Joani 9 - La Bible en Otetela (Bible K'Ekila) 1991

Afarise Wambumbula Untu Lakuto Tshungu

¹ Lamʼakatetaka Jesu, ndi akenyi untu lakuto tshungu.

² Ambeki andi wakawumbula vati: Umbetsha, akona akatshi dikambu dia kolo, untu one kana ambutshi andi, dia ndi mbuto tshungu?

³ Jesu akâkaluya diui ati: Untu one kuntsha dikambu dia kolo, kuyanga ambutshi andi. Keli dikambu ne diakayala, dia akambu watsha Unyashungu wenami le ndi.

⁴ Dieli la su dia ntsha elimu wa lakantumi lamʼeki yanyi. Utshu ayuya, etena kaheyi untu ntsha ulimu.

⁵ Lamʼekimi la kete, dimi keli yanyi ya wa la kete.

⁶ Lamʼakandati osoku, ndi akahongola losoi la kete, akalosohanya la kete, akudisilo lu ashu.

⁷ Ndi akawutela ati: Tshoka, toke lʼungunda wa Siloama (kitshimudi ati: Akatumama). Ku ndi akatshu, akatoka, akakalula ayasene.

⁸ Ku asukanyi andi la wane wakawenyi ntundu vati: Olombi mbendi, wakambula vati: Aha ndʼako lakadjaseka alomba one?

⁹ Amotshi wakati vati: Ndʼuku. Akina wakati vati: Kema, keli ambufana la ndi. Ndi akati ati: Dimʼone.

¹⁰ Ku vo wakawumbula vati: Ukundi ambuyosena?

¹¹ Ndi akâkaluya diui ati: Untu letawo vati: Jesu kakasohanyisha kete, ku ndi akandjishiyo lu ashu ami. Ndi akamvutedi ati: Utshu lʼungunda wa Siloama, utoke. Ku dimi lakatshwi, lakatoka, lakasenyi.

¹² Ku vo wakawumbula vati: Lendʼendi na? Ndi akati ati: Haleyi.

Afarise Wambumbula Untu Laki Tshungu

¹³ Vo wakayi la one laki tshungu le Afarise.

¹⁴ Lushi lakasohanya Jesu kete, la lakandasenya ashu andi, laki lushi lʼekila.

¹⁵ Ku Afarise ntu wakawumbula vati: Wuhu akona wakandakosenyisha? Ndi akawatela ati: Ndi akadjishi kete ya losohanya lu ashu, lakoki, ku lambosena.

¹⁶ Ku Afarise amotshi wakati vati: Untu one hayi uma le Unyashungu, ne dia ndi hatulamaka lushi lʼekila. Keli akina wakambula vati: Ukundi eya untu a kolo ntsha tulimbitelu tone? Okone vo wakatana.

¹⁷ Ku vo wakambula laki tshungu vati: Ataye dia untu one lu dikambu diakandakosenyisha? Ndi akati ati: Umvutshi mbendi.

¹⁸ Ku asi Juda kumbetawo dikambu diandi vati: Ndi aki tshungu ku ambosena, edja ndu lamʼakaweti ambutshi wa one lakasene.

¹⁹ Vo wakawambula vati: Onʼanyu latanyu nyati: Akuto tshungu one? Ukundi ambundosena kakiane?

²⁰ Ambutshi andi wakâkaluya diui vati: Shu mbeyaka shati: Ndi eko onʼasu, lakuto tshungu.

²¹ Keli shu hateyi okone ambondosena kakiane. Hateyi lakosenyisha. Nyuwumbuli, ndi aya ekumanyi, ndame ayunyutela.

²² Ambutshi andi wakati aui aso, ne dia vo wakuki asi Juda woma. Ne dia asi Juda wakasangi lulimi vati: Naka untu ayuwetawo ati: Ndi keli Kristu, ku vo mbutundja uma lʼetemwelo.

²³ Diako mbakati ambutshi andi vati: Ndi aya ekumanyi, nyuwumbuli.

²⁴ Vo waketi laki tshungu ntu; wakawumbula vati: Utumbuli Unyashungu. Shu mbeyaka shati: Pami kene eko untu a kolo.

²⁵ Ku ndi akâkaluya diui ati: Kana untu a kolo kendi, dimi haleyi. Dikambu otoi mbeyami nti: Dimi laki tshungu, kakiane lambosena.

²⁶ Ku vo wakawumbula vati: Akandakutshedi na? Ukundi akandakosenyisha?

²⁷ Ndi akâkaluya diui ati: Lakanyutedi ayi, keli nyu hanyuki. Okoko wana walanganyu diuka ntu? Undi, ndu nyu nbalanga ndjala ambeki andi?

²⁸ Ku wakotenge vati: We keli umbeki andi, keli shu ambeki wa Mose mbesu.

²⁹ Shu mbeyaka shati: Unyashungu akateketaka la Mose, keli untu one ateyi lene uyendi.

³⁰ Ndi akâkaluya diui ati: Oso eko dikambu dia mamba, ne dia ndi akasenyisha, keli nyu hanyeyi uma lene uyendi.

³¹ Shu mbeyaka shati: Unyashungu hukela untu a kolo. Keli naka untu ambotemola ndu ambutsha lulangu landi, ndi atukelaka untu oso.

³² Umakʼetatelu kʼandja, watuki dikambu dia untu lakasenya ashu wa untu lakuto tshungu.

³³ Utunduyala untu one kema uma le Unyashungu, tshiki ndi heyi ntsha nduku dikambu.

³⁴ Vo wakûkaluya diui vati: We akuto paka lu akambu wa kolo atu, ku we ambutetsha uka? Ku vo wakawutshanya.

Jesu Ambuyashula le One Laki Tshungu

³⁵ Jesu akuki ati: Vo wambutshanya one laki tshungu. Lamʼakandawenyi, ndi akawumbula ati: We ambetawo Onʼa Unyashungu?

³⁶ Ndi akâkaluya diui ati: Khumadiondjo, na ndi, keli mbetawo?

³⁷ Jesu akawutela ati: We uku awena. Ndi kateketa la ye.

³⁸ Ndi akati ati: Khumadiondjo, dimi lambetawo. Ku ndi akotemola.

³⁹ Jesu akati ati: Dimi lakayi la kete dia ndjulumbuya, dia wane wahasene wasene, dia wane wasena wayali tutshungu.

⁴⁰ Afarise waki la ndi wakuki aui aso, wakawumbula vati: Ndu shu mbeli tutshungu?

⁴¹ Jesu akawatela ati: Utunduyala nyu nyaki tutshungu, tshiki nyu kema la kolo. Keli kakiane, nyu mvutaka nyati: Shu menaka. Ku kolo kanyu kambutshikala.