Kolosai 4 - La Bible en Otetela (Bible K'Ekila) 1991

¹ Akhumi, lyutsheli fumbi yanyu akambu wʼulolo. Nyu mbeyaka nyati: Ndu nyu nyeko la Uwandji lʼulungu.

Alaku Amotshi: “Nyutetemali Nomba; Nyokendekende la Yewu”

² Nyutetemali nomba, nyosenaki la eukelu ka lusaka.

³ Nyutolombelaki ndu shu, dia Unyashungu ntudihwela lukuki, ne dia diui dia mvuta dikambu diushami dia Kristu, dia dikambu ne mbemi lu lukanu,

⁴ dia dimi mpunula dikambu diako uku ahumbami mvuta.

⁵ Nyokendekende la yewu le antu wahatetawo, tanyushishaki etena.

⁶ Nyutaki paka aui wa ngandji ka mamba tena tshe, wosohanyimi la leho dia nyu mbeya wuhu wa nkaluya untu tshe diui.

Ambutuma Tukiko la Onesimo

⁷ Tukiko, unyasu la ngandji la ukambi a kolamelu ndu unyasu ukambi le Khumadiondjo, ayunyutela akambu tshe.

⁸ Dia dikambu ne, mbakamutumi le nyu, dia nyu mbeya okone wesu, la dia ndi nkikitsha etema anyu.

⁹ Ndu Onesimo, unyasu la ngandji la kolamelu, usikanyu kendi. Vo wayunyewuya akambu tshe weli lindu.

Moyo Uma le Anyasu

¹⁰ Aristarako, unyami usi lukanu, ambunyutumela moyo, ndu Mako, onangu Baranab; (lakanyutela dikambu diandi — naka ndi ambuya le nyu, kanyulunguli),

¹¹ la Jesu, latuwetaka vati: Justo. Vo atu mbeli antu wakahema uhekeli lʼatei wa anyami ekambi wʼulimu wa diulelu dia Unyashungu Vo mbakankikitsha.

¹² Epafara, usikanyu, ukambi a Kristu, ambunyutumela moyo. Ndi atunyolombelaka, dia nyu nduwana la ndjala la elungamelu ka wulu lu lulangu tshe la Unyashungu.

¹³ Ne dia omenyi a dikambu diandi mbemi, nti: Ndi akakambi ulimu efula dikambu dianyu ndu asi Laodikiya, ndu asi Hiyerapoli.

¹⁴ Luka, wetshi walangema, la Demasi, wambunyutumela moyo.

¹⁵ Nyusha anyasu wa la Laodikiya ndu Numafasi, ndu ekelizia weli lu luudu landi, moyo.

¹⁶ Lamʼayunyala mukanda one lʼatei anyu, nyuwaleli ndu ekelizia wʼasi Laodikiya. Kanyali ndu mukanda uma la Laodikiya.

¹⁷ Nyuteli Arakipo nyati: Ulamaki ulimu wakakusha Khumadiondjo, ushidiya.

Diui DiʼEtshokwelo

¹⁸ Dimi Paulu lambunyufundela moyo la lunya lami. Nyuho kanu yami. Ngandji ka mamba kayali la nyu!