Jobo 33 - La Bible en Otetela (Bible K'Ekila) 1991

Elihu Ambamia Jobo

¹ Kakiane, we Jobo, uhukami aui ami, Uhuke tui lu aui ami tshe!

² Enda, dimi lambufula unyo, Lulimi lami lambokendakenda lʼunyo.

³ Aui ami wayuta dia esimbwelu kʼutema ami, La elomo ami wayeya vati: Mete katawo.

⁴ Nyuma ka Unyashungu akantungi, La efufelu ka Kanga-Wulu-Tshe kakambisha lumu.

⁵ Naka we mbeyaka nkaluyami diui, Olongosole aui aye, uwati!

⁶ La ntundu ka Unyashungu, dimi leko uku we, Dimi lakatungama lu kete yʼomona uku we.

⁷ Enda, woma ami wa mamba hawukata asulu, La wutshu ami hawukuhekuya.

⁸ Mete, we akateketa lu atui ami. Dimi lakuki aui aye wati:

⁹ Dimi leko pudipudi, laha la kolo, Dimi laha la unungu, nduku dikambu dia kolo dieli le mi.

¹⁰ Enda, Unyashungu ambumamia wamamia, Ambumbete uku utunyi andi,

¹¹ Ndi ambudja ekulu ami lu luweti, Atendaka wanya ami tshe.

¹² Ulungi, nkuteli diui. Lu dikambu ne, we kema la eyingelu, Ne dia Unyashungu ndeka untu wuki.

¹³ Ukundi ambuyama la ndi Ata wati: Ndi hadji tukanyi tandi lu akambu wʼantu?

¹⁴ Ne dia Unyashungu atoteketaka wuhu one, Kana wuhu ukina, keli antu hawudji yimba loko.

¹⁵ Ndi atoteketaka lu alo, lu waenelo lʼutshu Lamʼatutshudungoka antu lu djo ya wulu, Ndu lamʼatohohelaka antu lu mbetu yawo.

¹⁶ Ku ndi atudihulaka atui wʼantu, Atuwautshaka woma wa mamba la waewelu andi,

¹⁷ Dia ndi nkaluya untu uma lu kolo kandi, La mbushimba uma lʼutaku;

¹⁸ Dia ndi nshimba utema wʼuntu uma lu Difuku, La lumu landi uma lu nyoi ka yombo.

¹⁹ Untu mbeyaka nsuyama ndu la kandji lu tangi, La ohenyohenyo a wulu lu weka andi,

²⁰ Edja ndu lumu landi haluyulanga ma, Kuyanga utema andi ma dia dimena,

²¹ Dimba diandi diambonda, diambuma tu; Weka andi waki komenamaka, wambenama,

²² Utema andi ambusukana la Difuku, La lumu landi le ananyishi.

²³ Keli naka dikendji diambuyala la ndi, Oteketedi, otoi lʼatei a kinunu, Dia menya untu mbuka kahumbandi ndjela,

²⁴ Ku Unyashungu ambuwuka ketshi, ata ati: Utshunguli, atukuhulo utsha la Difuku, Dimi lakatani ushinga wʼetshungwelu.

²⁵ Ku dimba diʼuntu ako diayuyala ashashi uku dimba dia dikenda. Ndi ayuyala uku akindi lu nshi yandi yʼolongo a pami.

²⁶ Ndi atolombaka Unyashungu, ku ndi atuhumuyaka lukulu lʼolo, Untu ako atuyakaka la ntundu kandi lʼongenongeno; Atutelaka antu dikambu dia panda kandi.

²⁷ Ndi atimbaka esambu la ntundu kʼantu, ata ati: Dimi lakatshi kolo, lakalanya sambu kʼololo, Keli dimi kunsuyama uku aki kolo yami,

²⁸ Ndi akashimbela utema ami diaha vo mpulo utsha lu Difuku, Okone lumu lami layendaka usasi,

²⁹ Enda, akambu ane tshe mbatutshaka Unyashungu, Tena pendi, tena satu kame la untu,

³⁰ Dia nkaluya utema andi uma lu Difuku, Dia mbosenya la usasi a lumu.

³¹ Jobo li, ulungi, uhukami! Olembohali, keli ntekete!

³² Naka we la diui dia mvuta, uti, Otekete, dimi layulanga nkuyindja.

³³ Naka kema, ulungi aui ami! Olembohali, ku layuketsha yimba.