulungamela, ndu lu unya wahandeyi. Ndi ayuyokomola wulu, ndu ayuyukitsha lu leke lʼakanga wʼuhedia.

⁴⁷ Ukambi ako, lakeyi uku akalangi uwandji andi, laki konongosola diango diandi, laki kuntsha lulangu la uwandji andi, ayokomwama efula.

⁴⁸ Keli one laki kumbeya, lakatshi akambu wukuki nkomwama, ndi ayokomwama yema tshitshe. Untu tshe lambuwusha diango kambi, ayolomba efula. La untu tshe layuwukimiya diango kambi, wayolomba diango diuleki efula.

Dikambu Dia Jesu Diambatanya Antu

⁴⁹ Dimi lakayi dia ndjudja dja la kete. Keli kayumutsha naka yo yambohetaka?

⁵⁰ Dimi leko la batiza, ka dimi mbatizama. Ndu dimi leko la dikambu dia wuki edja ndu to kambushidiyama!

⁵¹ Nyu nyambukana nyati: Dimi lakayi dia ndjusha antu ki la kete? Dimi lambunyutela nti: Kema. Dimi lakayi dia ndjatanya antu.

⁵² Umaka kakiane, antu atanu wa lu luudu otoi wayatana: asatu lene, ahendi lene; ahendi lene, asatu lene.

⁵³ Vo wayatana: shi la ona pami, ona pami la shi; nyangu la ona umuntu, ona umuntu la nyangu; ukilu a umuntu la olokayi andi.

Tulimbitelu ta Nshi Nye

⁵⁴ Ndi akatela elui wʼantu ntu ati: Lamʼatunyenaka dingi diatambela lu leke lʼehutwelu ka unya, nyu nyatutaka esadi nyati: Mvula kuyayi, ku to katuyaka.

⁵⁵ Lamʼatunyenaka lopepe uma lu leke la diku dia kushi, nyu nyatutaka nyati: Umbi ka wulu; ku atuyalaka osoku.

⁵⁶ Nyu akanga a lukesu, nyu mbeyaka nimbitela elundji ka kete la ka ulungu, keli ukundi ahanyalimbitela akambu wʼetena kene?

⁵⁷ Okoko wana wahanyayalumbuya kene keli ololo?

⁵⁸ Lamʼayuyutsho la ufundji aye utsha le unumbushi, utashidisha la ndi lu mbuka, ne dia ndi atukutukotola le umbadi, la umbadi ntukukimo le ulami, ku ulami ntukudja lu luudu la lukanu.

⁵⁹ Dimi lambunyutela nti: We hatumbi uma loko, tshikima we ambufuta dikuta dia ndjihelu.