Jobo 10 - La Bible en Otetela (Bible K'Ekila) 1991

Jobo Ambulela Pa Kandi

¹ Utema ami ambuheko lumu! Dimi layuyateketela, Layoteketaka la lokonyo lʼutema ami.

² Dimi layutela Unyashungu nti: Tumbishaki unungu! Omenya kene keli lʼasami la ye!

³ Eko ololo le ye dia nsuya, Dia mpetsha ulimu wʼanya aye, La ntshokola ului wʼantu wa kolo?

⁴ Undi, ashu wʼuntu mbeli la ye, We menaka uku untu?

⁵ Nshi yaye yeko uku nshi yʼuntu, La deku diaye uku deku diʼuntu,

⁶ Dia we nyanga uhedia ami, Dia we nkonya kolo kami,

⁷ Kuyanga we mbeyaka wati: Dimi kema la kolo, La nduku untu lukuki ntshungulami uma lʼanya aye?

⁸ Anya aye mbakantungi, mbakankengi, Vo mbakantshi, utundu tshe, ku we ambunanya!

⁹ Dimi lambukosengasenga dia we mbuho wati: We akankingi uku diwumba, Undi, we nangaka nkadimulami ditshu ntu?

¹⁰ We konkediami uku awele? Kunkamiami uku awele wʼukamu?

¹¹ We akakumbi diuwu la emunyi, Akamamanya weka la eshisha.

¹² We akambisha lumu la ngandji ka mamba. Elamelu kaye kakumbi lumu lami.

¹³ Keli we akashe akambu ane lʼutema aye. Dimi mbeyaka kene kakayasanguya lʼutema.

¹⁴ Naka dimi lambutsha kolo, we atumendaka, We hanyindja lu uhedia ami.

¹⁵ Naka untu a kolo kemi, mananu keko le mi! Naka ololo mbemi, dimi haleyi mbedia ote, Ne dia lambulula too la sonyi, lambomenama lʼatei wʼasui!

¹⁶ Naka dimi layedia ote, we atundjelaka uku tambwe. We atusuyaka ndu lʼakambu wa mamba.

¹⁷ We atunkitshiyaka emenyi aye ntu la ntundu kami. Atufudiaka ududu aye le mi. We atunkashimulaka la elui wʼasui wahonyi.

¹⁸ Dikambu kuna diakayantundja uma lʼutema a nyomi? Utumuvo, nduku untu utomena.

¹⁹ Dimi lutuyala uku dimi kundjala, Utuwumbetsha uma lʼutema a nyomi utsha lu diumbu.

²⁰ Nshi yami aha tshitshe mbeyo? Unkimo Umo le mi, keli mbetsha lumu yema

²¹ Ntundu latatshu lene ahamukalula ntu, Lu kete ya udjima, ndu ya dedi dia nyoi.

²² Kete ya udjima a tshududu, Kete ya dedi dia nyoi, la ufutanu, Lenʼeli usasi udjima utu.