Joani 7 - La Bible en Otetela (Bible K'Ekila) 1991

Ndu Anangu Jesu Wambungunangunela

¹ Lʼokongo wʼakambu aso, Jesu akakindula la Ngalili. Ndi kunanga nkindula la Judiya, ne dia asi Juda wakayangaka dia mbudiaka.

² Lushi la wuki lʼasi Juda, la dambu dia Tutumbutumbu, laki lasuki.

³ Ku anangu wakawutela vati: Umo lindu, utshu la Judiya, dia ndu ambeki aye kawutenyi akambu watuyutshaka.

⁴ Nduku untu latutshaka akambu lu usheshe lamʼayalangandi ndjaenyanya lu seke. Naka we ambutsha akambu ane, kuyaenya le wa la kete;

⁵ ne dia ndu anangu kumbetawo.

⁶ Ku Jesu aka watela ati: Etena kami katayala. Keli etena kanyu ndjalaka nshi tshe.

⁷ Wa la kete haweyi nyuhetsha. Keli vo watumpetshaka, ne dia dimi latuwataka nti: Etsha anyu weko kolo.

⁸ Nyutshu lu dambu. Dimi halutsho lu dambu diako, ne dia etena kami atakuki.

⁹ Lamʼakandawatela aui aso, ndi akatshikala la Ngalili.

Wambudja Tamu Dia Dikambu Dia Jesu

¹⁰ Lamʼakatshu anangu lu dambu, Jesu akayutsho lʼokongo diku; ndi kuntumba seke, keli aki uku lu usheshe.

¹¹ Ku asi Juda wakuyangi lu dambu. Vo wakambwana vati: Lendi endi na?

¹² Elui wʼantu wakungunangunela efula. Amotshi wakati vati: Untu ololo kendi; akina vati: Kema, ndi atunganyiyaka antu.

¹³ Keli nduku untu lakateketa dikambu diandi lu seke, ne dia woma wʼasi Juda.

¹⁴ Keli lʼatei a nshi ya dambu, Jesu akoto lʼetemwelo, aketsha antu.

¹⁵ Ku asi Juda wakambi; wakati vati: Ukundi weya untu one mukanda efula, lamʼakindi kumbeka?

¹⁶ Jesu akâkaluya diui ati: Wetshelu ami aha wami, keli wa one lakantumi.

¹⁷ Naka untu ayutsha lulangu la Unyashungu, ndi ayeya wetshelu, kana uma le Unyashungu mbewo, kana dime kayata.

¹⁸ One latuyataka, atuyangaka lutumbu landi, keli one layanga lutumbu la onelakutumi, ndi eko mete; kolo kema lʼutema andi.

¹⁹ Mose kunyusha elembe uka? Keli nyu tshe, nduku untu latuwetshaka. Okoko wana wayanganyu ndjakami?

²⁰ Ului wʼantu wakûkaluya diui vati: We eko la odienge Akona ayanga nkudiaka?

²¹ Jesu akâkaluya diui ati: Dimi lakatshi dikambu otoi, ku nyu tshe nyakambi dia dikambu diako.

²² Mose akanyetsha dikambu dia mbahema uhekeli (dio kundja uma le Mose mete, diakayi uma le watshenyu), ku nyu nyatehemiaka untu uhekeli lushi lʼekila.

²³ Naka untu atahemaka uhekeli lushi lʼekila, ne dia olembe wa Mose tawuvokaki, ya ukundi amhukanyu kele ne dia dimi lambokonoya untu lushi lʼekila?

²⁴ Tanyalelaki untu uku awenanyu, keli nyuwaleli la sambu kʼololo.

Atunyi wa Jesu Wambamba Dikambu Diandi; Antu kʼAntu Efula Wambuwetawo

²⁵ Antu amotshi wa la Jerusalema wakambula vati: Aha ndi layangawo ndjaka one uka?

²⁶ Nyendi, ndi latuhunwelaka antu diui, ku vo hawuwutela nduku diui! Embuledi mbeyaka vati: Kristu kendi, uka?

