Jobo 20 - La Bible en Otetela (Bible K'Ekila) 1991

Zofara Ambulimbitshiya Sui Dia Untu a Kolo

¹ Zofara, usi Nama, akahula diui ati:

² Tukanyi tami tambunkikitsha dia dimi nkaluya diui, Wuhu wahameyi ndjakimela.

³ Dimi lakuki luhangu lambumbukia sonyi. Yimba ya ewu kami yayukaluya diui.

⁴ We heyi umaka edjedja, Umaka etena kakakitshama untu lu kete wati:

⁵ Elembielo ka untu a kolo keko tshinyitinyi, La ongenongeno wa untu laheyi Unyashungu weko yema tshitshe?

⁶ Kuyanga mbendi utali tshwaa utsha lʼulungu, La ote andi nkumaka lu wangi,

⁷ Ndi ayulanyema pundju uku tumi tandi. Ku wane wakawenaka, wayumbula vati: Lendʼendi na?

⁸ Ndi ayukumbo uku do, hutanema ntu; Ndi ayushisho uku enelo kʼutshu.

⁹ Su diakawendaka, hadiuwenda ntu, La dihuli diakandadjashi, hadiuwena ntu.

¹⁰ Anʼandi wayuyanga ekimanyelu uma le asi weula, La anya andi wayukalula kene kakandahotola.

¹¹ Weka andi weki wʼolongo a pami, Keli vo wayetama la ndi lu ditshu.

¹² Kuyanga kolo kaki pe lʼunyo andi, Kuyanga ndi akakishe lʼesi a lulimi landi,

¹³ Kuyanga ndi kumbetawo nkikimo, Akakilami lʼunyo andi,

¹⁴ Ma diandi diambukadimo lu esohi andi; Dio diambuyala lolengo la dikhuha lu dimba diandi.

¹⁵ Ndi akamene ekundji esudia, ayetuho. Unyashungu ayuwetshanya uma lu dikundju diandi.

¹⁶ Ndi ayuhiha lolengo ia dikhuha; Wanga wa kunga wayudiaka.

¹⁷ Ndi huka ashu lu ekedi, Lu tokoko tuludi too lʼusanga la awele.

¹⁸ Ndi ayukaluya kene kakandakundja waho, ndi hukile; Ndi hongenangena la waho wakandakundja,

¹⁹ Ne dia ndi akasuya akanga a weula, akaseke. Ndi akahotola luudu la ngala lakindi kumpika.

²⁰ Lukaki landi kundjala lʼekumelu, Diako mbakindi kunshimbela engo kakandalekaka nanga.

²¹ Nduku engo kakahandi lu deshi diandi, Diako mbahutshikala engonyi andi edja.

²² Lʼatel wa diango efula, ndi ayuyala la uhumba; Amenyi fono tshe wayuwahe anya.

²³ Dia ndi ndutsha dikundju diandi too, Unyashungu ayutumela ududu wa kele kandi, Ayoloshiyewo uku mvula.

²⁴ Naka ndi ayuhanda dihumo dia luwulu, Dikuwa diʼohotela diayutsheta.

²⁵ Ndi ambudikula uma lu dimba diandi. Dio diambulingalinga la etumbelu kadio uma lʼesohi, Ku woma wa mamba wambuwunda.

²⁶ Udjima wa tshududu wambumbama uku ukundji andi; Dja yahohetsha untu yayutshumba; Yo yayutshumba kene kayutshikala lu luudu landi.

²⁷ Ulungu ayushula kolo kandi, Kete yayunela dia ndo la ndi.

²⁸ Diango dia lu luudu landi diayembama. Dio diayusungo lu lushi landi la kele.

²⁹ Oso eli etenyi kambulamela Unyashungu untu a kolo, Sangu diambukitshiya Unyashungu.