Jobo 23 - La Bible en Otetela (Bible K'Ekila) 1991

Jobo Ambukumbula Nteketa Dikambu Diandi la Ntundu ka Unyashungu

¹ Ku Jobo akahula diui ati:

² Ndu kakiane ukiyanu ami wambotomboko. Lunya lami halukuka nshimba dikhumu diami.

³ Utumeya dihuli dia mbushula li, Utumuyala la wulu wa nkuma la ntundu ka kiti kandi li!

⁴ Dimi lutusanya dikambu diami la ntundu kandi, Lutuludia unyo ami too lʼaui wa tamu.

⁵ Dimi lutuka aui wutundunkaluya; Dimi lutulimbitela kene kutundumvutela.

⁶ Ndi utondosha la wulu andi tshe? Kema, ndi utumbukela.

⁷ Leko, untu lʼusimbwi utoteketa la ndi ololo, Umbadi ami utunyindja pundju.

⁸ Naka layutsho utsha la ntundu, ndi kema leko; Naka layutsho utsha lʼokongo, dimi haleyi mbutana.

⁹ Naka dimi layuyanga lu lunya la lomoso, dimi haluwena; Naka dimi layukadimo utsha lu lunya la pami, dimi haluwushula.

¹⁰ Keli ndi mbeyaka mbuka katumokendakendaka, Lamʼayundushidiya mbedika asui ane, dimi layutumba uma loko pudipudi uku paunyi.

¹¹ Akaka ami wakatayelaka wanya andi; Dimi lakatalamaka mbuka kandi, kombetola uma loko.

¹² Dimi konseka elembe wʼuma lʼelomo andi, Lakalamaka aui wʼuma lʼunyo andi lʼutema ami.

¹³ Ndi ambushikike esangweyu kandi, eya mbukadimula uma loko? Kene kalanga utema andi, katundutshaka.

¹⁴ Ndi ayushidiya kene kakandasanguya lu dikambu diami; Akambu wa wuhu ako weko efula le ndi ntu.

¹⁵ Diako mbukami woma la ntundu kandi. Lamʼakanami dikambu diako, dimi mbukaka woma.

¹⁶ Unyashungu akambati asulu, Kanga-Wulu-Tshe akandudia la woma,

¹⁷ Ne dia lambukanana lu dikambu diahamamani fundu ne; Udjima a tshududu ambunkumba elundji.