Jobo 13 - La Bible en Otetela (Bible K'Ekila) 1991

Jobo Ambuyateketela

¹ Enda, su diami diakenyi akambu aku tshe, Tui diami diakawauki, diakahukama.

² Akambu weyanyu, ndu dimi mbaeyaka pupu: Dimi kema lʼesi kanyu.

³ Dimi nangaka nteketa la Kanga-Wulu-Tshe, Nangaka ndjateketela la ntundu ka Unyashungu.

⁴ Nyu nyeli akanga a kashi, Nyu tshe nyeli wetshi wa kashi.

⁵ Utunyutshikala ki, Mbutunyuyala akanga a tumba.

⁶ Nyulungi tukanyi tami, Nyuhukami esengosengo wʼuma lʼelomo ami.

⁷ Nyu nyayoteketa akambu wahasimbwi lu dikambu dia Unyashungu? Nyayuta akambu wa lukesu lu dikambu diandi?

⁸ Undi, Unyashungu kalanganyu nemia? Ndi kalanganyu nteketela?

⁹ Naka ndi ayunyushishima, nyayuyala aha la unungu? Nyu nyayukesa uku atuwukesaka untu?

¹⁰ Mete, ndi ayunyuhangwela, Naka nyu nyayolemia olemialemia paka lu usheshe.

¹¹ Wuki andi hawunyutsha woma? Woma andi wa mamba hawunyunda?

¹² Aui anyu weli tukedi ta wutata, Ahimbwelu anyu weli wodu wodu uku loteke.

¹³ Nyolembohali, nyunkimo ntekete! Kene katumba, kakiutumbi.

¹⁴ Dimi layanga nfumba evo ami, Lutsha nsundja lumu lami.

¹⁵ Mete, ndi ayundjaka, dimi kema la elungamelu ntu. Keli dimi ndjateketele la ntundu kandi.

¹⁶ Dikambu diako mbeyaka nkimanyiami lu panda, Ne dia untu a kolo heyi memala la ntundu kandi.

¹⁷ Nyulungi, nyulungi aui ami, Nyuhuke atui lu kene katami.

¹⁸ Dimi lambuyalongosola dia ndjateketela; Dimi mbeyaka nti: Layuyinga.

¹⁹ Akona ayama la mi? Laso, dimi lambolembohala, dimi nangaka mvo.

²⁰ Dikambu otoi, untsheli akambu ahendi, Ku dimi haluyashe uma lʼelundji kaye:

²¹ Unya lunya laye uma ladiku diami, Ndu woma aye wa mamba tawompenyahenyaki ntu.

²² Lʼokongo diku, umbeti, ku dimi layetawo. Naka dimi lamboteketa, ku we nkaluyami diui.

²³ Na efula keli ehedia ami la kolo yami? Unimbitshiya enganelu kami la kolo kami.

²⁴ Ukundi ambisheye elundji kaye? Ukundi amendaye uku utunyi aye?

²⁵ We nangaka nkomola dikatshi diasutshasutshama? We nangaka ndjela puhudi yambuma?

²⁶ We ambumpimbwela asui a wulu, Ambumbahela kolo ya nshi yami yʼolongo a pami.

²⁷ We ambumbidja ekulu lu luweti, Ambotonga esukusuku ami tshe, Ambudjela ekulu ami ulelu,

²⁸ Untu atosengosengoka uku engo kambohonda, Uku dihondo diambolema le wediya.