Jobo 12 - La Bible en Otetela (Bible K'Ekila) 1991

Jobo Ambuta dia Wulu la Yimba ya Unyashungu

¹ Ku Jobo akakaluya diui ati:

² Mete, nyu mbeli antu, La yimba yayuvo kame la nyu.

³ Keli dimi la yimba uku nyu, Dimi kema lʼesi kanyu. Akona ahuki akambu wa wuhu one?

⁴ Dimi lambuyala uku engo ka tola le anyami. Dimi lakalombaka ekimanyelu uma le Unyashungu, ku ndi akankaluyaka diui. Untu ololo, untu laha la unungu, ambuyala engo ka tola!

⁵ Untu latenaka olo atonyolaka omenyi fono. Atusukuyaka one lamboselo.

⁶ Mvudu yʼapema yʼatomboki yeko ki, Waku watotengaka Unyashungu weko la lutui tshitshi, Ee, waku watuhimbaka mbetoya Unyashungu lu mbuka kalangawo.

⁷ Kakiane umbuli nyama, ku yo yayuketsha; Ndu fudu ya lʼulungu, ku yo yayukulakanya.

⁸ Otekete la kete, ku yo yayuketsha; Ndu le nsi ya lu ashi a waki, ku yo yayukusanyia.

⁹ Lʼatei ayo tshe, kakona kaheyi ati: Lunya la Latuyalaka mbakatshi dikambu ne?

¹⁰ Ndi katukimelaka lu lunya landi kene tshe keli la lumu, Ndu ehengelo kʼuntu tshe.

¹¹ Undi, tui hadieyi ntshikitanya aui Uku atunganelaka lulimi diango dia nde?

¹² Yimba yatuyalaka le esumbi, Ndu ewu lu efula ka nshi ya lumu.

¹³ Le Unyashungu katuyalaka yimba la wulu; Ndi kukanga daku la ewu.

¹⁴ Naka ndi ambuhandjula, nduku leya mpika; Naka ndi ambudiha untu, nduku leya mbudihula.

¹⁵ Naka ndi ambukimela ashi, ku tshe muma; Naka ndi ambatuma, ku vo nkukanela kete tshe.

¹⁶ Ndi kukanga wulu la yimba, Ukesami ndu ukesanyi weli la ndi.

¹⁷ Ndi katushilaka andakanyi yimba, Kateteka embadi akanga a dinginya.

¹⁸ Ndi katukululaka khumi ya dikanga eya, Katakelekaka ekodi lu kendi yawo.

¹⁹ Ndi katunyaka elombedi uma lʼulimu, Katolembiaka akanga a wulu.

²⁰ Ndi katunyaka akanga a tutshundju aui wʼololo, Katushilaka dihangamendi ewu.

²¹ Ndi katonyolaka antu a waki, Katukululaka uya wa kanga wulu.

²² Ndi katushulaka akambu wushami, Kateteka dedi dia nyoi usasi.

²³ Ndi kateteka wedja waki, ndi katelanyaka, Ndi katuhamiaka wedja, katetolaka etali.

²⁴ Ndi katunyaka ewu uma le ewandji a wedja, Katawekekuyaka lʼusui wa shenga waha la mbuka.

²⁵ Vo watamambaka lu udjima, hawutenaka ololo, Ndi katuwaekekuyaka uku ambidjoki.