Kolosai 2 - La Bible en Otetela (Bible K'Ekila) 1991

Washikikali lu Mbetawo

¹ Ne dia dimi nangaka nyu mbeya okone anyukambelami, ndu wa la Laodikiya, ndu antu akina wahatamenyi la ashu,

² ne dia etema awo wakikitshami, la wakimameli lu ngandji la lu ongonyi wʼakambu tshe wa yimba, ne dia vo mbeya dikambu diushami dia Unshungu, dieli Kristu;

³ ongonyi a yimba la bewu wambushama le ndi.

⁴ Dimi lambunyutela dikambu ne, untu tanyunganyiaki la aui wʼamena.

⁵ Kuyanga dimi kema lʼatei anyu, ku utema ami eko le nyu. Dimi la ongenongeno lamʼenami ndjalongosola kanyu, ndu ushikikalu a mbetawo kanyu le Kristu.

⁶ Uku akanyalungula Khumadiondjo Kristu Jesu, okone nyokendakendaki la ndi.

⁷ Nyuyakikitsha, nyuyaudia, nyuyashikike lu mbetawo kanyu le ndi, pupu uku akatanyetsha. Nyukaki lusaka efula.

Paulu Ambuwaewula Dia Vo Tawunganelaki

⁸ Nyewo, untu tanyunganyiaki la yimba yʼantu ndu la akambu wa kashi, uku ditshelu diʼantu, watuyelaka akambu wa la kete, wahayeli Kristu.

⁹ Ne dia elulelu tshe ka Unyashungu keko lu dimba diandi,

¹⁰ ku nyu nyambukuma lu elulelu ka lumu le ndi, ndʼako leli ote a diulelu tshe la wulu.

¹¹ Le ndi kakanyahema ehekeli waha lʼanya lamʼakanyanya utema a ntundu, lu diahamelu diʼuhekeli wa Kristu.

¹² Nyu nyakakhundama la ndi lu batiza, ndu nyakulwama la ndi ne dia mbetawo ka wulu a Unyashungu, lakawulula uma lu nyoi.

¹³ Nyu wane wakavu ne dia kolo yanyu, ndu waki kumbahema ehekeli wʼalimba, Unyashungu akanyusha lumu kame la ndi, akatudimanyia kolo yasu tshe.

¹⁴ Ndi akadimula mukanda wʼadjangu wakawatufundela, akawunya uma lʼatei asu, akokokome lʼutamba a mpeketanya.

¹⁵ Okone ndi akanya waulelu la embuledi, akawaenyanya lu seke, akaleki wulu lʼutamba a mpeketanya.

¹⁶ Okone untu tanyulumbuyaki ne dia mbu ya nde, kana diango dia no, kana dia lushi lʼongenongeno, kana alelu ka ngondo, kana lushi lʼekila.

¹⁷ Akambu aso weko uku didjidji diʼakambu wayayi, keli dimba dieko dia Kristu.

¹⁸ Tanyetawoki untu nyohotola ushasha anyu, ne dia ndi ambuyakitshakitsha anyanya, la atotemolaka andjelo, atukanaka yimba dia waenelo andi, atutakulaka ne dia tukanyi tandi ta akambu wa dimba.

¹⁹ Ndi hamamema Kristu leli Ote a dimba; diango tshe dia dimba diambusangana ndu diambula uku akadilangi Unyashungu le ndi.

²⁰ Naka nyu nyakavu kame la Kristu dia akambu wa la kete, okoko wana watshanyu uku atutshaka wa la kete? Dikambu kuna dietawonyu adjangu nyati:

²¹ Tukimelaki! Toletaki! Tunandaki!

²² (dikambu so ndialaka dia diango tshe diatulamaka lamʼambudiutshama ulimu), uku wata elembe la wetshelu wʼantu?

²³ Mete, akambu aso weko la yimba lu ashu wʼantu wayasonwela diango diatemolawo, wayakitshakitsha, ndu wasuya alimba. Akambu aso hawushimbi akambu wa kolo wʼalimba.