Jobo 9 - La Bible en Otetela (Bible K'Ekila) 1991

Jobo Heyi Wuhu wa Nkaluya Unyashungu Diui

¹ Ku Jobo akakaluya diui ati:

² Mete, dimi mbeyaka nti: Osoku mbedio. Keli, ukundi ayeya untu ndjala uluwanyi la ntundu ka Unyashungu?

³ Naka untu ayama la ndi la aui kinunu, Ndi heyi mbukaluya ntundu diui.

⁴ Le ndi keli yimba la wulu tshe. Akona akasemanela la ndi, ku ndi ngona?

⁵ Ndi atosekolaka ekungu shashimuya, Atekadimilaka ekalikali lu kele kandi.

⁶ Ndi atusutshasutshaka kete ladiku dia ekitshelu kayo, Ku dikoho diayo diatusukasukaka.

⁷ Ndi katudjangelaka unya, ku vo hawuhuto. Ndi atukumbaka toto.

⁸ Ndi ndame katunanulaka ulungu; Katokendakendaka ladiku dia asukhu wʼashi a waki.

⁹ Ndi kakatungi elui wa toto “Sunga Yoto”, la “Tshula la Fo la Nyama”, “Ana wʼUlui”, la “Asika Utshudi” wa lu leke la diku dia kushi.

¹⁰ Ndi katutshaka akambu a waki waheyama mbedika, Akambu wa mamba waheyama mbala.

¹¹ Ndi atetaka lasuki la mi, ku dimi halawenyi; Ndi acundekanaka ku dimi halulimbitela.

¹² Enda, ndi atohotolaka, akona eya mbushimba? Akona ukuki mbumbula ati: Katshaye na?

¹³ Unyashungu hatukaluyaka kele kandi. Ekimanyidi wʼakanga wʼutaku watokolamaka la tshina diandi.

¹⁴ Keli dimi, ukundi ukukimi mbukaluya diui? Aui akona wukukimi nsonola dia nteketa la ndi?

¹⁵ Kuyanga dimi kema la unungu dimi haleyi mbukaluya diui; Dieli la mi ku dia nsengasenga unumbishi ami.

¹⁶ Kuyanga ndi ayunkaluya diui, naka dimi lambuweta, Dimi haletawo nti: Ndi ambumbukela.

¹⁷ Ndi katompotshahotshaka la ngimbi, Katufudiaka puta yami ufudiafudia.

¹⁸ Ndi hatunkimoka dia dimi mpenga, Ndi atundudiaka la lokonyo.

¹⁹ Naka layulawo utsha le wulu, ndi keli Kanga-Wulu-Tshe. Naka dia ntsho lʼelumbwelu, ayukumia leko na?

²⁰ Kuyanga ololo mbemi, unyo ami ayumbisha unungu; Kuyanga dimi laha la unungu, ndi ayumbete kanga uhedia.

²¹ Dimi kema la unungu, keli dimi hakimela lumu lami: Dimi lambuluhetsha.

²² Tshe wuhu otoi; diako mbatami nti: Ndi katulanyaka wane waha la unungu la wane weli la unungu.

²³ Naka sui diambela nyoi shashimuya, Ndi atolaka pa yʼuntu laha la unungu.

²⁴ Kete yambukimwama lu anya wʼantu a kolo. Ndi atukumbaka dundji diʼembadi; Naka aha ndi, na ndi na?

²⁵ Nshi yami mbetaka luwangu uleki undawi, Yo ndawoka esadi, hayenyi olo.

²⁶ Yo yateteka esadi uku mashua wa kombe yʼatuhu, Uku atuhuloka pungu dia munda engo.

²⁷ Naka dimi layuta nti: Layuhela asui ami, Layunya elundji ka lunyangu, layongenangena,

²⁸ Pa yami yambumbata asulu. Dimi mbeyaka nti: We homenya uku untu laha la unungu.

²⁹ Dimi layushama unungu: Okoko wana wayasuyami usuyasuya?

³⁰ Kuyanga layuyaotsha lʼashi wa pudipudi, Kuyanga layedia anya ami pudipudi ka wulu,

³¹ We ayuntambiya lu loteke, Ki alondo ami wayumbete wononyi.

³² Ndi kema untu uku dimi, dia dimi mbukaluya diui, Dia shu ntsho kame lʼelumbwelu.

³³ Nduku usambudi lʼasami la ndi, Dia ndi ntahe, dimi la ndi anya.

³⁴ Ndi anya ohehela andi uma le mi, Woma andi a wuki tawompenyahenyaki ntu.

³⁵ Ku dimi layoteketa, haluka woma. Naka aha osoku, dime hakuki.