Jobo 11 - La Bible en Otetela (Bible K'Ekila) 1991

Zofara Ambukitsha Unungu le Jobo

¹ Ku Zofara, usi Nama, akahula diui ati:

² Aui efula wuhu oso, ku aha nkaluya nduku diui uka? Undi, ololo untu latoteketaka aui efula nyindjama?

³ Undi, ololo oteketa aye wʼoteketateketa nembohaya antu? Lamʼayasokaye, ku nduku untu lukuki nkutsha sonyi?

⁴ We mvutaka wati: Dietshelu diami dieko ololo, La dimi leko pudipudi lu ashu aye.

⁵ Utunduyala Unyashungu atekete, Utundufula elomo dia nkukaluya diui li,

⁶ Ndu utundukenya akambu wushami lu yimba yandi, Ne dia ndi la yimba hangone, We utena wati: Unyashungu hakutshela uku yediko ya kolo kaye!

⁷ Undi, we nkukaka nimbitela yimba ya Unyashungu: We nkukaka mbedika ewu kʼuluwanyi ka Kanga-Wulu-Tshe?

⁸ Ewu kako ndeka ulungu utali, kukukiye ntsha na? To ndeka Dihuli diʼEdu ohongo, kukukiye mbeya na?

⁹ To ndeka kete utali, Ndu to ndeka ashi a waki wuki.

¹⁰ Naka ndi ayeta la kete, ayunda antu; Naka ndi ayeta antu lu elumbwelu, akona ukuki mbushimba?

¹¹ Ndi nimbitelaka antu wʼanyanya. Ndi atenaka ndu kolo, ku nai hadji yimba loko?

¹² Keli untu anyanya kema osoku, ndi kema la yimba. Ndi akuto uku onʼa mangana.

¹³ Naka we nangaka mbedia utema aye, Usimbuli anya utsha le Unyashungu.

¹⁴ Naka kolo keko lu lunya laye, ukikadja. Tetawoki kolo mbidjase lu luudu laye la dipema.

¹⁵ Ku we ayeya mbedia elundji kaye, aha la diwadi; Ku we ayushikikala, aha la woma.

¹⁶ We ayuhela pa kaye. Ayukiuho uku ashi wambeta.

¹⁷ Ku lumu laye layuleka unya lʼatei ote ngaingai; Udjima wa lumu laye wayuyala uku sasi dia pindju.

¹⁸ We ayuyala la elungamelu; ekungelu kaye huyala uyalayala. We ayenda lu utshimba aye, ku we ayumuya la lutui tshitshi.

¹⁹ We ayetamaka, ku nduku layukohenyahenya: Antu efula wayukosenga.

²⁰ Keli ashu wʼantu wa kolo wayelo. Vo hawenyi mbuka ka ndawo, Elungamelu kawo paka nkitshiya.