Limbu la Solomona 6 - La Bible en Otetela (Bible K'Ekila) 1991

Engenangenanelu ka Utshukami la Utshuki

¹ Lendi akatshu umeye la ngandji, We luleki amantu dimena? Lu leke lakona lakandelela? Keli shu tutuyangaka kame la ye.

² Umemi la ngandji akahulo utsha lʼekambo kandi, Utsha lʼemunda wa diango diʼupumu, Dia ntulesha dungalunga diandi lu dikambo, Dia ntuka alembo a waka.

³ Umemi la ngandji kukangami, la dimi kukanga umemi la ngandji. Ndi atuleshaka dungalunga diandi lʼatei a waka.

⁴ We wademi la ngandji, we eko dimena uku Tiriza, Dimena diahangone uku Jerusalema. Keli we eko woma wa mamba, uku alimbi wayembe dikuhu dia koi.

⁵ Unya ashu aye uma le mi, ne dia vo wambompenyahenya, Divu diaye dieko uku limba la mbudi, Mbayahulo uma lʼukungu wa Ngiliyade.

⁶ Anyu aye weko uku limba lʼekoko a wadi, Mbayawandi uma lʼeokelo. Vo tshe mbutaka ahendi ahendi. Nduku otoi lʼatei awo eli la okei.

⁷ Atama aye weko uku betshi diʼekomi kʼutamba Lʼedia dihondo diukumbiye.

⁸ Wadi wa khumʼekanga akumi asamalu, la esika andi akumi enanei weko, Ndu esekaseka wʼamantu waheyama mbala.

⁹ Inga kami, uluwanyi ami otoi mbendi. Ndi eli ona etoi lakuti nyangu. Ndi keli ulangimi le one lakawuti. Ana amantu watuwenaka, watuwetaka vati: Kanga ongenongeno. Wadi wa khumʼekanga la esika andi watuwandulaka.

¹⁰ Akona one ateneka uku sasi dia pindju, Dimena uku ngondo, pudipudi uku unya, Keli woma wa mamba uku alimbi wayembe dikuhu dia koi?

¹¹ Dimi lakahulo utsha lʼekambo kʼekodi wa kasu, Dia ntenda tumbatumba dia lʼukidi, La dia ntenda kana ekodi wambomonga, Kana etamba wa dikomi wambutundja alembo.

¹² Ntundu latamani dikambu fundu, utema ami akambidjasha Lʼatei a pusupusu yʼantu ami a waki.

¹³ Ukaluli, ukaluli, we umuntu usi Shulama! Ukaluli, ukaluli dia shu nkenda. Okoko wana walanganyu menda umuntu usi Shulama Uku wenye la ntundu kʼelui ehendi wʼalimbi?