Jobo 2 - La Bible en Otetela (Bible K'Ekila) 1991

¹ Lushi lukina lamʼakatshu ana wa Unyashungu dia ntemala la ntundu ka Latuyalaka, ndu Satana akatshu lʼului awo dia ntemala ndu ndi la ntundu ka Latuyalaka.

² Latuyalaka akambula Satana ati: Uma lendi ayayi? Ku Satana akûkaluya diui ati: Dia ntukindula kete, ndu dia ntengola leko.

³ Latuyalaka akambula Satana ati: We akalimbitela ukambi ami Jobo? Nduku untu la kete uku ndi, untu lʼololo ndu lʼusimbwi, latukaka Unyashungu woma, ndu lambukadimo uma lu kolo. Ndi ambushikikalaka lu uluwanyi andi, kuyanga we atuhimbaka mbulanya ulanyalanya.

⁴ Satana akakaluya Latuyalaka diui ati: Diuwu lu diuwu. Kene tshe keli la until, ndi nkikimoka ne dia lumu landi.

⁵ Keli uhusimbula lunya laye, unandi weka andi la emunyi andi; ndi ayukoseka kaku.

⁶ Latuyalaka amukaluya diui ati: Enda dimi lambukukimwelandi. Keli dikambu otoi, tunandaki lumu landi.

⁷ Ku Satana akamo uma la ntundu ka Latuyalaka. Ndi akavutsha Jobo atshutshu a wulu umakʼesi a dikaka pulu ndu ladiku diʼote.

⁸ Ku Jobo akose unma wa ndjakula, akadjase lʼutuku.

⁹ Ku watiendi akawumbula ati: Ukundi alangaye nshikikala lu uluwanyi aye? Oseke Unyashungu, ku we ayuvo.

¹⁰ Keli Jobo akûkaluya diui ati: We amboteketa uku atoteketaka umuntu lʼenginya. Ngandi? Shu tayulungulaka ololo utu uma le Unyashungu, ku hatulungula kolo? Lu dikambu ne tshe Jobo kuntundja diui dia kolo uma lʼelomo andi.

¹¹ Lamʼakuki engenyi esatu wa Jobo, Elifaze, usi Temana, Bilidade, usi Shua, la Zofara, usi Nama, lukumu lʼasui tshe wakayi le ndi, vo wakadji sheki, wakunela, wakayi dia ndjulela la ndi, la ndjusamba.

¹² Lamʼakawawendi weki tshalula vo kumbulimbitela. Ku vo wakatundo lʼalelu, wakaleli, wakatshatsha ekutu awo, wakafumbula ditshu lʼulungu ladiku diʼete awo.

¹³ Vo wakayudjase lasuki la ndi lu kete tanyi esambeli la etshu esambeli, aha mbutela nduku diui, ne dia wakenyi vati: Kandji kandi keko wulu efula.