Joele 2 - La Bible en Otetela (Bible K'Ekila) 1991

¹ Nyudi amama lu Siona, nyuwadi lʼukungu ami wʼekila. Wane tshe wudjashi lu kete wadidimi, Ne dia lushi la Latuyalaka luyayi, Lo laya nkandja.

² Lushi la udjima la lʼutshutshumalu, Lushi la wangi la udjima a tshududu. Lo lambuya uku sasi dia pindju, Diatudianganaka ladiku diʼekungu. Enda wudja wʼefula ndu wa wulu, Wuhu wahatayala nduku lushi, Ndu wahayalaki pundju lu nonga yayayi.

³ Dja yaheta yeko la ntundu kawo, La lumbi layadikita lʼokongo awo. Kete yeli uku ekambo ka Edena la ntundu kawo, Ku lʼokongo awo shenga yakalana. Nduku engo kayuhanda uma lu anya awo.

⁴ Efanelu kawo keli uku falasa, Vo ndjalawoka uku ambahemi wa falasa.

⁵ Lundju lawo leko uku dikita Dia pusupusn ya ta ladiku diʼekungu, Uku dikita dia lumbi la dja mbatalalo lʼadiyu, Uku ului wa alimbi wa wulu mbayalonga dia ndo ta.

⁶ Antu wudidima la ntundu kawo; Dundji diawo tshe diambukaso.

⁷ Vo watukhungusoka uku apami a wulu, Watumbelaka lu peli uku alimbi. Vo tshe untu lʼuntu ambutsho lu mbuka kandi.

⁸ Vo hawumamana kame, Untu lʼuntu tatshokaka lu onongo andi. Vo wambukhunguso utsha lu sodi ya dihumo dia ta, Aha memala lu lokendo lawo.

⁹ Vo wambukukanela lʼusumba, Wulawolawo ladiku dia peli dia lukumbu. Vo wumbela ladiku dia mvudu, Woto lu adidishi uku uvi.

¹⁰ Kete yambudidima la ntundu kawo, Ulungu wambusukasuka. Unya la ngondo waya udjima utu, Ndu toto hatuyoheta ntu.

¹¹ Latuyalaka ambukia diui diandi La ntundu kʼului andi wʼalimbi, Ne dia pangu kandi keli wuki efula; Ne dia ndi eko la wulu wa nshidiya diui diandi; Ne dia lushi la Latuyalaka leko wuki ndu woma wa mamba, Akona ukuki nshikikala lu lushi lako?

Ketshi ka Latuyalaka

¹² Ndu kakiane mbata Latuyalaka ati: Nyukaluli le mi lʼetema anyu tshe, Kame lʼekilelu ka mbu ya nde, kame la alelu la tukuku.

¹³ Nyati etema anyu, aha ahondo. Nyukaluli le Latuyalaka, Unyashungu anyu, Ne dia ndi eli kanga ketshi la ngandji ka shikaa. Ndi huki kele esadi, eko too la ololo wa mamba, Ndu atolembaka utema lu kolo katundulangaka ntuma.

¹⁴ Akona eya kana Latuyalaka hukalula, Ndu holemba utema? Akona eya kana ndi hutshika otshoko, Elambu wa shima a wa lutshumba Le Latuyalaka, Unyashungu anyu, lʼokongo andi?

¹⁵ Nyudi amama lu Siona. Nyeti antu lu lusanganya la lukumu. Nyukidia ekilelu ka mbu ya nde.

¹⁶ Nyusanganya wudja, Nyutshi lusanganya lʼekila. Nyusanganya dihangamendi, Nyusanganya ana, kuyanga wane wakalome awele. Utshuki atumbi uma lu luudu landi, La utshukami uma lu luudu la mbetama.

¹⁷ Elombedi ekambi wa Latuyalaka, Waleli lʼasa mbalasa lʼediakelu wati vati: Latuyalaka li, ushimbeli wudja aye! Tukimoki wudja aye lu sonyi, Tukimoki ukito aye lu dionyo lʼatei a wedja, Okoko wana wukukiwo mumbwama lʼatei a wedja vati: Lendʼeli Unyashungu awo?

¹⁸ Latuyalaka ambuka kandjema lu dikambu dia kete yandi. Ndi ambuka wudja andi ketshi.

¹⁹ Latuyalaka akakaluya diui, akatela wudja andi ati: Nyulungi, dimi layunyutumela Epunga, ashi wʼelua la iso, ku nyu nyayuluta. Dimi halunyukimo lu dionyo ntu lʼatei a wedja.

²⁰ Dimi layunyanganyia ntunyi Wʼuma lu leke la ngelʼa kushi. Layuwutshanya utsha lu kete yʼelanyelu yahalo mvula, Alimbi andi wa la ntundu lu ashi a waki wa lu leke lʼehutwelu, Alimbi andi wa lʼokongo lu ashi a waki wa lu leke lʼedjelu. Puta kandi kayulalo, La sulu kato ka kolo kayudiangana lu lopepe, Ne dia nai akatshi akambu a waki.

²¹ Kete li, tukaki woma, Uyali la ongenongeno, ongenengene utamanya, Ne dia Latuyalaka ambutsha akambu a waki!

²² Nyu nyama ya lʼusui, tanyukaki woma, Ne dia adiyu wa nde wambutumba lʼusui wa shenga, Ne dia etamba wamboto elua awo. Etamba wa fingu la ekodi wa vinyo wamboto elua ntu.

²³ Ndu nyu asi Siona, nyongenengene, Nyongenengene utamanya le Latuyalaka, Unyashungu anyu, Ne dia ndi ayunyoloshiya mvula lʼetena kato. Ndi ayunyutumela mvula kʼalohoki, Ndu ka ndjihela uku nshi ya ntundu.

²⁴ Ahuli wʼesuswelu wayulula too la epunga, La kenga ya waki yayulula to la ashi wʼelua la iso.

²⁵ Dimi layukaluya diango diakali ondjo wa tutumu Waomoi a dikita, eto ndu ondjo wʼanganga. Waso mbeli alimbi wakamanyutumela.

²⁶ Nyu nyayole, nyayutumbula lukumbu lami, Dimi Latuyalaka, Unyashungu anyu, Lakatshaka akambu wa mamba lʼatei anyu. Wudja ami hawutshama sonyi ntu pundju.

²⁷ Ku nyu nyayeya nyati: Dimi leko lʼatei wa Isariyele. Dimi keli Latuyalaka, Unyashungu anyu, nduku ukina. Wudja ami hawutshama sonyi ntu pundju.

Etshulwelu ka Nyuma ka Unyashungu

²⁸ Lʼokongo wʼakambu ane, Dimi layahe antu tshe nyuma kami, Ku anʼanyu wʼapami la wʼamantu wayuta akambu wahatayi, Esumbi anyu wayena alo, La elongo anyu wʼapami wayena waenelo.

²⁹ Lu nshi yako, dimi layahe ndu ekambi wʼapami La ekambi wʼamantu nyuma kami.

³⁰ Dimi layenya akambu wa mamba lʼulungu ndu la kete: dikila, dja, la dinga.

³¹ Unya ayukadimo udjima, ngondo ayukadimo dikila, la ntundu ka lushi la Latuyalaka latayi, lushi la wuki ndu la woma.

³² Lʼetena keso, untu tshe layeta lukumbu la Latuyalaka, ayushimbamela. Uku ukati Latuyalaka ati: Antu amotshi weli lʼukungu wa, Siona ndu la Jerusalema wayuhanda. Latuyalaka ayeta amotshi uma lʼatei wʼatshikadi.