Jobo 42 - La Bible en Otetela (Bible K'Ekila) 1991

Jobo Ambushula Kolo; Ambulungwama

¹ Jobo akakaluya Latuyalaka diui ati:

² Kakiane dimi lambulimbitela nti: We mbeyaka ntsha akambu tshe, La nduku esangweyu kaye keye nkadimo.

³ Akona one ambukumba aui waha la ewu? Elu, dimi lakateketaka akambu wakimi kumana fundu, Akambu wa mamba wundeki wulu, wakimi kunimbitela.

⁴ Lambukosengasenga nti: Ulungi, keli ntekete! Dimi layukumbula umbula, ku we ayunkaluya diui.

⁵ Dimi lakukaka lukumu lʼakambu aye lu atui, Keli kakiane lambukena la ashu ami.

⁶ Diako mbamumuyamia, Mbamumuyatshumuya ludjashi lu ditshu la lʼutuku.

⁷ Lamʼakashili Latuyalaka mvutela Jobo aui aso, Latuyalaka akatela Elifaze, usi Temana, ati: Dimi lambukuka kele ka wulu, we la engenyi aye ehendi, ne dia nyu konteketa aui wʼusimbwi lu dikambu diami, uku akateketaka ukambi ami Jobo.

⁸ Kakiane, nyose esongo a ngombe esambeli la waumi wʼekoko esambeli. Nyutshu le ukambi ami Jobo, nyutuyalambweli ulambu wa lutshumba, ku ukambi ami Jobo ayunyolombela. Dimi layuwukela, mbahamunyutshela uku dinginya dianyu, ne dia nyu konteketa aui wʼusimbwi lu dikambu diami, uku akateketaka ukambi ami Jobo.

⁹ Ku Elifaze, usi Temana, Bilidade, usi Shua, la Zofara, usi Nama, wakatshu; wakatutsha kene tshe kakawatela Latuyalaka. Ku Latuyalaka akukela Jobo lu dombelo.

Ongonyi wa Jobo Wambukalula

¹⁰ Lamʼakalombela Jobo engenyi andi, Latuyalaka akawete uku akindi ntundu. Latuyalaka akasha Jobo tena pendi dia kene kaki la ndi ntundu.

¹¹ Anangu Jobo, akadiyendi la engenyi andi wakayi vo tshe dia ndjuwenda lakandi. Vo wakali la ndi ma lakandi; wakuleli, wakusambi lu asui tshe wakutshela Latuyalaka. Ku vo tshe untu lʼuntu akawusha lufalanga lʼukenga la lohete la paunyi.

¹² Okone Latuyalaka akatshokola Jobo lu nshi yandi ya lʼokongo, uleki nshi yandi ya ntundu. Jobo akayala la ekoko nunu dikumi la nei, kamelo nunu samalu, ngombe nunu pendi la punda ya wadi kinunu.

¹³ Ndi akayuta ntu ana apami esambeli, la ana amantu asatu.

¹⁴ Ndi akole onʼandi la umuntu lʼenundu lukumbu ati: Jemima; la hendi ati; Keziya; la one la satu ati: Kerena-Hapuka.

¹⁵ Nduku umuntu aki dimena lu kete tshe uku ana amantu wa Jobo. Shewo akatawasha etenyi kʼukito kame la anengewo wʼapami.

¹⁶ Lʼokongo wʼakambu aso, Jobo akalumbi deku lukama la akumi anei. Ndi akenyi anʼandi, ekana andi, edja ndu lolonga la nei.

¹⁷ Ku Jobo akavu usumbi a lukusumbi, akunduya andja.