Luka 10 - La Bible en Otetela (Bible K'Ekila) 1991

Jesu Ambudianganya Ambeki Akumi Esambeli

¹ Lamʼaketi akambu aso, Khumadiondjo akasonola akina akumi esambeli, akatumi ahendi ahendi la ntundu kandi lu esumba tshe ndu lu ahuli tshe wakandalangi ntsho.

² Ndi akawatela ati: Dinela dieko efula, ken ekambi mbeli tshitshe; okone nyolombe uwandji a dinela, dia nyutumela ekambi lu dinela diandi.

³ Nyutshu, enda, lambunyutuma uku ana wʼekoko lʼatei a ndjaundu.

⁴ Tanyukimelaki tapa kuyanga diutu, kuyanga sabata. Tanyemulaki untu lu mbuka

⁵ Lu luudu tshe layunyoto, kanyuti ntundu nyati: Ki kayali lu luudu lone!

⁶ Naka onʼa ki eko loko, ki kanyu kayusambela le ndi. Naka kema, ki kanyu kayukalula le nyu.

⁷ Kanyutshikali lu luudu lako. Kanyolekaki, kanyonokaki kene kayuwunyushaka, ne dia ukambi kukuki dia nkundja difutu diandi. Tanyetetaki lu luudu la luudu.

⁸ Lʼusumba tshe wayunyukuma, lamʼayuwunyulungula, kanyuli diango diayuwukitsha la ntundu kanyu.

⁹ Kanyokonoya akanga a hemo weli loko; kanyuwateli nyati: Diulelu dia Unyashungu diaya suki la nyu.

¹⁰ Keli lʼusumba tshe wayunyoto, naka akanga a ngelu hawunyulungula, kanyutshu lʼesese ato, kanyuti nyati:

¹¹ Ndu ditshu dia lʼusumba anyu, diakakakatedi lʼekulu asu, tambunyukitweladio. Keli nyulimbiteli nyati: Diulelu dia Unyashungu diambusukana.

¹² Dimi lambunyutela nti: Lushi loso, fono ka usumba oso ayuleka ka Sodoma.

¹³ We Korazina, fono kayayi le ye! We Betesayida, fono kayayi le ye! Utunduyala akambu wa wulu wakatshama lʼatei aye, mbakatshama la Tura la Sidona tshiki vo wambukadimulaka etema edjedja, wudjashi lu akutu la lʼetuku!

¹⁴ Keli lʼelumbwelu, fono kanyu kayuleka ka Tura la Sidona.

¹⁵ Ndu we, Kaperenauma, wayukumbiya lʼulungu uka? Wayukuhuluya utsha lʼUdimu a Pengandu.

¹⁶ One lanyukela, ambumbukela; one lanyutuna, ambuntuna; one lantuna, ambutuna one lakantumi.

Ambeki Akumi Esambeli Wambukalula

¹⁷ Akumi esambeli ako wakakalula lʼongenongeno. Vo wakati vati: Khumadiondjo, ndu edienge wambutolembela lu lukumbu laye.

¹⁸ Ku ndi akawatela ati: Dimi lakenyi Satana ako uma lʼulungu uku dingadimu.

¹⁹ Nyulungi, dimi lambunyusha wulu wa mbikamela elui la kutu, ndu ladiku dia wulu tshe wʼutunyi. Nduku engo kayunyutshela kolo.

²⁰ Keli tanyongenangenaki ne dia edienge wambunyukela, nyongenengene ne dia kumbu yanyu yambufundama lʼulungu.

Jesu Ambongenangena

²¹ Lu unya oso, Jesu akangenangena le Nyuma kʼOlolo. Ndi akati ati: Papa, Uwandji wʼulungu la kete, lambukandula, ne dia we akashe akambu ane le akanga a tumba la ewu, ku ambuwashula le tokendakenda. Ee, Papa, ne dia wuhu uku mbaki lulangu laye la ngandji ka mamba!

²² Papa ambukimwela diango tshe. Nduku untu leya Ona, tshikima Papa. Ndu nduku untu leya Papa, tshikima Ona, ku Ona ayuwenya untu tshe lalangandi.

²³ Ku ndi akasikiso le ambeki, akawatela lu sheki ati: Ashu wena akambu wenanyu, weko la otshoko,

²⁴ ne dia amvutshi efula la khami ya dikanga wakalangi mena akambu wenanyu, ku vo kumbaena; wakalangi mbuka akambu wukanyu, ku kumbauka.

Usi Samariya lʼOlolo

²⁵ Ulungi, umbeyi wʼelembe omotshi akemala, akahimbi Jesu ati: Umbetsha, ayumutsha na dia nkita lumu la pundju?

²⁶ Jesu akawumbula ati: Kufundami lʼelembe na? Ukundi atuyalaka na?

²⁷ Ndi akûkaluya diui ati: Ulangi Khumadiondjo, Unyashungu aye, lʼutema aye tshe, ndu la lumu laye tshe, ndu la wulu aye tshe, ndu la yimba yaye tshe; la ulangi unyaye, uku ayalangaye.

²⁸ Ndi akawutela ati: Kawo kataye. Utshaki osoku, ku we ayuyala la lumu.

²⁹ Keli ndi akalangi ndjayindja; akambula Jesu ati: Akona eli unyami ako?

³⁰ Jesu akûkaluya diui ati: Untu omotshi akatatshokaka uma la Jerusalema utsha la Jeriko. Ndi akoto lu anya wʼapotodi. Vo wakukula ahondo, wakokomola, wakatshu, wakutshiki afunda lasʼeku la nyoi.

³¹ Olombedi omotshi akatatshokaka lu mbuka keso, lamʼakandawenyi, ndi aketi lʼokenge ukina.

³² Ndu usi Lewi pupu, lamʼakandakumi lu dihuli so, lamʼakandawenyi, ndi aketi lʼokenge ukina.

³³ Keli usi Samariya omotshi, lakatatshokaka lu lokendo, akakumi lu dihuli diakindi. Lamʼakandawenyi, ndi akangasana la ketshi.

³⁴ Ndi akasukana la le ndi, akawombe puta, akatela iso la wanu loko. Ku ndi akawahe lu nyama kandi, akayi la ndi lu pangu kʼangendangenda.

³⁵ La wedi a pindju, ndi akatundja denariyo pendi, akasha kanga pangu, akati ati: Ulamaki. Lamʼayumukalula, dimi layukufuta kene tshe kayuyushisha lu dikambu diandi.

³⁶ Le untu lakoto lu anya wʼapotodi, akona akanaye, akayala unyandi lʼatei wʼantu aso asatu?

³⁷ Ndi akati ati: One lakawuki ketshi. Jesu akawutela ati: Utshu, ututshi pupu.

Mata la Mariya

³⁸ Lamʼakawatatshokaka lu mbuka, Jesu akakumi lu ngelu kemotshi. Umuntu omotshi, lukumbu landi Mata, akulungula lakandi.

³⁹ Ndi aki la onangu a umuntu, lukumbu landi Mariya, lakadjase lʼekulu wa Khumadiondjo, ahukama diui diandi.

⁴⁰ Keli Mata akakanana la ulimu efula, ku ndi akayi le Jesu; akawumbula ati: Khumadiondjo, we heyi wati: Onalingu akantshikedi ulimu dime? Telandi ayi la ndjunkimanyia.

⁴¹ Keli Jesu akûkaluya diui ati: Mata, Mata, we ambuleka ndjakananya la ndjahenyahenya diʼakambu efula,

⁴² keli dikambu otoi mbeli uhumba. Mariya ambosonola leke lʼololo, lo haluyosama uma le ndi.