Jobo 18 - La Bible en Otetela (Bible K'Ekila) 1991

Bilidade Ambulimbitshiya Akambu Watuyalaka le Untu a Kolo

¹ Ku Bilidade, usi Shua, akahula diui ati:

² Edja ndu kaandi ayuyukimo nyanga aui wa mvuta? Ukani yimba, ku shu tayoteketa.

³ Okoko wana watendaye uku nyama? Ukundi wesu paka tuleli lu ashu aye?

⁴ We layatshatsha lu ududu aye li, Kete mbeyaka nsekwama lu dikambu diaye, Kuyanga ave nshisho uma lu ahuli awo?

⁵ Usasi wʼuntu a kolo wayudimala, Lumbi la dja yandi haloheta.

⁶ Usasi ayuyala udjima lu luudu landi la dipema: Tala diandi dieli ladiku diandi diayudimala.

⁷ Wanya andi wakandatalulaka wayuyala suki suki; Sangweyu diandi diayuwutakanya.

⁸ Ekulu andi wambuwotshiya lu djunga; Ndi ambokendakenda ladiku dia wawu.

⁹ Djunga yambuwunda lʼetshindji, Otei wambudingama;

¹⁰ Okodi wambushama lu kete, Suni diambukungela lu mbuka.

¹¹ Woma wa mamba wambohenyahenya lu beke tshe, Wambahatana la ndi.

¹² Ohenyohenyo ambukumbula mbole, Elanyelu kambukungela dia ndi ntakana.

¹³ Betshi dia diuwu diandi diambolema otoi otoi, Ona enundu a nyoi ambole biyu diandi.

¹⁴ Wambuwunya uma lu luudu landi la dipema lakandekamaka; Wambuwela le khumʼekanga ka weoma wa mamba.

¹⁵ One lahuto la ndi ambudjase lu luudu landi la dipema; Wambudianganya tsho ladiku diʼedjaselu kandi.

¹⁶ Ediu andi wambuma la tshina; Tahi yandi yambuhimbwama.

¹⁷ Euhwelu kandi kambushisho la kete, Lukumbu landi kema ntu lu esese.

¹⁸ Wambusukula uma lusasi utsha lu udjima, Wambuwutshanya andja.

¹⁹ Ndi kema la ona, kuyanga ukana, lʼatei a wudja awo, Kuyanga utshikadi lene akandadjashi.

²⁰ Wane wudjashi lu leke lʼedjelu wambukashimo, Ndu wane wa lu ehutwelu wambate asulu.

²¹ Mete, osoku mbeli edjaselu kʼuntu a kolo, Ndu edjaselu ka one laheyi Unyashungu.