Jobo 41 - La Bible en Otetela (Bible K'Ekila) 1991

¹ Undi, we mbeyaka munda shimiamba la yodi, Kuyanga nkeleka lulimi landi la okodi?

² We mbeyaka mbudja okodi la ehembe, Kana mbutundula luwanga la yodi uka?

³ Undi, ndi ayukokokwela lusaka tena efula, Ayoteketa la ye la aui wʼosengosengo?

⁴ Ndi ayudja la ye sheki, Dia ndi ndjala fumbi kaye pundju uka?

⁵ Undi, we ayokenya la ndi uku fudu? Kana mbukelekela esekaseka aye wʼamantu, dia vo nkenya la ndi?

⁶ Amundji wa nsi mbeyaka mbutsha ukunda, Kana mbosesa dia mbusundja le asi ukanda uka?

⁷ We mbeyaka ntundutunduya ekuhu kandi la dikonga, Kuyanga ote andi la wuna?

⁸ Uhuwahe lunya, Uhukana dia ta; we heya ntsha dikambu diako ntu!

⁹ Enda, elungamelu kʼuntu kambukumela! Ndi ambukita balakata lamʼambunduwena.

¹⁰ Nduku untu leli la dihunga dia mbukhusula. Ku akona ayemala la ntundu kami?

¹¹ Akona unkuli dibasa, dia dimi mbosombwela? Kene tshe keli la tshina diʼulungu, kami keto.

¹² Dimi nangaka moteketa dikambu dia biyu diandi, Wulu andi, ndu uluwanyi wa dimba diandi.

¹³ Akona ukuki mbuwula ekuhu? Akona ayoto lʼasa manga yandi?

¹⁴ Akona eya mbufula unyo andi? Lʼutshimba a wanyu andi, eko woma wa mamba!

¹⁵ Akamba andi watunduyasemaka, Watumamanaka ma ma.

¹⁶ Vo watahatanaka dimotshi ladiku dia dikina, Ku luwi haleyi mboto lʼasawo.

¹⁷ Vo watumamatanaka, Watukimanelaka, wuhu wahakuki mamitwana.

¹⁸ Lukashi landi ndjalaka usasi. Ashu andi ndjalaka uku ehutwelu ka unya.

¹⁹ Fuki dia dja diatutumbaka uma lʼunyo andi, Sasi ya dja yatuhanohanoka uma loko.

²⁰ Dinga diatutumbaka uma lʼehembe andi, Uku dinga dia puki kadodo, kahewo la dja ya kombe.

²¹ Efufelu kandi katohetshaka akalanga. Lumbi latutumbaka uma lʼunyo andi.

²² Wulu watuyalaka lu kingu kandi; Woma wa mamba watulimbolimboka la ntundu kandi.

²³ Wana wʼemunyi andi watukimanelaka. Vo watumamemaka lʼuntu andi, haweyi nkakito.

²⁴ Utema andi weko wulu uku dive, Wulu uku dive diʼohelo.

²⁵ Lamʼatundunelaka, akanga a dihunga watukaka woma; Ashishimu watuwataka asulu.

²⁶ Kuyanga untu ayuwuka yombo, yo hayoto; Ndu dikonga, dikhuwa la osongo pupu.

²⁷ Ndi atenaka luwulu uku lolengese, La ohotela uku utamba wʼohondju.

²⁸ Dikhuwa hadieyi mbulawuya. Mboko yʼuma lu yukaave yeli uku adiyu le ndi.

²⁹ Ndi atenaka tukalimba uku adiyu, Atolaka luhelu la dikonga.

³⁰ Lʼesi a dikundju diandi, eli akamba wa sodi. Ndi atuyasimbulaka uku lungu lʼahangu ahangu lu loteke.

³¹ Ndi atududuyaka ashi wa lʼohongo uku ashi wa lu puki, Ateteka ashi a waki uku puki ka malashi!

³² Ndi atutshikaka mbuka kʼusasi lʼokongo andi. Ku antu watukanaka vati: Ashi wa lʼohongo wambuyala wema uku ndjui!

³³ Lu kete tshe, nduku leli uku ndi; Ndi akatungama, diaha mbuka nduku engo woma.

³⁴ Ndi atendaka engo tshe katuyambiyaka la dionyo. Ndi eli khumʼekanga ka engo tshe katuyambiyaka.