Kolosai 1 - La Bible en Otetela (Bible K'Ekila) 1991

Ambatumela Moyo

¹ Paulu, utumami a Kristu Jesu uma lu lulangu la Unyashungu, la Timote unyasu.

² Le ekilami la anyasu wa kolamelu le Kristu weli la Kolosai: Ngandji ka mamba kayali la nyu, ndu ki kʼuma le Unyashungu Shesu!

Mbetawo la Ngandji ka Mamba kʼAsi Kolosai

³ Shu tatukaka Unyashungu, Shi Khumesu Jesu Kristu, lusaka, tatunyolombelaka nshi tshe.

⁴ Shu takuki lukumu la mbetawo kanyu le Kristu Jesu, ndu dia ngandji kukanyu ekilami tshe,

⁵ ne dia elungamelu kambuwunyukitshiya lʼulungu, kakanyuki lukumu lato ntundu lu diui dia mete dia lukumu lʼololo,

⁶ lakayi le nyu. Lo leko ndu lu kete tshe — latotokaka elua, latufulaka — uku atshalo ndu lʼetema anyu uma lu lushi lakanyuki ndu lakanyeyi ngandji ka mamba ka Unyashungu lu mete;

⁷ uku akanyeki uma le Epafara, unyasu ukambi wa ngandji, leli ukambi a Kristu a kolamelu dia dikambu diasu,

⁸ ndu lakatutela dia ngandji kanyu le Nyuma.

Paulu Ambutetemala Mbalombela

⁹ Dia dikambu ne, ndu shu, uma lu unya wakatuki lukumu lone, hatuheko nyolombela lu dombelo diasu, dia nyu ndudiama lu nimbitela lulangu landi, dia nyu ndjala la yimba ya nshihudia akambu tshe wa Nyuma,

¹⁰ dia nyu nkendakenda ololo uku alanga Khumadiondjo, dia nyu nto elua lu elimu wʼololo tshe, la dia mbula lu nimbitela Unyashungu.

¹¹ Nyukikitshami la wulu tshe, uku wulu a lutumbu landi, dia nyu ndjala la etetemalu lu memakana, kame la ongenongeno.

¹² Nyuki Shesu, one lakatete ololo dia shu nkita ukito wʼekilami wa yanyi, lusaka.

¹³ Ndi kakatutshungula uma lu wulu a udjima, kakatukadimula utsha lu diulelu dia Onʼandi la ngandji.

¹⁴ Uma le ndi kesu lʼetshungwelu kasu, ndu la edimanyelu ka kolo yasu.

Ona Keli Ladiku Dia Akambu Tshe

¹⁵ Ndi eli efanelu ka Unyashungu kahenama, enundu a diango tshe diakatungama.

¹⁶ Ne dia le ndi, kakatungama diango tshe, lʼulungu ndu la kete, diango dienama ndu diango diahenama, kana kiti ya diulelu, kana ewandji, kana waulelu, kana embuledi. Ndame kakayatungela diango tshe.

¹⁷ Ndi keli ladiku dia diango tshe, diango tshe diambukutshama le ndi.

¹⁸ Ote a dimba mbendi, dieli ekelizia. Ndi keli etatelu, keli enundu a wane wulo uma lu nyoi, dia ndi ndjala ladiku diʼakambu tshe.

¹⁹ Ne dia Shesu akalangi dia elulelu kʼakambu tshe ndjala le ndi,

²⁰ la dia ndi mbekesanyia diango tshe la ndi, mbakandete ki lu dudla dia lʼutamba andi a mpeketanya, lʼatei a diango dia la kete ndu diango dia lʼulungu.

²¹ Nyu wane wakangana, ndu waki atunyi lu tukanyi tanyu ndu lʼetsha anyu wa kolo,

²² keli kakiane ndi ambunyekesanyia la dimba diandi ne dia nyoi kandi, dia nyenya lu ashu andi uku ekilami waha la ekomo, waha la unungu,

²³ naka nyu nyayutetemala lu mbetawo, naka nyayuyashikike, naka hanyunganyiama uma lʼelungamelu ka lukumu lʼololo lakanyuki, lakasambishama lʼetungelu tshe la tshina diʼulungu, ndu lakamayala, dimi Paulu, usambisha alo.

Paulu Ambuyanga Nduwanya Ekelizia

²⁴ Kakiane, dimi lambongenangena lu asui ami wamumusuwa dikambu dianyu. Dimi lambukutsha asui wa Kristu wutshikadi lu dimba diami, ne dia dimba diandi dieko ekelizia,

²⁵ ako wakamayala usambisha uku ulimu wakambisha Unyashungu dia dikambu dianyu, dia nyushihudia diui dia Unyashungu.

²⁶ Dio mbeli dikambu dia usheshe diakashama enonyi lʼenonyi, ndu nonga la nonga. Keli kakiane, dio diambenama le ekilami andi,

²⁷ le wane wakalangi Unyashungu mbewuya dia ongonyi la lutumbu la dikambu ne diushami lʼatei wʼasi wedja, dieli Kristu lʼetema anyu, elungamelu ka lutumbu.

²⁸ Ndi kanyutelasu, tatewulaka untu tshe, ndu tatetshaka untu tshe la yimba tshe, ne dia shu nduwula untu tshe lʼuluwanyi le Kristu.

²⁹ Dia dikambu ne, mbatumutshaka ulimu wulu, mbatumuhimbaka ntsha ulimu andi la wulu ami tshe watundumbishaka.