Jobo 4 - La Bible en Otetela (Bible K'Ekila) 1991

Elifaze Ambamia Jobo

¹ Ku Elifaze, usi Temana, akahula diui ati:

² Naka untu ayufula unyo, dikambu so diayukunyangia? Akona ukuki nembohala, aha mvuta diui?

³ Enda, we akalakanyaka antu efula, We akakikitshal anya wa wodu,

⁴ Aui aye wakasukelaka wane wakaseloka; We akakikitshaka adui wa wodu.

⁵ Kakiane dikambu diako diambuya le ye, ku we ambokomo; Dio diambukunda, ku we ambuyahenyahenya.

⁶ Woma aye wa Unyashungu, kema usuku aye? La uluwanyi aye, kema elungamelu kaye?

⁷ Ukani yimba kakiane, untu akona laha la unungu lakalanyema? Kana, lendi akashili antu wʼaluwanyi ushiki?

⁸ Keli le mi, dimi menaka nti: Waku watukambaka ubedia, Ndu watuneka kolo, watunaka wuhu ako.

⁹ Vo watulanyemaka lʼefutelu ka Unyashungu, Watutshumbamaka la ekamwelu ka kele kandi.

¹⁰ Dikita dia tambwe, ehundwelu ka tambwe ka ngala wambukume, La anyu wʼesongo wa tambwe wambowele.

¹¹ Tambwe ka wulu kambuvo, ne dia nyama kema; Tana ta tambwe ka wadi tambudiangana.

¹² Diui diakakumi le mi lu usheshe, Tui diami diakuki engunungunu adio.

¹³ Lʼetena katusutshasutshaka waenelo wa lʼutshu tukanyi, Lamʼatulalaka antu djo ya wulu,

¹⁴ Dimi lakandama la woma ndu lʼashishimu; Weka ami tshe wakasakana la lukumba.

¹⁵ Nyama kemotshi kaketi la ntundu kami, Ku ote ami akadi fwe.

¹⁶ To kakemala ki, keli dimi kunimbitela efanelu kato. Efanelu kemotshi kaki la ntundu kami, kakayemala ki. Ku dimi lakayuka diui ati:

¹⁷ Untu lukuvo mbeyaka ndjala uluwanyi la ntundu ka Unyashungu: Kana ndjala pudipudi la ntundu ka Utunyi andi?

¹⁸ Naka ndi hatekamaka ekambi andi, Naka ndi atushaka andjelo andi enungu,

¹⁹ Keti huki le wane weli la alimba wa kete, Wakatungo uma lu ditshu, Wukuki minwama uku lumbudi?

²⁰ Vo watulanyemaka lʼasa pindju la dikolo, Watuvokaka, ku nduku untu ladja tukanyi loko.

²¹ Naka okodi a lumu lawo ambuhimbo, Vo hawutuvokaka aha la yimba?