Jobo 17 - La Bible en Otetela (Bible K'Ekila) 1991

¹ Lumu lami lambuheko; Nshi yami yambukume; Diumbu diambunkungela.

² Amonyodi wambunyinga; Ashu ami menaka dionyo diawo.

³ Kakiane, we weme, uyali usungi ami. Untu eko, layetawo ndjala lu wedi ami uka?

⁴ We akadihi etema awo lu ewu. Okone kema ololo we mbalemia.

⁵ One lateteka engenyi andi diango dia dimbu, Ashu wa anʼandi wayushila wulu.

⁶ Keli ndi akambete wela le antu. Vo watompongwelaka soi.

⁷ Ashu ami wambuyala enguli la okei; Biyu diami tshe diaya akandja atu,

⁸ Antu wʼusimbwi wambukashimo dikambu diadio. La untu laha la unungu ayunela dia ndo lʼomonyodi a Unyashungu.

⁹ Untu lʼololo ayokolamela lu mbuka kandi, La one leli la anya a wulu, ayutakolamelaka ndjala la wulu.

¹⁰ Keli nyu tshe, nyeso nyumuta ntu, Ne dia dimi hatani kanga yimba lʼatei anyu.

¹¹ Nshi yami yambeta; sangweyu diami diambulana, Sangweyu diaki lʼutema ami.

¹² Le nyu, utshu ndjalaka uku yanyi. Nyu mvutaka nyati: Usasi aya suki lamʼeli udjima.

¹³ Naka dimi lambukungela edjaselu kami lu Dihuli diʼEdu, Lambala mbetu kami lu udjima;

¹⁴ Naka dimi lambutela diumbu nti: We keli papa, La lukusu nti: We keli nyomi la kadiyemi,

¹⁵ Ku laso lenʼeli elungamelu kami? Akona ayena elungamelu kako?

¹⁶ To kayuhulo utsha lʼasuku wa Dihuli diʼEdu? Dimi la to tayuhulo kame dia ntumuya lu ditshu?