Jobo 31 - La Bible en Otetela (Bible K'Ekila) 1991

Jobo Ambuta Dia Akambu Andi wʼUsimbwi

¹ Dimi lakalakana lʼashu ami, Diaha nkumbula usekaseka wʼemuma pundju.

² Etenyi kakona kutumukundja uma le Unyashungu leli ladiku? La sangu diakona uma le Kanga-Wulu-Tshe leli lʼulungu?

³ Aha paka asui watuyakaka le untu a kolo, Ndu elanyelu le atshi wa kolo?

⁴ Ndi hatendaka mbuka yami; Ndu hatalaka wanya ami tshe, uka?

⁵ Naka dimi lakakendakenda lu kashi, Naka lukulu lami lakalawo utsha lu lukesu;

⁶ (Wambediki lu kilo kʼololo Ku Unyashungu eyi akambu ami wʼusimbwi!)

⁷ Naka na diami diaketola uma lu mbuka kʼusimbwi, Naka utema ami akayeli ashu ami, Ndu naka diwadi diakamamema lu anya ami,

⁸ Laso dimi muni diango, keli ukina kayudili. Ndi kakuli ndu diango tshe dia lʼekambo kami!

⁹ Naka utema ami akakomiya umuntu omotshi, Naka dimi lakatukungela la suku dia unyami,

¹⁰ Wademi katwele pami kekina ma, La akina kaweyani la ndi.

¹¹ Oso utuyala kolo kahangone, Kolo ka wuki, kutunsuya embadi.

¹² To keli dja, yatutshumbaka pulu ndu lʼesi a Dihuli diʼEdu, Yututshumba ongonyi ami tshe.

¹³ Naka dimi lakonyola ukambi ami a pami kana a umuntu, Lamʼakawamaka la mi,

¹⁴ Ukundi utumutsha, lamʼambunela Unyashungu? Diui diakona diutumukaluya lamʼamunduya le mi?

¹⁵ One lakantungi lʼutema wa nyomi, kumbutunga ndu ndi uka? Aha Unyashungu wame kakatutungi lu etema wʼanyengesu?

¹⁶ Dimi lakadimi asi wula kene kakawanombe uka? Dimi lakalingailingai ashu a wadi aki udu?

¹⁷ Undi, dimi lakalekaka ma diami dime, La aha mbisha ona etshiki nduku yema?

¹⁸ Kema, dimi lakudiaka ona etshiki uku umbutshi uma lu nshi yami yʼolongo a pami; Lakalombolaka wadi aki udu umaka eutwelu kami.

¹⁹ Naka dimi lakenyi untu avo la ulanda wa dihondo, Kana uhumbi aha lʼulangitshi;

²⁰ Naka utema andi kumandulami, Naka ndi kunshimba tshitshi la diosa diʼuma lʼana wʼekoko ami;

²¹ Naka dimi lakedia lunya lami dia ntshela ona etshiki kolo, Ne dia dimi lakenyi nti: Embadi wayunyindja,

²² Laso diheka diami diakungo, Lunya lami lawelewele uma lu songa dialo!

²³ Ne dia asui wa Unyashungu wambumbutsha woma wa mamba, Okone dimi haleyi ntsha nduku dikambu la ntundu ka wuki andi.

²⁴ Naka dimi lakakitsha ekamelu kami lu paunyi, Naka lakatela paunyi ka pudipudi nti: We keli elungamelu kami:

²⁵ Naka dimi lakangenangena dia wuki wʼongonyi ami, Ndu ne dia lunya lami lakakundja diango efula;

²⁶ Naka dimi lakendi unya lamʼakawayahetaka ngaingai, Kana ngondo lamʼakatayakashiyaka;

²⁷ Naka utema ami akakesama lu usheshe dia mbatemola, Kana nkitsha anya lʼunyo dia mbandula,

²⁸ Ndu lu dikambu so mbutunsuya embadi, La dimi lutanguna Unyashungu ludjashi ladiku!

²⁹ Undi, dimi lakangenangena lu elanyelu ka one lakampetshaka? Dimi lakalimbolimbo lʼongenongeno lamʼakawundi kolo, uka?

³⁰ Kema, dimi kumbetawo unyo ami ntsha kolo, Dia nomba lumu landi la mananu.

³¹ Undi, untu omotshi uma lu luudu lami kumumbula ati: Akona eya ntana untu laki nkunduta ma lakandi?

³² Mete, ongendangenda kumbetama lʼosese; Dimi lakadihwela umbetshi a mbuka kuki ya luudu lami.

³³ Naka dimi lakakumbi kolo yami uku Adama, Naka lakasne munga kami lʼutema,

³⁴ Ne dia laki la woma wʼuiui wʼantu, Kana ne dia lakuki dionyo dia khumbu woma wa mamba, Dimi lutuyala ki, aha ntumba uma lu luudu.

³⁵ Utumukundja one lambukele li! Aui ami ku keso: Kanga-Wulu-Tshe ankaluya diui! Utumukundja buku diakafundi utunyi ami li!

³⁶ Dimi lutudiemba lu diheka diami, Lutudiahe lʼote uku dembo dia kusu,

³⁷ Tshiki lutusanyia okondo a wanya ami tshe; Dimi lutusukana uku uwandji le ndi.

³⁸ Naka kete yami yambundelela, La eshidi ayo wʼemunda wambonkedia asoi;

³⁹ Naka dimi lakali elua ayo olele, aha ndjifuta, Naka lakadiaki akanga ayo;

⁴⁰ Ahangulakoi wamene lu dihuli diʼepunga wa menge, La adiyu wa kolo lu dihuli diʼepunga wa yelela! Ekumelu kʼasui wa Jobo keso.