Jobo 29 - La Bible en Otetela (Bible K'Ekila) 1991

Jobo Ambuho Ongenongeno Waki Landi Ntundu

¹ Jobo akahula diui ntu, la aui wʼeshika ati:

² Utunduyala ndjali uku akimi ntundu, Uku lu nshi yakanamaka Unyashungu,

³ Lamʼakampetelaka tala diandi lʼote, Lamʼakanombolaka usasi andi lʼutshimba li!

⁴ Utunduyala ndjali uku nshi yakimi la wulu, Yakalamaka Unyashungu luudu lami la dipema uku ongenyi,

⁵ Lamʼakayalaka Kanga-Wulu-Tshe kame la mi, Ndu lamʼakanyingaka anʼami,

⁶ Lamʼakaloyamaka ekulu ami lʼawele Ndu lamʼakakediaka dive ekedi wa biso lasuki la mi li!

⁷ Utunduyala ntumbi dia ntsho utsha la suku diʼusumba, Ndu utumulongosola edjaselu lu dihuli diako li!

⁸ Lu nshi sho, elongo wʼapami wakamenaka, wakashamaka, Esumbi wakunelaka dia nemiami.

⁹ Ewandji wakahimbulaka aui awo, Wakaheka anya awo lu atama.

¹⁰ Aui wa dihangamendi wakayala ki, Nimi yawo yakakakatelaka lu kumbi yawo ya nimi.

¹¹ Atui wakukaka aui ami, wakamandulaka; Ashu wakamenaka, wakayala emenyi ami;

¹² Ne dia dimi lakatshungulaka akanga a wula wakalelaka, Ndu ana wa ditshiki, wakahumbaka ukimanyidi.

¹³ Wane waki lasuki la nyoi, wakatantshikelaki etshoko. Dimi lakaludiaka etema a wadi waki edu too lʼesambu wʼongenongeno.

¹⁴ Dimi lakalotaka sambu kʼololo, ku to kakayala uku dihondo le mi. Akambu ami wʼusimbwi wakayalaka uku koti la dembo dia kusu le mi.

¹⁵ Dimi laki ashu wʼakanga a tshungu, La ekulu wʼakanga a tshumbi.

¹⁶ Dimi laki umbutshi wʼahumbi; Lakashishimaka akambu a waku wakimi kumbeya.

¹⁷ Dimi lakokolaka manga yʼantu wa kolo, Lakahatulaka diango diakawose uma lʼanyu awo.

¹⁸ Ku dimi lakataka nti: Dimi lukuvo ka luudu lami, La nshi yami yayuyala efula uku seke ya lokongo,

¹⁹ Ediu ami wakasimbimala pulu ndu lʼashi, Dihohe diakahemaka lu tahi yami lʼutshu,

²⁰ Lutumbu lami lakayalaka uyuyu utu, La uta ami ndjalaka uvuyu utu lu lunya.

²¹ Antu wakanungaka, wakatshikalaka wakunga, Wakalembohalaka ki, walunga alaku ami.

²² Lamʼakamashilaka nteketa, nduku lakankaluyaka diui; Aui ami waki uku dihohe dia yoyo le wo tshe,

²³ Vo wakankungelaka, uku atuwukungelaka mvula, Wakaseka enyo awo, uku atuwulungamelaka mvula yʼalohoki.

²⁴ Dimi lakamonemonelaka lamʼakiwo kundjalaka la elungamelu. Vo kuntunaka ngaingai kʼelundji kami.

²⁵ Dimi lakasonwelaka mbuka, lakayalaka olombodi awo, Dimi lakayalaka uku khumʼekanga lʼatei wʼelui andi wʼalimbi, Uku usambi le wane wakalelaka.