Jobo 35 - La Bible en Otetela (Bible K'Ekila) 1991

¹ Elihu akati diui ntu ati:

² We nkanaka wati: Dimi kayinga lu dikambu ne? We nkanaka wati: Ololo ami ndeka wa Unyashungu?

³ We atutaka wati: Ekimanyelu kakona kakundjami uma loko? Waho akona weli la mi wuleki one wutumukundja lamʼutumutsha kolo?

⁴ Dimi luyanga nkukaluya diui, Ndu we ndu engenyi aye.

⁵ Edia ashu utsha lʼulungu, uhenda, Endi wangi weli etali ladiku diaye!

⁶ We kuntshaka kolo, dikambu so mbeyaka nsuya Unyashungu uka? Ndu naka kolo yaye yambufulanela, kakona kutshelaye?

⁷ Naka we eko ololo, kakona kaduwula Unyashungu uma le ye? Kakona kayundulungula uma lʼanya aye?

⁸ Kolo yaye mbeyaka nsuya paka unyaye untu, La ololo aye mbeyaka ntshokola paka untu.

⁹ Antu watulelaka ne dia efula kʼasui, Watuyangaka ekimanyelu, ne dia lunya la kanga wulu leko ladiku diawo.

¹⁰ Nduku lambula ati: Lendʼeli Unyashungu, Utungi ami, Latushanaka esambu wʼongenongeno lʼutshu,

¹¹ Latutetshaka uleki nyama ya la kete, Latoteteka la ewu uleki fudu ya lʼulungu?

¹² Vo watulelaka ulelalela, keli Unyashungu hakaluya diui, Ne dia utaku wʼantu wa kolo.

¹³ Mete, Unyashungu hatulungaka delu diʼanyanya, Kanga-Wulu-Tshe hatudjaka ashu leko.

¹⁴ Kuyanga we ambuta wati: Halawenyi, Elumbwelu keko la ntundu kandi, dieli la ye dia mbukungela!

¹⁵ Keli kakiane ne dia kele kandi atatumbi, Ndu ndi haleki mbidia ashu lu kolo,

¹⁶ Mbafulaye, we Jobo, unyo aye ufulafula, Mbafudiaye aui waha la ewu.