Jona 1 - La Bible en Otetela (Bible K'Ekila) 1991

Jona Ambulawo Latuyalaka

¹ Diui dia Latuyalaka diakayi le Jona, onʼa Amitai, ati:

² Unela, utshu la Niniva, usumba a wuki; utuleli, ne dia kolo kawo kambumbela pulu la ntundu kami.

³ Keli Jona akunela dia ndawo uma lu ashu wa Latuyalaka utshu la Tarashishi. Ndi akahulo la Jopa. Ku akatutana mashua wakatatshokaka utsha la Tarashishi. Ndi akafuti ushinga wa lokendo dia ndi ntsho kame la wo utsha la Tarashishi, etali uma la ntundu ka Latuyalaka.

⁴ Keli Latuyalaka akatumi lopepe la wulu lu ashi a wuki, ku ngimbi ka wulu kakayala lu ashi a wuki. Mashua wakayangi mpandjo.

⁵ Asi Mashua wakuki woma, ku vo tshe untu lʼuntu akalelela etemolatemola kandi. Vo wakakadja diango diaki lu mashua lu ashi a wuki dia vo mbete usadi. Keli Jona akahulo lʼesi lu yindju motshi ya lʼetei a mashua. Ndi akatetama, akatutshudungo la djo esadi.

⁶ Ku olombodi a mashua akayi le ndi, akayuwumbula ati: Okoko wana walalaye djo? Emo, eti Unyashungu aye. Undu, Unyashungu aye ayutuho diaha shu mvo.

⁷ Vo wakatanela vati: Nyeso, tuki uwali dia shu mbeya one lambutela dikambu ne dia kolo. Okone vo wakuki uwali ku uwali akandi Jona.

⁸ Vo wakosengasenga vati: Ututeli untu akona ambutela dikambu ne dia kolo? Vo wakawumbula vati: Na ulimu watuyukambaka? Uma lendi ayayayi? Na wudja aye? Usi na eye?

⁹ Ndi akakaluya diui ati: Usi Heberu kemi. Dimi mbukaka Latuyalaka, Unyashungu wa lʼulungu, lakatungi ashi a waki la kete woma.

¹⁰ Ku apami ako wakuki woma utamanya, wa-kawumbula vati: Dikambu diakona diakayatshi? Vo wakeyi vati: Ndi eko lu ntalawo uma lu ashu wa Latuyalaka, ne dia ndi akawatela.

¹¹ Ku vo wakawumbula vati: Kayutukutshela dia ashi wa waki ntolembohalela? Ne dia ashi a waki wakatatekoyaka ndjala asukhu la ngimbi.

¹² Ndi akakaluya diui ati: Nyomembe, nyuntambiya lu ashi a waki. Ku ashi a waki wayunyolembohalela. Ne dia dimi mbeyaka nti: Lu dikambu diami kambuyala ngimbi ka wuki kene le nyu.

¹³ Ku apami ako wakaduki la wulu dia vo nkalula utsha lʼumamu. Keli vo kumbeya ntsha ne dia ashi a waki wakatatekoyaka mbayalela asukhu la ngimbi.

¹⁴ Okone vo wakalelela Latuyalaka, wakosengasenga vati: We Latuyalaka, shu tambukosengasenga shati: Tetawoki shu mvo lu dikambu dia lumu la untu one. Ndu tutukitshiyaki dikila dia untu laha la unungu, ne dia we, Latuyalaka, atutshaka uku alangaye.

¹⁵ Okone vo wakembe Jona, wakutambiya lu ashi a waki. Ku ashi a waki wakalembohala.

¹⁶ Ku antu ako wakatamanya mbuka Latuyalaka woma. Vo wakalambula Latuyalaka elambu, wakatshiki dokoloko.

¹⁷ Latuyalaka akatumi lusi la wuki, dia lo mena Jona Ku Jona aki lʼutema a lusi tanyi tusatu la etshu esatu.