Jobo 22 - La Bible en Otetela (Bible K'Ekila) 1991

Elifaze Ambukana Ati: Jobo Akatshi Kolo ka Wuki

¹ Elifaze, usi Temana, akahula diui ati:

² Undi, untu mbeyaka ndjala uhumba le Unyashungu? Kema, kanga yimba ndjalaka uhumba paka le ndi ndame.

³ Naka we eli ololo, undi, dikambu so dieli ongenongeno le Kanga-Wulu-Tshe? Naka we ambuluwanya akambu aye, waho akona weli la ndi lu dikambu so?

⁴ Ukundi, uma lu woma wawukaye, mbakusuyandi, Mbakulumbuyandi?

⁵ Undi, unungu aye kema wuki? Kolo yaye hushila.

⁶ We akahotola ananyo ekole ohotolahotola. We akahumbia wane waki etakataka ahondo awo.

⁷ We kumbisha one lakumi wudi ashi; Akadimi one laki la ndjala ma.

⁸ Kete yakayala lu anya wa one lakaleki wulu, Ku kanga nemo akayudjase loko.

⁹ We akakendja wadi waki edu anya atu; Anya wʼana wa ditshiki wakawele.

¹⁰ Uma lu dikambu so mbambukudinga tulunga, Ndu mbambukunda woma wa mamba shashimuya.

¹¹ Okone usasi aye ambukadimo udjima diaha we mena, La ashi wʼelula wambukukhukume.

¹² Unyashungu aha etali kendi lʼulungu? Uhenda kuma ka toto uku weto etali!

¹³ We mumbulaka wati: Kakona keya Unyashungu? Ndi mbeyaka numbuya ledia a udjima a tshududu?

¹⁴ Wangi wa tshududu mbudinga, ndi henyi nduku engo; Ndi atokendakendaka paka ladiku diʼulungu.

¹⁵ We nangaka nkendakenda lu mbuka kʼedjedja Kakakendakendaka antu wa kolo?

¹⁶ Vo wakanyema la ntundu ka etena kawo, Etshina kawo kakembama uku ashi.

¹⁷ Vo wakatela Unyashungu vati: Umo uma le su. Kakona keya Kanga-Wulu-Tshe ntutshela?

¹⁸ Keli ndi akaludia mvudu yawo la diango diʼololo. Elakelu kʼantu wa kolo hayali etali uma le mi.

¹⁹ Antu wʼololo wayena elanyelu kʼantu wa kolo, wayongenangena; Antu waha la unungu wayuwaola vati:

²⁰ Mete, atunyi asu wambulanyema! La ekundji awo wambutshumbama lu dja!

²¹ Umamemi Unyashungu, ku we ayuyala la ki; We ayenaka olo.

²² Dimi lambukosengasenga nti: Ulungi wetshelu wʼuma lʼunyo andi. Ulamaki aui andi lʼutema aye.

²³ Naka we ayukalula le Kanga-Wulu-Tshe, we ayukikitala, Naka we ayunya akambu wa kolo uma lu luudu laye la dipema,

²⁴ Ayukadja paunyi lu ditshu, Paunyi kʼuma lʼOfira lʼatei a mboko ya lu ekedi,

²⁵ Ku Kanga-Wulu-Tshe ayuyala paunyi yaye, Ndu fesa yaye yʼushinga a wulu.

²⁶ Ku we ayongenangena le Kanga-Wulu-Tshe, Ayedia elundji kaye utsha le Unyashungu,

²⁷ We ayolombaka, ku ndi ayukukelaka; We ayushidiyaka dokoloko diaye.

²⁸ Kene tshe kayuyusanguyaka, kayuluwanaka; Usasi ayoketaka lu mbuka yaye.

²⁹ Unyashungu atukitshakitshaka akanga wʼutaku, Atushimbelaka akanga a ndjakitshakitsha.

³⁰ Ndi atushimbelaka untu laha la unungu, Ndi ayukushimbamela uma lu pudipudi kʼanya aye.