Jobo 15 - La Bible en Otetela (Bible K'Ekila) 1991

Elifaze Ambuhangwela Jobo

¹ Ku Elifaze, usi Temana, akahula diui ati:

² Ololo kanga yimba nkaluya aui wʼoteketateketa, La ndudia wongo andi lʼaui wʼanyanya?

³ Ololo ndi mvuta aui waha la waho, Kana alaku waheyi nkimanyia untu?

⁴ We atunyaka woma a Unyashungu, Atukitshakitshaka ekesanelu ka ntundu kandi.

⁵ Kolo kaye katulakanyaka unyo aye: We atosonolaka oteketa wa kanga lukesu.

⁶ Aha dimi, keli unyo aye mbambukamia; Elomo aye wambukudja lʼunungu.

⁷ Undi, we akuto la ntundu kʼantu tshe? We akutama ntundu kʼakuna?

⁸ We akalungula alaku wa Unyashungu? We ambuyafuna yimba?

⁹ Kakona keyaye, kahateyi? Kalimbitelaye, kahatalimbitela?

¹⁰ Akanga a ndjui la esumbi weko lʼatei asu, Wuleki sho deku efula.

¹¹ Undi, asambelu wa Unyashungu weko dikambu dia tshitshe le ye, Ndu aui asu wa memakana le ye?

¹² Ukundi etawoye utema aye nketoya? Na kitshimudi ka engadimwelu kʼashu aye,

¹³ Dia we nkadimula kele kaye utsha le Unyashungu, La dia we nteketa aui wa wuhu oso?

¹⁴ Untu eli na, dia ndi ndjala pudipudi, Kana one lakuto uma le umuntu, dia ndi ndjala uluwanyi?

¹⁵ Naka Unyashungu hekama ekilami andi, Naka ulungu kema pudipudi lu ashu andi,

¹⁶ Keti one leli wononyi la kolo, Untu latonokaka kolo uku ashi!

¹⁷ Uhukami keli nkenya; Dimi layukusanyia kene kakamenyi,

¹⁸ (Kakataka asi yimba, Uma le washewo, vo kunkishe.

¹⁹ Vo vame mbakayala akanga a kete, Laso ku nduku ongendangenda ambeta lʼatei awo).

²⁰ Untu a kolo atetaka lʼatei wʼasui lu nshi yandi tshe, Lʼatei wa deku diakasonwama dikambu dia kanga usihi.

²¹ Lundju la woma a mamba watukemaka lu atui andi. Lu nshi ya ki, unanyishi ayuwunda.

²² Ndi halungamela panda udjima; Yombo yeko lu mbukungela.

²³ Ndi atulawolawoka lene la lene, dia ntayangi ma; ambula ati: Lendʼedio? Ndi mbeyaka ati: Lushi la udjima laya suki.

²⁴ Toshoko la asui wambuwutsha woma. Vo wambuwumamela uku khumʼekanga kakayalongosola dia ndo ta,

²⁵ Ne dia ndi akedia lunya dia ndo la Unyashungu, Akasemela Kanga-Wulu-Tshe khudu.

²⁶ Ndi ambulawo utsha le ndi la dihunga La dingawu diandi dia keka dia atombo atombo,

²⁷ Ne dia elundji kandi kakayala iso ketu, La dikundju diandi diakasemo wuki.

²⁸ Ndi akadjase lu esumba wakalana, Lu mvudu yakawaseke, Yaki lasuki la ndjala elanyelu.

²⁹ Ndi hongona ntu; diango diandi hadiutshikala; Ongonyi andi hawufulanela lu kete ntu.

³⁰ Ndi heya mpanda udjima; Lumbi la dja layutshumba songusongu yandi; Lopepe layunya efufelu ka lumu landi.

³¹ Tayakesaki dia mbekama akambu wʼanyanya, Ne dia akambu ako wʼanyanya mbayuyala difutu diandi.

³² Dio diakakukiama ntundu ka etena kandi, Lutahi landi halutundja akatshi ntu.

³³ Ndi ayololola elua andi wʼepudi uku ekodi wa vinyo, Ayololola alembo andi uku utamba wa mbeli.

³⁴ Ului wʼamonyodi wa Unyashungu wayuyala dikumba; Dja yayutshumba mvudu ya waku walungula mbu yʼutshu.

³⁵ Vo watutshokaka waemi wa munga, ku watutaka kolo. Etema awo watolongosolaka akambu wa lukesu.