Jobo 16 - La Bible en Otetela (Bible K'Ekila) 1991

Jobo Ambukiyana Dia Ditshelu Dia Unyashungu

¹ Ku Jobo akakaluya diui ati:

² Dimi latukaka akambu wa wuhu oso tena tshe; Akanudi mbenyu, nyu tshe.

³ Kaandi ayushila aui aso wʼanyanya? Dikambu diakona diambukuhindja utema, dia we nkaluya diui?

⁴ Dimi lu dihuli diami. Utunyuyala luteya nteketa uku nyu, Dimi lutunyuhekuya lʼaui, Lutunyunyinginyia ote.

⁵ Dimi lutunyukikitsha lʼaui uma lʼunyo ami; Esambelu kʼelomo ami kutukitshakitsha pa kanyu.

⁶ Naka dimi lamboteketa, okei ami hawukitakita; Naka lamboʼembohala, sui diakona diayumo uma le mi?

⁷ Mete mete, Unyashungu ambumpekuya kakiane; Ambulanya wa lu luudu lami tshe.

⁸ Ndi akamu ndi, endelu kako keli omenyi lu dikambu diami; Ndu wondju ami wambunela, wambonsongwela.

⁹ Ndi akambatshaka, ku nduku andi akansuya. Ndi akankeketanyia wanyu, Utunyi ami akantosha ashu.

¹⁰ Antu wakase enyo dia mpatulami, Wakankomola mbala ya dionyo lu atama, Watomotaka kame lu dikambu diami.

¹¹ Unyashungu akankimo le wane wahawetawo, Akambikadja lʼanya wʼantu wa kolo.

¹² Dimi laki ki, ku ndi akansutshasutsha. Ndi akankimela la kotshi, akantetshatetsha; Akambete pole ya mbukakami pitu.

¹³ Ambuki andi weta wakanyingi kwi. Ndi akatsheta ashu ami wʼokongo, aha la ketshi, Akadianganya esongu kami lu kete.

¹⁴ Ndi akambete eshu eshu, Akamumbamela uku ondoshi wa ta.

¹⁵ Dimi lakayatelela dikutu, lakadilote; Lakakitsha wulu ami lu ditshu.

¹⁶ Elundji kami ambukadimo la delu; Dedi dia nyoi dieko ladiku dia toki yami.

¹⁷ Keli dimi kuntsha dikambu dia ngala; Dombelo diami diaki pudipudi.

¹⁸ Kete li! tukumbaki dikila diami. Tetawoki tukuku tami nkundja dihuli dia mumuya!

¹⁹ Enda kakiane, omenyi ami eko lʼulungu. Ukeketshi ami eko ladiku.

²⁰ Engenyi ami watonsokaka. Keli dimi latosengasengaka Unyashungu la asoi,

²¹ Dia omenyi ako nshikike sambu kʼololo kʼuntu lʼasandi la Unyashungu, La ka ona untu lʼasandi la unyandi!

²² Ne dia lamʼayeta deku dimotshi, Dimi layutsho lu mbuka kahameyi nkalula.