Jobo 14 - La Bible en Otetela (Bible K'Ekila) 1991

Jobo Ambukana Yimba Dia Nshi Tshitshe ya Lumu

¹ Untu akuto uma le umuntu! Lumu landi leli mundumundu, halukimo nsutshasutshama.

² Ndi atutoka, atuhimbwamaka uku dembo; Atulawoka, atushishoka uku dedi.

³ We atudihulaka ashu aye ladiku diʼuntu a wuhu uku? We atutshokaka kame la ndi utsha lʼelumbwelu?

⁴ Untu akona ayeya ntundja engo ka pudipudi uma lʼengo ka mindu? Nduku untu.

⁵ We akashikike nshi yandi, akali ngondo yandi, Akayidji ulelu waha ndi ndekana.

⁶ Unya ashu uma le ndi, uwusha mumuya, Edja ndu lamʼayundukutsha lushi landi uku usi ulimu.

⁷ Utamba weko lʼelungamelu. Lamʼatuwokotaka, vo watomenaka, Watutundjaka songusongu ntu,

⁸ Kuyanga udiu awo ambolengela lu kete, La utundu awo ambuma lu ditshu.

⁹ Naka ashi wambusukana lasuki la wo, Vo wayomena, wayutundja tahi uku etumbatumba kʼuyuyu.

¹⁰ Keli untu atuvokaka, atushishaka wulu andi. Lamʼambukitshiya untu, lendi endi na?

¹¹ Uku atunyamanyamaka ashi lʼeduwa, Atumaka ashi lu ekedi;

¹² Uku atetamaka untu ku heto; Ndi heto edja ndu lamʼayushila ulungu. Nduku layuwetula uma lu djo yandi.

¹³ Utuyetawo mbishemi lu Dihuli diʼEdu, Utuyetawo namami lu usheshe, edja ndu lamʼambukitakita kele kaye, Utuyetawo nshikike etena ka we mbuhomi li!

¹⁴ Undi, naka untu ambuvo, ndi ayulumba ntu? Dimi lutukikitala lu nshi tshe yʼasui ami, Edja ndu lamʼayumutshungo.

¹⁵ We ayumbeta, ku dimi layuketawo; We ayukaka ulimu wʼanya aye ketshi.

¹⁶ Keli kakiane, we ambala wanya ami tshe. Undi, we huka kolo yami su?

¹⁷ Ehedia ami wayukelekama lu tapa; Ndu we ayukumba kolo yami.

¹⁸ Ukungu wayunyukuto, wayushila; Dive diayushisho uma lu dihuli diadio.

¹⁹ Ashi watohelolaka ave; Dula diawo diatembaka ditshu dia kete. Osoku mbalanyaye elungamelu kʼuntu.

²⁰ We atokolamelaka mbusuya, ku ndi mumo; We atukadimulaka elundji, ku mbokendja.

²¹ Anʼandi wʼapami watukundjaka nemo, keli ndi heyi; Vo watukitshakitshamaka, keli ndi halimbitela.

²² Ndi atukaka kandji paka lu dimba diandi, Ku ndi atuyalelaka paka ndame.