Jobo 21 - La Bible en Otetela (Bible K'Ekila) 1991

Jobo Ambuta Dia Engonelo ka Untu a Kolo

¹ Jobo akahula diui ati:

² Nyuhukami aui ami, Dikambu so diayali esambelu kanyu le mi.

³ Nyunkimo ntekete, Ku lamʼayumoteketa, nyu mbeyaka nsokami.

⁴ Undi, delu diami dieli uma le untu? Okoko wana wahuhasahasa utema ami?

⁵ Nyumendi, nyukashimo, Nyahe anya lu atama.

⁶ Lamʼakanami dikambu so, dimi lambukanana; Woma wa mamba wambumunda.

⁷ Okoko wana watulumbaka antu wa kolo? Okoko wana watuwutshundaka, watuwuyalaka la wulu?

⁸ Anʼawo watulaka lu ashu awo, Ndu ekanʼawo lamʼekiwo la lumu.

⁹ Wa lu mvudu yawo weko ki, waha la woma; Ohehela wa Unyashungu hawukumi le wo.

¹⁰ Waumi awo wa ngombe weko la wulu, watutshushaka waemi tena tshe. Ngombe yawo ya wadi mbutaka, hayutumbi waemi.

¹¹ Vo watukimoka anʼawo dia vo ndawolawo uku ekoko, Ku anʼawo watulimbolimboka la wenye.

¹² Vo watimbaka esambu la ngomo la losese, Watongenangenaka la lundju la wembiya.

¹³ Nshi yawo tshe mbetaka lu ongonyi utu. Vo watuhuloka la ki utsha lu Dihuli diʼEdu.

¹⁴ Vo watutelaka Unyashungu vati: Utumweli, Shu hatulangi nimbitela mbuka yaye.

¹⁵ Kakona keli Kanga-Wulu-Tshe, dia shu mbotemola? Waho akona wayutukundja dia shu mbolomba?

¹⁶ Undi, wulu wa ndjatungela ongonyi kema lʼanya awo? Elakelu kʼantu wa kolo kayali etali uma le mi!

¹⁷ Tena dingana diambudimala atala wʼantu wa kolo, Diambuya asui le wo, Diambakahanya Unyashungu asui lu kele kandi?

¹⁸ Tena dingana diambuwuyala uku nengese yatembaka lopepe, Kana uku puhudi yatembaka punganendji?

¹⁹ Nyu mvutaka nyati: Unyashungu atulamelaka anʼawo kolo yawo? Ndi asomboya vame, dia vo nimbitela.

²⁰ Ashu awo wenyi elanyelu vame, Vo wano kele ka Kanga-Wulu-Tshe.

²¹ Lusambi lakona leki lʼasawo la wa lu mvudu yawo, Lamʼambushila nshi yawo?

²² Akona ayulakanya Unyashungu, One latulumbuyaka wa lʼulungu?

²³ Untu omotshi atuvokaka lʼatei wʼongonyi, Atuyalaka la ongenongeno.

²⁴ Dimba diandi lonyengo lutu, Ehiho a weka andi too la iso.

²⁵ Untu omotshi atuvokaka la lokonyo lʼutema, Aha mena olo nduku yema.

²⁶ Ku vo ahendi watukhundemaka lu kete; Kusu yatuwalekaka.

²⁷ Enda, dimi mbeyaka tukanyi tanyu, La wuhu wa kolo walanganyu ntshelami.

²⁸ Nyu mumbulaka nyati: Lendʼeli luudu lʼuntu a wuki? Lendʼeli luudu la dipema lakadjashi untu a kolo?

²⁹ Undi, nyu kumumbula ambetshi a mbuka? Nyu nangaka mendjula aui wanyutelawo vati:

³⁰ Lu lushi lʼelanyelu, untu a kolo atuhandaka; Lu lushi la kele, ndi atushimbamelaka?

³¹ Akona ayuwamia la ntundu kandi, Ayosomboya lu akambu wakandatshi?

³² Wayuwemba utsha la diumbu, Wayukitshaka ulami la diumbu diandi.

³³ Ekama wa kete ya lʼukidi ndjalaka pe ketu le ndi. Antu tshe wayuyela lu mbuka kako, Uku akatshu antu efula lu mbuka kako la ntundu kandi.

³⁴ Ukundi ansambanyu usambasamba? Nduku diui diambutshikala le nyu, paka lukesu lutu.