Jobo 7 - La Bible en Otetela (Bible K'Ekila) 1991Jobo Ambenya Unyashungu Munga 1 Undi, untu aha omenyi fono mbendi la kete, La nshi yandi uku nshi yʼukambi? 2 Uku fumbi katuyangaka dedi, Ndu uku usi ulimu latulungamelaka difutu diandi? 3 Osoku mbakamakundja ngondo ya pa, Ndu mbakamalungula etshu wʼasui. 4 Lamʼatumetamaka, dimi ndjambulaka nti: Etena kakona kayumeto? Etena kakona kayushila utshu? Dimi latukadimokadimoka edja ndu lʼehutwelu ka unya. 5 Dimba diami diambukumbama la kusu ndu la kaya ya kete; Diuwu diami diambutundotundo, diambolelo. 6 Nshi yami yambeta esadi uku uleki ututi wʼumbitshi; Yo yambeta yaha la elungamelu. 7 Uho wati: Lumu lami leli efufelu. Ashu ami hawena diese ntu. 8 Su diatumendaka, hadiumenda ntu; Su diaye diayunyanga, ku dimi haluyala ntu. 9 Uku atukumboka dingi ndu atudiomoka; One lambuhulo utsha lu Dihuli diʼEdu, hatukalulaka ntu. 10 Ndi hukalula ntu lu luudu landi, La dihuli diakandadjaseka hadiulimbitela ntu. 11 Diako mbahameyi nshimba unyo ami, Mbayumoteketa lu okei wʼutema ami, Mbayumulela lu lokonyo la lumu lami. 12 Undi, ashi a waki mbemi, kuyanga shimiamba, Dia we nkitshiyami alami lʼutshimba ami? 13 Lamʼatami nti: Tangi kami kayututsha kandji kami, Mbetu kami kayolodia kandji kami, 14 We atumbataka asulu la alo; We atumbutshaka woma la waenelo. 15 Hai! Dimi lutulanga mpinama lu kingu, Lutulanga nyoi uleki asui ane. 16 Dimi lambuhetsha lumu lami, halangi numba pundju. Unkimo, ne dia lumu lami leko paka efufelu. 17 Untu eli na, dia we mbukanela, Dia we nkitsha tukanyi taye le ndi, 18 Dia we tuwendaka pindju tshe, Ndu dia ntuwedikaka tena tshe? 19 Etena kakona kayuyukimo mendami? Etena kakona kayuyunkimo dia dimi mena losoi? 20 Naka dimi lakatshi kolo, kakona keyami nkutshela we umendji wʼantu? Ukundi ambuyukitsha pole ka we mbukakami pitu yaye? Ukundi ambumuyala wutshu le ye? 21 Ukundi ahayanyimanyia kolo yami, Ndu ahayuhela uhedia ami? Dimi lutsha mbetama lu ditshu. We ayunyanga wulu, ku dimi haluyala ntu. |
La Bible en Otetela © Allianee Biblique de la Republique Democratique du Congo, 1991
Bible Society of the Democratic Republic of Congo