Jobo 36 - La Bible en Otetela (Bible K'Ekila) 1991

Elihu Ambulimula Wuki wa Unyashungu

¹ Elihu akakolamela nteketa ati:

² Uhukunga yema, nkuteli, Ne dia dimi leki la aui lu dikambu dia Unyashungu.

³ Dimi layutosa yimba yami uma lʼetali, Layushikike ololo wʼUtungi ami.

⁴ Mete, aui ami kema kashi, One leli la yimba tshe, eko la ye.

⁵ Enda, Unyashungu eli kanga wulu, keli ndi honyola untu. Ndi eli kanga wulu lu efula ka ewu kandi.

⁶ Ndi hatulamaka lumu lʼuntu a kolo dia ndi numba, Keli ndi atusambwelaka amenyi fono.

⁷ Ndi hatunyaka ashu andi uma le antu wʼololo, Ndi atuwatdjashaka lu kiti ya waulelu kame la khumi ya dikanga, Atuwatijashaka loko pundju dia vo ndjala la lutumbu.

⁸ Naka vo wambudjama molola, Naka vo wambukelekama la ekodi wʼasui,

⁹ Ndi atuwaenyaka elimu awo, La ehedia awo wakawayasemaka.

¹⁰ Ndi atudihulaka atui awo la wetshelu, Atuwatelaka dia vo nkalula uma lu kolo.

¹¹ Naka vo wayulunga, ndu wayukitanyia, Vo wayutahumoka lukulu lʼolo lu nshi yawo tshe, Ndu wayutayalaka la ongenongeno lu deku diawo.

¹² Naka vo hawulungi, wayudiakema la tombo, Vo wayuvo lu dinginya diawo.

¹³ Keli amonyodi wa Unyashungu watuyakimoka lu kele, Hawutulelelaka Unyashungu lamʼatundakelekaka,

¹⁴ Vo watuvokaka weko elongolongo la esekaseka, Nyuma yawo yatukumeka lu akambu wa sonyi.

¹⁵ Unyashungu atushimbelaka amenyi fono uma lu fono yawo, Atuwaewulaka uma lu asui.

¹⁶ Unyashungu akalangi nkolombola uma lu asui, Utsha lu dihuli dia ki la ndjadjasela. Mbu ya nde yʼololo yakayalaka lu mesa aye.

¹⁷ We nkanaka dia numbuya antu wa kolo, Kakiane elumbwelu la sambu kʼololo wambukuma le ye.

¹⁸ Tetawoki kele kaye nkete kanga losoko, La wuki wʼetshungwelu kaye nketoya uma lu mbuka!

¹⁹ Delu diaye nkukaka dia nkutundja uma lu fono, Kuyanga we ayuhimba la wulu aye tshe uka?

²⁰ Tukumbulaki utshu, Etena katunyemaka antu uma lu ahuli awo.

²¹ Ewo, telelelaki utsha lu kolo, Ne dia we ambosonola kolo lu dihuli diʼasui.

²² Unyashungu eli wuki uma lu wulu andi. Akona eya mbetsha uku ndi?

²³ Akona eya mbulimbitshiya mbuka? Kuyanga mbutela ati: We ambutsha kolo?

²⁴ Uho dia nemia elimu andi, Watandulaka antu tshe.

²⁵ Antu tshe watendaka elimu ako, Untu lʼuntu atendaka tshalula.

²⁶ Unyashungu eli wuki, shu hat nani fundu. Efula ka deku diandi hadieyama mbalema.

²⁷ Ndi atukutulaka apopo wʼashi le ndi, Atakadimulaka wangi,

²⁸ Wangi ako watoloshaka mvula, Watukiloshiaka antu.

²⁹ Akona amana enanwelu ka wangi fundu, Kuyanga akuma wʼuma lu mbalasa kandi?

³⁰ Ndi atudianganyaka ndjadi lʼutshimba andi tshe, Atukumbaka kete la tshina diʼashi a waki.

³¹ La diango so mbatundulumbuyaka wedja, Ndi atuwashaka mbu ya nde efula

³² Ndi atombaka anya andi la ndjadi, Atukishaka wulu wa munda engo kalangandi.

³³ Lundju lato latutaka dikambu diandi. Ndi eli kanga kandjema, latukaka kolo kele.