Jobo 38 - La Bible en Otetela (Bible K'Ekila) 1991

Latuyalaka Ambetawuya Jobo Ati: We Kema la Yimba

¹ Latuyalaka akakaluya diui uma lʼatei a punganendji ati:

² Akona oso ete sangweyu diami udjima La aui waha la ewu?

³ Ukikitsha uya uku pami! Dimi layanga nkumbula embula, keli we unkaluya aui.

⁴ Lendi akiye lamʼakamahiki atshina wa kete? Uti, naka we la ewu.

⁵ Akona akashikike tediko tayo, we mbeyaka? Akona akasimbula ushinga ladiku diayo?

⁶ Ladiku dia na akahikama atshina ayo? Akona akakitsha dive diayo dia lu tshuku,

⁷ Lamʼakimbaka toto ta pindju esambu kame, Ndu lamʼakalimbolimboka ana tshe wa Unyashungu lʼongenongeno?

⁸ Akona akadihi ashi a waki la kuki, Lamʼakawafuko uma lʼetungelu,

⁹ Lamʼakamatungela wangi dihondo diawo, La udjima a tshududu uheli awo;

¹⁰ Lamʼakamedika elelu awo, Ndu lamʼakamadji kungi la kuki yawo;

¹¹ Lamʼakamati nti: Kuyakaki edja ndu lane, keli tulekanaki; Utaku wʼasukhu aye kawuyukumeki paka lane?

¹² Umaka eutwelu kaye, we akadjela pindju olembe? We akalimbitshiya hyutshihutshi dihuli diaye,

¹³ Dia yo nkimela kuma ya kete, La antu wa kolo nsutshasutshama uma loko;

¹⁴ Dia kete nkadimo uku diwumba la tshina dia dimatelu, La dia yo nengama uku dihondo;

¹⁵ Dia antu wa kolo ndjala aha la usasi ayo, Dia lunya lediami mbediawediama?

¹⁶ We akoto pulu ndu lu teko diʼashi a waki? We akakindula la tshina diʼehongo?

¹⁷ Wakakulimbitshiya asukhu wa nyoi, Kana we akenyi kuki ya dedi dia nyoi?

¹⁸ We nimbitelaka wuki wa kete? Uti, naka we mbeyaka akambu aso tshe.

¹⁹ Lendʼeli mbuka kʼutsha lʼedjaselu kʼusasi; La udjima, lendʼeli dihuli diawo,

²⁰ Dia we mbutshindela utsha lʼulelu awo, La dia we mbeya mbuka yʼutsha lakawo?

²¹ We mbeyaka, ne dia we akuto lʼetena keko. Nshi yaye yaya efula.

²² Undi, we akoto lu waumbelu wa lungi lʼekama la tshitshi, Kana mena waumbelu wa mboko ya mvula,

²³ Wakamalamaka ne dia etena ka pa, Ne dia nshi yʼata?

²⁴ Lendʼeli mbuka kʼutsha li dihuli diatuwudianganyaka usasi, Kʼutsha lu dihuli diatuwudianganyaka lopepe lʼuma lʼehutwelu?

²⁵ Akona akadihwela mvula mbuka, Kana mbatela ndjadi la dikhungula osese,

²⁶ Dia ndosha mvula lu kete yahadjashi antu, Lʼusui wa shenga waha la antu;

²⁷ Dia ndoshiya kete yʼanyanya yʼoseko ashi, Dia menya kete adiyu?

²⁸ Undi, mvula eko la shi? Akona akuti apopo wa dihohe?

²⁹ Uma lʼutema akona wakatumbi ashi wʼukamu? Akona akuti lungi la tshitshi?

³⁰ Ashi watukamaka uku dive La diku diʼashi, nkimanelaka ka.

³¹ We mbeyaka nkeleka molola wa “Ana Wʼului”, Kana ntshungula ekodi wa “Tshula l a Fo la Nyama”?

³² We mbeyaka nombola “Esasi a Waki” dikumi la ehendi lu tena diawo? We mbeyaka nombola “Sungu a Yoto” kame la anʼayo?

³³ We mbeyaka adjangu wa lʼulungu? We la wulu wa nshikike diulelu diawo lu kete?

³⁴ We mbeyaka mbedia diui pulu ndu lu wangi, Dia ndjaloshiya mvula?

³⁵ We mbeyaka ntumandjadi, kuyontsho? La yo mbeyaka nkutela vati: Shu ane?

³⁶ Akona akadji yimba lʼatei a wangi wa tshududu, Kana mbisha lungi ewu?

³⁷ Akona eli la yimba ya mbala efula ka wangi? Akona eya ntshulula ashi wa lu atapa wa dikuhu dia lʼulungu,

³⁸ Lamʼambomotshama ditshu efula, Ndu lamʼambukakatala kete wulu?

³⁹ We mbeyaka nyangela wadi a tambwe nyama ka nde, We mbeyaka nshidiya ndjala kʼesongo wa tambwe,

⁴⁰ Lamʼatuwetamaka lu die diawo, Ndu lamʼatuwuhulamaka?

⁴¹ Akona atushaka dingwangwa mbu ya nde, Lamʼatulelelaka tana tadio Unyashungu, Lamʼatuwekekoka la ndjala?