Kolosai 3 - La Bible en Otetela (Bible K'Ekila) 1991

Lumu lʼUyuyu le Kristu

¹ Naka nyu nyakulwama kame la Kristu, nyuyangi diango dieli lʼulungu, lu dihuli diudjashi Kristu, lu lunya la pami la Unyashungu.

² Nyukani yimba ya diango dia lʼulungu, aha dia la kete.

³ Ne dia nyu nyakavu, ku lumu lanyu lambushama la Kristu le Unyashungu.

⁴ Lamʼayenama Kristu lumu lasu, ku nyu nyayenama kame la ndi lu lutumbu.

“Nyambukulula Untu Edjedja, Nyambolota Untu Uyuyu”

⁵ Okone nyudiaki akambu wa kolo wa la kete: munanyi, akambu wa mindu, saki ka dimba, lulangu la kolo, okomiya, weli otemwelo wa dikishi.

⁶ Dia akambu ane, kele ka Unyashungu atuyakaka le akanga wʼuhedia.

⁷ Ndu nyu nyakakendakendaka loko ntundu lamʼakanyakendakenda lu akambu ako.

⁸ Keli kakiane, nyunya akambu ane tshe: kele, lutunu, somboki, lotengo, aui wa sonyi uma lʼenyo anyu.

⁹ Tanyutaki kashi, ne dia nyu nyambukulula untu edjedja la akambu andi,

¹⁰ nyambolota untu uyuyu, lufanyi la utungi andi lu yewu yʼuyuyu.

¹¹ Loko, aha usi Ngirika kuyanga usi Juda, kuyanga umbahemi wʼuhekeli, kuyanga aha umbahemi wʼuhekeli kuyanga osendji, kuyanga usi Skutiya, kuyanga fumbi, kuyanga luyadjasedi, keli Kristu ambukuka tshe, eko lu akambu tshe.

¹² Ne dia nyu nyeko esonami wa Unyashungu, la ekilami wa ngandji, osoku nyolote etema wa ketshi, la wa memakana, la wa ndjakitshakitsha, la wa kenemo, la wa kolamelu.

¹³ Nyukikaneli kolo. Nyudimanyanyia kolo yanyu, naka untu eko la ukina dikambu. Uku akanyudimanyia Khumadiondjo kolo, dieli la nyu, ndu nyu dia nyimanyiana kolo.

¹⁴ Ladiku dia akambu ane tshe, nyolote ngandji; to keli dimama dia uluwanyi.

¹⁵ Ki ka Kristu kuleli lʼetema anyu, dia dikambu ne mbakanyetama lu dimba otoi. Nyukaki lusaka.

¹⁶ Diui dia Kristu diadjase, diangone lʼetema anyu. Nyetshanya lu yimba tshe, nyewani la kimbu la esambu wʼololo la wa Nyuma. Nyimbeli Unyashungu esambu la ngandji ka mamba lʼetema anyu.

¹⁷ Akambu tshe watanyu la watshanyu, nyutshi tshe lu lukumbu la Khumadiondjo Jesu. Nyuki Unyashungu Shesu lusaka dia dikambu diandi.

Elimu wa Lumu lʼUyuyu: le Wadi la Waumewo, le Ana la Ambutshi Awo, Ndu le Ehombo la Akhumewo

¹⁸ Wadi, nyuyali lʼokongo a waumenyu, uku alanga Khumadiondjo.

¹⁹ Waumi, nyulangi wadienyu, tanyahetshaki.

²⁰ Ana, nyukitanyia ambutshi anyu lu akambu tshe; dikambu so mbatongenyangenyaka Khumadiondjo.

²¹ Nyu washi, tanyutshaki anʼanyu kele, ne dia vo watukuheko.

²² Ehombo, nyukitanyia aui wʼakhumenyu wa la kete, aha paka lu ashu awo, uku wane walanga ngenyangenya antu, keli nyutshi ulimu lʼutema otoi, uku antu wuka Khumadiondjo woma.

²³ Akambu tshe watshanyu, nyatshi lʼutema otoi, uku le Unyashungu, aha le antu.

²⁴ Nyeyi nyati: Nyu nyayulungula difutu dia sangu uma le Khumadiondjo. Nyu nyatukambelaka Khumadiondjo Kristu ulimu.

²⁵ Ne dia one latutshaka kolo, ayulungula uku kolo kakandatshi, dikambu so hayala shonodi.