²⁷ Keli shu mbeyaka lene uyi untu one. Lamʼayene Kristu, nduku untu layeya lene uyendi.

²⁸ Ku Jesu akahangohango lʼetemwelo etsha antu ati: Dimi kundja lu lulangu lami. Nyu mbeyakami, la nyu mbeyaka lene uyemi. One lakantumi eli mete ku nyu hanyeyi.

²⁹ Dimi mbeyaka, ne dia dimi lambuya uma le ndi, ndi kakantumi.

³⁰ Ku vo wakayangi mbunda. Keli nduku untu lakawahe anya, ne dia etena kandi katakuki.

³¹ Keli antu efula wa lʼului wakawetawo; wakati vati: Undi, lamʼayene Kristu, ndi ayutsha tulimbitelu tuleki tone tatsha untu one?

³² Afarise wakuki aui wa ului wʼantu wangunangunela; ku elombedi a waki la Afarise wakatumi asi mbalasa dia ntuwunda.

³³ Ku Jesu akati ati: Dimi layutshikala la nyu etenyi ka tshitshe, ku layutsho le one lakantumi.

³⁴ Nyu nyayunyanga, ku hanyomena. Nyu hanyeya nkuma lu dihuli diayumuyala.

³⁵ Asi Juda wakambwana vati: Lendi ayutsho untu one, ahateya mbena? Ndi ayutsho le wane wakadiangana lʼatei wʼasi Ngirika, ndu ayutetsha asi Ngirika?

³⁶ Kitshimudi yakona ya diui diutshindi ati: Nyayunyanga, ku hanyomena? ndu ati: Nyu hanyeya nkuma lene ayumuyala?

“Naka Untu la Pusa”

³⁷ Lushi lʼekumelu ka dambu, laki lushi la wuki. Jesu akemala, akahangohango ati: Naka untu la pusa, ayi le mi, ayono.

³⁸ Ekedi wʼashi a lumu wayokela lʼutema wa one lambetawo, uku wata afundelu.

³⁹ Diui dia Nyuma diakandati ne, diaki dia Nyuma nkahumba wane wakawetawo nungula. Nyuma atayala, ne dia Jesu atatumbwama.

⁴⁰ Lamʼakuki ului wʼantu aui aso, amotshi wakati vati: Mete, mete, umvutshi mbendi.

⁴¹ Akina wakati vati: One eko Kristu. Keli amotshi wakambula vati: Kristu mbeyaka ndja uma la Ngalili uka?

⁴² Undi, efundelu hati ati: Kristu ayuyala kanula ya Davidi, ayuya uma la Betelehema, lu ngelu kaki Davidi?

⁴³ Okone ului wʼantu wakatana lu dikambu diandi.

⁴⁴ Amotshi wakalangi mbunda, keli nduku untu akawahe lunya.

“Nduku Untu Akateketa Okone”

⁴⁵ Asi mbalasa wakakalula le elombedi a waki la Afarise. Ku vo wakawambula vati: Ukundi ahanyayi la ndi?

⁴⁶ Asi mbalasa wakâkaluya diui vati: Nduku untu edja ndu kakiane akateketa wuhu oso.

⁴⁷ Ku Afarise wakâkaluya diui vati: Undi, ndu nyu mbambunganyiama?

⁴⁸ Embuledi kana Afarise wambuwetawo uka?

⁴⁹ Keli ului wʼantu ako waheyi elembe, wambudjama mananu.

⁵⁰ Nikodemo, omotshi lakayi le ndi ntundu, akawambula ati:

⁵¹ Undi, elembe asu mamiaka untu la ntundu watuki aui andi, ndu wateyi dikambu diutshindi?

⁵² Vo wakâkaluya diui vati: Ndu we keli usi Ngalili?

⁵³ Uyangiayangia wulu, ku we ayena wati: Umvutshi hatuyakaka uma la Ngalili.